1 E uwariꞌche, tobꞌ at chinoq, na utz taj kawesaj awibꞌ chwach ri mak echiriꞌ riꞌat kaqꞌat tzij pakiwi jujun chik ruma ri kakiꞌano. Ma riꞌat kaqꞌat tzij pakiwiꞌ yey e ne kat-tajin che uꞌanik ri kakiꞌan rike; rukꞌ kꞌu waꞌ atukel kaya awibꞌ chupa ri qꞌatbꞌal tzij. 2 Yey qetaꞌam kꞌut lik jusukꞌ ri qꞌatbꞌal tzij kuꞌan ri Dios pakiwi ri kebꞌanaw taq ri na utz taj. 3 Riꞌat, ri kaqꞌat tzij pakiwi jujun chik ruma ri kakiꞌano yey kaꞌan awe kukꞌ, ¿kachꞌobꞌ kami riꞌ riꞌat ri Dios na kuqꞌat ta tzij pawiꞌ?

4 Na rukꞌ ta kꞌu riꞌ, lik nim ri rutzil ukꞌuꞌx y runimal ukꞌuꞌx ri Dios pawiꞌ, ma karoyꞌej kayijbꞌaꞌ awibꞌ y na asu ta kusachisaj awach. ¿E kami kakꞌaq bꞌi uqꞌij riꞌ ri unimal rutzil ukꞌuꞌx ri Dios? ¿Na awetaꞌam ta nebꞌa riꞌat wa unimal rutzil ukꞌuꞌx ri Dios e kakꞌamaw bꞌi awe chupa ri tzelebꞌal tzij chwach Rire? 5 Noꞌj riꞌat lik awibꞌochꞌim awibꞌ yey na kachꞌaw tane akꞌuꞌx che katzelej atzij. Ruma kꞌu waꞌ e kat-tajin che upetisaxik ri royowal ri Dios pawiꞌ chupa ri qꞌij echiriꞌ Rire kukꞌut ri royowal y kuqꞌalajisaj kꞌu ri jusukꞌ qꞌatbꞌal tzij kuꞌano. 6 Ma ri Dios kuya ri rajil ukꞌaxel chike chikijujunal e chirij taq ri kiꞌanom. 7 Kuya kꞌaslemal na jinta utaqexik chike ri kichuqꞌubꞌem kibꞌ che uꞌanik ri utz, ma kacha kikꞌuꞌx che ukꞌulik ruchomalil ri Dios, ri yakbꞌal qꞌij kuya Rire y ri kꞌaslemal na jinta ukꞌisik. 8 Noꞌj ri oyowal y ri qꞌatbꞌal tzij re ri Dios katzaq pakiwi ri keyaktaj chirij Rire, waꞌ e ri na kakaj ta kakikoj ri Qꞌijsaq re ri Dios, xew e kakiꞌan ri na jusukꞌ taj chwach ri Dios. 9 Kape kꞌu kꞌaxkꞌobꞌik y bꞌis pakiwi konoje ri tikawex kakiꞌan ri na utz taj, tobꞌ e aj judiꞌabꞌ o na e ta aj judiꞌabꞌ. 10 Noꞌj chike konoje ri kebꞌanaw re ri utz, ri Dios kuya kichomal, yakbꞌal kiqꞌij y utzil chomal, tobꞌ e aj judiꞌabꞌ o na e ta aj judiꞌabꞌ. 11 Ma chwach ri Dios konoje ri tikawex xaqi junam kiwach.

12 Konoje kꞌu ri na jinta ketaꞌam puwi ri Tzij Pixabꞌ re ri Dios, na kaqꞌat ta tzij pakiwiꞌ e chirij ri kubꞌiꞌij wa Tzij Pixabꞌ. Na rukꞌ ta kꞌu riꞌ, we kemakunik, kasach na kꞌu kiwach. Noꞌj kꞌu ri ketaꞌam wa Tzij Pixabꞌ, we kemakunik, riꞌ kaqꞌat na tzij pakiwiꞌ e chirij ri kubꞌiꞌij wa Tzij Pixabꞌ. 13 Ma ri e jusukꞌ chwach ri Dios na e ta ri xa e tanel re Rutzij Upixabꞌ; ma e ri e ꞌanal re, e waꞌ ri kaꞌan jusukꞌ chike. 14 Noꞌj ri na e ta aj judiꞌabꞌ, tobꞌ na kitom ta ri Tzij Pixabꞌ re ri Dios, we kalax pa kanimaꞌ kakiꞌan ri kubꞌiꞌij wa Tzij Pixabꞌ, waꞌ e kꞌutubꞌal re kꞌo ketaꞌam puwi saꞌ ri chirajawaxik chike. 15 Qꞌalaj kꞌu riꞌ kꞌo taqanik tzꞌibꞌital pa kanimaꞌ, ma kakinaꞌ chikikꞌuꞌx we utz o na utz ta ri kinaꞌoj. 16 Kꞌo jun qꞌij echiriꞌ ri Dios kuya puqꞌabꞌ ri Qanimajawal Jesucristo kuqꞌat tzij pakiwi konoje; kꞌa ekꞌu riꞌ kaqꞌalajin na ronoje ri kꞌo pa kanimaꞌ ri tikawex, jelaꞌ pachaꞌ ri kubꞌiꞌij wa Utzilaj Tzij kantzijoj riꞌin.

17 Chatape kꞌu ri kabꞌiꞌx chawe ri at kukꞌil ri e aj judiꞌabꞌ, riꞌat kakubꞌaꞌ akꞌuꞌx rukꞌ ri Tzij Pixabꞌ re ri Dios yey katakꞌabꞌaꞌ aqꞌij ma ri Dios kꞌo awukꞌ. 18 Awetaꞌam kꞌu riꞌ saꞌ ri karaj ri Dios y saꞌ ri lik utz chwach Rire, ma Rutzij Upixabꞌ kukꞌut chawe saꞌ ri chirajawaxik wi kaꞌano. 19 E chawach riꞌat, at kꞌamal kiwach ri e potzꞌ y at qꞌijsaq chikiwach ri kebꞌin pa qꞌequꞌm. 20 E chawach riꞌat, at qꞌilonel ke ri na jinta kakiriqo y at kꞌutunel ke ri e chꞌutiꞌq. E kachꞌobꞌ riꞌat kꞌo ronoje yaꞌbꞌal naꞌoj y qꞌijsaq awukꞌ, ma yaꞌtal ri Tzij Pixabꞌ paqꞌabꞌ. 21 Jelaꞌ kꞌu riꞌ we katkꞌutun chike jujun chik, ¿suꞌbꞌe na katkꞌutun ta chawibꞌil awibꞌ? Riꞌat kat-tzijon puwiꞌ na utz taj we jun kuꞌan eleqꞌ; ¿suꞌbꞌe kꞌu riꞌ riꞌat kaꞌan eleqꞌ? 22 Yey kabꞌiꞌij na utz taj we junoq kamakun chirij ri kꞌulanikil; ¿suꞌbꞌe kꞌu riꞌ riꞌat kaꞌan waꞌ? Katchꞌaꞌt ne chikij ri tiox; ¿suꞌbꞌe kꞌu riꞌ kakoj aqꞌabꞌ che taq ri re tiox? 23 Riꞌat lik kaꞌan nim che awibꞌ ma kꞌo awukꞌ ri Tzij Pixabꞌ re ri Dios. ¡Yey riꞌat kapalajij ri Tzij Pixabꞌ re ri Dios y rukꞌ wa kaꞌano kakꞌaq bꞌi uqꞌij Rire! 24 E uwariꞌche e jelaꞌ pachaꞌ ri tzꞌibꞌital kan pa Ruchꞌaꞌtem ri Dios:

25 Paqatzij wi ri retalil re circuncisión kꞌo kutiqoj wi chawe, we kataqej ri Tzij Pixabꞌ. Noꞌj we na kataqej taj, riꞌ junam awach rukꞌ ri na ukojom ta ri retalil re circuncisión. 26 Noꞌj we kꞌo junoq na ukojom ta ri retalil re circuncisión, yey we kuꞌan kꞌu ri kataqan ri Tzij Pixabꞌ che, riꞌ e junam rukꞌ ukojom wa retalil, tobꞌ na ukojom taj. 27 We kꞌo kꞌu junoq na ukojom ta ri retalil re circuncisión, pero kuꞌan chi utz ronoje ri taqanik re Rutzij Upixabꞌ ri Dios, riꞌ taqal ne che rire e kaqꞌataw tzij pawiꞌ riꞌat. Ma e riꞌat, tobꞌ akojom ri retalil re circuncisión y kꞌo awukꞌ ri Tzij Pixabꞌ re ri Dios tzꞌibꞌital kanoq, e ne kapalajij ri kubꞌiꞌij. 28 Ma junoq e kukꞌil raj judiꞌabꞌ na ruma ta ri kilitaj che, yey ri saqil circuncisión na e tane ri retalil xa kojotal che ri rulewal. 29 Ma chupa ri ranimaꞌ junoq kaqꞌalajinik we paqatzij wi e kukꞌil raj judiꞌabꞌ e utinamit ri Dios. Yey ri saqil circuncisión e ri kuꞌan ri Dios pa ranimaꞌ junoq; y waꞌ e ruma ri Ruxlabꞌixel ri Dios, na e ta ruma ri taqanik tzꞌibꞌital kanoq. Ekꞌu ri yakbꞌal uqꞌij junoq e kukꞌil rutinamit ri Dios na e ta rachijabꞌ keyaꞌw re, ma e ri Dios kayaꞌw re.