1 Gwde gože' neda' ca', nach Jesucristw ben' zaca'lebde' ca xila' daon' be gosot beṉe' gualaž c̱heton' bzoxje' seyw gaže da' nyiše' yiša', na' cate' bzoxjen' gocži yaban' do gašj hor. 2 Na' ble'eda' gaže angl ca' zjazeche' lao Diosen', na' bnežjue' ḻegaque' tgüeje trompeta. 3 Na' yeto angl bedeseche' cho'a mes de oro da' zoa lao Diosen' gan' chi'e chnabi'e, mesen' gan' beṉe' ca' že' yaban' chosozeye' bi da' chosozeye' cate' chesonxene' Diosen'. Na' angla' nox̱e' to barser de oro gan' yo'o da' zc̱ha'o yal na' bžien' ḻo yi' ya'alj da' žia ḻo mesen'. Anglen' bene' ca' cont naquen txen len ši'i beṉe' ca' chesonxene' Diosen' bate'teze chosoḻ güiže'ne'. 4 Nach gwyas žen c̱he yala' nox̱e' anglen' gwloen lao Diosen' len xtiža' beṉe' ca' chesonxene' ḻe'. 5 Nach anglen' gwxi'e ya'alj da' žia ḻo mesen' gwlo'en ḻo' barseren' na' bzaḻen' ḻo yežlion' na' gošj gwtinchgua, na' goc bichle sšag, gwyep yes na' gwxo'.

6 Nach angl ca' gaže ben' zjanox̱e' trompeta ca' bosozoan' cho'agaque' cont yosocuežen'.

7 Angl nechon' bcuež trompeta c̱hen', na' gwche'chgua yej ḻo yežlion' na' nc̱hix̱en yi' na' chen. Na' da' zc̱ha'o yežlion' gwžiayi', yelate'ze ca goc gašje yo da' de ḻo yežlion' gwyeyen, lente yag da' ze lagüen goseyen, na' ḻecze yeto ca'ate' yix̱e' ga' da' de ḻo yežlion' goseyen.

8 Nach angl gwchope bcuež trompeta c̱hen', na' to da' nac ca to ya'a xen blažon' ḻo' nisdaon' chaḻa'ṉiṉen. Na' yelate'ze ca goc gašje nisdaon' beyaquen chen. 9 Na' yelate'ze ca goc gašje be ca' že' ḻo' nisdaon' gosatba', na' ḻeze yeto ca'te' barcw ca' chaš ḻo nisen' gosebiayin'.

10 Nach angl gwyoṉe bcuež trompeta c̱hen' na' to beljw xen blažon' ḻe'e yaba chaḻa'ṉiṉen ca to yi' yech. Jago'oṉen ḻo da' zan yegw na' da' zan ga chal nis ḻo yežlion', yelate'ze ca goc gašje yegw ca' na' ga chal nis dan' zjade yežlion' gan' jago'oṉenṉa'. 11 Na' beljon' nzin' Da' Zḻa', na' nisen' gan' jago'oṉenṉa' beyaquen zḻa' na' beṉe' zan gosat dan' gose'eje' nisen'.

12 Nach angl gwdape bcuež trompeta c̱hen' na' yelate'ze ca goc gašje gwbižen' gwžiayin', ḻecze yeto ca'te' bion' gwžiayin' na' ḻecze yelate'ze ca goc gašje beljw ca' gosebiayin'. Na' da' ca' gosebiayin' bich bososeṉin'. Da'nan' gwdena' goc c̱hoḻ yelate'ze ca goc gašj ža gašj yel, na goc ca' yogo' ža yogo' yel.

13 Nach gwṉa'a na' ble'eda' chda ḻo be' to angl do gachoḻ ḻe'e yaban' na' benda' gwṉe' zižje, gwne':

―¡Nyaše'chgua yesac c̱he beṉe' ca' že' yežlion' yeyož yosocuež angl ca' yešoṉe trompeta c̱hegaquen'!