1 ¿Saꞌ kꞌu riꞌ ri kutiqoj che jun we e kukꞌil rutinamit ri Dios e aj judiꞌabꞌ? ¿O saꞌ ri utz kukꞌam lo che junoq ukojom ri retalil re circuncisión? 2 Lik kꞌo taq kutiqoj wi. Ma ri Dios nabꞌe na xuya Ruchꞌaꞌtem pakiqꞌabꞌ. 3 Pero ¿saꞌ kuꞌanaꞌ we e kꞌo jujun chike na xkaj taj kakikoj Ruchꞌaꞌtem ri Dios? ¿Ruma nawi riꞌ waꞌ kujekꞌ ribꞌ ri Dios che ri ubꞌiꞌtisim? 4 ¡Paqatzij wi na e ta riꞌ! Ma ri Dios na aj ta raqꞌul; janipa rubꞌiꞌim Rire, e kuꞌano, tobꞌ kꞌu konoje ri winaq xa e aj raqꞌul. Ma e pachaꞌ ri tzꞌibꞌital kan pa Ruchꞌaꞌtem ri Dios:

5 Kꞌo ri kakibꞌiꞌij: «E taq ri lik na jusukꞌ taj kaqaꞌano kꞌo kutiqoj; ma echiriꞌ kaqaꞌan waꞌ, más kaqꞌalajin ri lik jusukꞌ kuꞌan ri Dios» kechaꞌ. (Jelaꞌ kakichꞌobꞌ raqan ri tikawex re ruwachulew.) ¿Saꞌ kꞌu riꞌ ri kaqabꞌiꞌij puwi waꞌ? ¿Na jusukꞌ ta nebꞌa ri kuꞌan ri Dios we kuqꞌat tzij paqawiꞌ? 6 ¡Areꞌ, lik jusukꞌ! Ma we ta na jusukꞌ ta Rire, ¿saꞌ kꞌu uꞌanik riꞌ kuqꞌat tzij pakiwi konoje ri e kꞌo che ruwachulew? 7 Ma laj kꞌo junoq kubꞌiꞌij: «We rukꞌ ri raqꞌubꞌal kanꞌano e katakꞌabꞌax uqꞌij ri Qꞌijsaq re ri Dios, ¿saꞌ kꞌu ubꞌe riꞌ kꞌa kabꞌiꞌxik in aj mak y kaqꞌat tzij panuwiꞌ?» kachaꞌ. 8 ¿Utz ne riꞌ kaqabꞌiꞌij: «Qaꞌana ri na utz taj chaꞌ waꞌ e kukꞌam lo ri utz»? ¡Na utz ta kꞌenoq! Yey kꞌo ri kakibꞌiꞌij raqꞌubꞌal chiqij, ma kakibꞌiꞌij jelaꞌ kojkꞌutun riꞌoj. E ri kebꞌiꞌn re waꞌ, lik taqal chike kaqꞌat tzij pakiwiꞌ.

9 ¿E kami keꞌelawi riꞌ ri oj aj judiꞌabꞌ, lik utz qaꞌanom y na jinta kꞌana qamak chikiwa ri na e ta aj judiꞌabꞌ? ¡Na e ta riꞌ! Ma e pachaꞌ ri nukꞌutum loq: Konoje, tobꞌ e aj judiꞌabꞌ o na e ta aj judiꞌabꞌ, junam e kꞌo chuxeꞌ ri qꞌatbꞌal tzij re ri Dios ruma ri kimak. 10 Ma jewaꞌ ri tzꞌibꞌital kan pa Ruchꞌaꞌtem ri Dios:

19 Ronoje ri kubꞌiꞌij Rutzij Upixabꞌ ri Dios, waꞌ kubꞌiꞌij chike ri kꞌo wa Tzij Pixabꞌ pakiqꞌabꞌ. Jekꞌulaꞌ na jinta junoq kꞌo puqꞌabꞌ kubꞌiꞌij: «Na utz ta kuqꞌat tzij ri Dios panuwiꞌ ma riꞌin na jinta kꞌana numak.» Ma paqatzij wi konoje ri winaq e kꞌo che ruwachulew, tobꞌ e aj judiꞌabꞌ o na e ta aj judiꞌabꞌ, e kꞌo chuxeꞌ ri qꞌatbꞌal tzij re ri Dios. 20 Y na jinta juna tikawex kuꞌan jusukꞌ che ribꞌ chwach ri Dios ruma ri kutaqej ri taqanik re ri Tzij Pixabꞌ. Ma ri Tzij Pixabꞌ na jinta uchuqꞌabꞌ chaꞌ kojresaj puqꞌabꞌ ri mak; xew kukꞌut chiqe: Riꞌoj oj aj mak.

21 Pero woꞌora ri Dios uqꞌalajisam chiqawach suꞌanik Rire kuꞌan jusukꞌ chiqe, jelaꞌ pachaꞌ ri kubꞌiꞌij Rutzij Upixabꞌ ri Dios tzꞌibꞌital kan ruma ri Moisés y kuma ri qꞌalajisanelabꞌ. Na kojuꞌan ta kꞌu jusukꞌ chwach ri Dios ruma ri qataqem taq ri taqanik, 22 ma e ruma ri kubꞌulibꞌal qakꞌuꞌx rukꞌ ri Qanimajawal Jesucristo. Ma ri Dios kuꞌan jusukꞌ chike konoje ri kakubꞌiꞌ kikꞌuꞌx rukꞌ ri Cristo, tobꞌ e chinoq. 23 Konoje kꞌu ri tikawex emakuninaq y lik naj e kꞌo wi lo che ri unimal uchomalil ri Dios. 24 Na rukꞌ ta kꞌu riꞌ, ri Dios kuꞌan jusukꞌ chike ruma ri unimal rutzil ukꞌuꞌx y kusipaj kꞌu ri kolobꞌetajik chike ruma ri xuꞌan ri Qanimajawal Jesucristo echiriꞌ xeresaj lo puqꞌabꞌ ri mak. 25 Ri Dios xuya lo ri Cristo chaꞌ ruma Rire ri tikawex kakiriq kuybꞌal kimak we xkubꞌiꞌ kikꞌuꞌx rukꞌ rukikꞌel xturuwik. Jekꞌuriꞌlaꞌ ri Dios xukꞌutu Rire lik jusukꞌ y lik kꞌo unimal ukꞌuꞌx, ma ojertan na asu ta xusachisaj kiwach ri winaq ruma ri kimak kiꞌanom loq. 26 Yey Rire uchꞌobꞌom chi lo raqan saꞌ ri kuꞌan chupa waꞌ wa qꞌij oj kꞌo wi. Ekꞌu woꞌora ukꞌutum chik suꞌanik kuꞌan jusukꞌ chike ri tikawex; e ruma ri kubꞌulibꞌal kikꞌuꞌx rukꞌ ri Jesús. Jelaꞌ kꞌu riꞌ, xqꞌalajinik ri Dios lik jusukꞌ y e Rire ri kuꞌan jusukꞌ chike ri kakubꞌiꞌ kikꞌuꞌx rukꞌ ri Cristo.

27 ¿Kꞌo nebꞌa qaꞌanom riꞌoj chaꞌ rukꞌ waꞌ utz kaqaꞌan nim che qibꞌ chwach ri Dios? ¡Na jintaj! ¿Suꞌbꞌe? Ma na e ta ruma kaqataqej ri taqanik ri kaꞌanaw chiqe kojqibꞌ rukꞌ ri Dios; e ruma ri kubꞌulibꞌal qakꞌuꞌx rukꞌ ri xuꞌan Rire. 28 Kaqakꞌisbꞌej kꞌu rukꞌ waꞌ: Ri Dios kuꞌan jusukꞌ che ri tikawex ruma ri kubꞌulibꞌal ukꞌuꞌx rukꞌ Rire, na ruma ta ri utaqem taq ri taqanik. 29 ¿Ri Dios xew nebꞌa Dios ke ri e aj judiꞌabꞌ? ¿Na e ta nebꞌa Dios ke ri na e ta aj judiꞌabꞌ? Paqatzij wi Rire e Dios ke ri e aj judiꞌabꞌ y ke ri na e ta aj judiꞌabꞌ. 30 Ma xa jun Dios kꞌolik. Yey Rire kuꞌan jusukꞌ chike ri tikawex ruma ri kubꞌulibꞌal kikꞌuꞌx. Waꞌ e kuꞌan kukꞌ ri kikojom ri retalil re circuncisión y kukꞌ ri na kikojom taj. 31 ¿Ruma nawi ri xkubꞌiꞌ qakꞌuꞌx rukꞌ ri Cristo, utz kaqakꞌaq bꞌi uqꞌij ri Tzij Pixabꞌ tzꞌibꞌital kan ruma ri Moisés y kaqabꞌiꞌij waꞌ na jinta chi uchak? ¡Na e ta riꞌ! Ma rukꞌ ne ri kubꞌulibꞌal qakꞌuꞌx, kaqamaj usukꞌ lik kꞌo uwach ri Tzij Pixabꞌ.