4
Kein da Abel Nan Gan
1 Adam irut fininggan Ifa impai da arangan fininggan iwangun da yapingꞌ Kein. Da Ifa ini, “Yawe irim dzi sib da dzi yapingꞌ narungꞌ marub.” 2 Raiyi da Ifa itip irim Kein rainggan Abel. Gubuꞌ Abel yingꞌa sib da inang guman mpada tayangꞌ dumpa da nuning, da Kein inang guman rafa gum.
3 Gubuꞌ mangan da Kein iyu nam gadan fain imingꞌ guman da irim dangki gin ifan da Yawe. 4 Da Abel ibinigi iyu apu bini imingꞌ dumpa gan fain narun miamun gin da isaf da iyu nagaran bini da irim isu dangki ifan da Yawe. Yawe nugun inuf nidzun angu i Abel impruꞌ da gan dangki gan, 5 da bitsintaꞌ nugun wanuf i Kein da gan dangki gan u. Ibinigi da Kein nugun itsakia nidzun da igurungur tsiraꞌ bingan.
6 Da Yawe igut i Kein, “Wain idzuwai da u nugum itsakia? Wain idzuwai da u gurungur? 7 Bida u nanga nam bini da u nugum bungꞌ atsiaꞌ. Da bitsintaꞌ bida u nanga nam maisan da nam maisan itapatip sib u muantsi nifunggam i prutsan da garada u funub. Ini suda wain i agu, da bitsintaꞌ wamunti babampafan i rasudan.”
8 Da Kein ini da rainggan Abel ini binaꞌ, “Abel, agi yunga rai rai angu waꞌa gum.” Gubuꞌ ribarangan waꞌa sib gum, da Kein yitam i ruan da yis rainggan funub.
9 Raiyi da Yawe igut i Kein ini binaꞌ, “Da u rainggam Abel anungꞌ?”
Da arangan ini, “Dzi wasruꞌgin u. Mai! Dzi masu wain i mpada tayangꞌ rainggangꞌ?”
10 Da Yawe ini, “Ibi anungꞌ da u bunang sanab maisan ibiani i rainggam? U rainggam Abel biꞌgan nifunggan nuꞌan mingꞌa intap iwaꞌ da dzi ibi nifun nuꞌan i nanga nam mungaꞌ. 11 Aruani da maisan narut agu da napaꞌ agu rai i intap aru daganga nifun da numa u rainggam biꞌgan u banginggam yatsa rai ugu. 12 U nida rafa gum da intap wasangꞌ i rima nam nidzun mangan da agu u. Da u bungꞌ asu garam kupa i asub rampan angu yungan sangꞌa intap angu fadan.”
13 Kein ini da Yawe ini binaꞌ, “Dzi asubangꞌ mungaꞌ gan u riman da dzi ani tsiraꞌ bingan iyus dzi. 14 Da waringantin! Aruani da u wat dzi rai i intap gum da gam maranggam. Da dzi bungꞌ asu garam kupa i asub rampan angu yungan, da bida manga tsanganda dzi da bungꞌ ais dzi funub.”
15 Da bitsintaꞌ Yawe ini, “Imaꞌ. Bida manga isa agu funub da bungꞌ abuaringꞌ barabin mungaꞌ maisan angu nasangꞌ 7 nayus agu i mungaꞌ gan.” Ibinigi da Yawe irim ampap mangan iyab i Kein i garam tsangandan ma waꞌan da arangan anungꞌ isangꞌ isa arangan funub u. 16 Ibinigi da Kein itangin Yawe maranggan rai da ifa mpa intap Nod* intap Nod: Bingan Nod wainggan ibi ‘rampan angu yungan’. imingꞌ gubuꞌ yaban i Iden.
Kein Yanginggan
17 Kein irut fininggan impai da fininggan iwangun da irim narunggan marub Inok. Da Kein irim gamp tsiraꞌ mangan da ifaringꞌ narun Inok bingan iyabin. 18 Raiyi da Inok irim Irad. Da Irad irim Mehudzael. Da Mehudzael irim Metusael. Da Metusael irim Lamek. 19 Lamek iyu sagat iruꞌrun, Ada da Tsila. 20 Ada iwangun da irim Dzabal. Dzabal tafan rusan isu garam mpada tayangꞌ apu pagraꞌ bida makau da dumpa da nuning da tumuangꞌa ungar tipa i apu rini gangan angu yungan. 21 Dzabal rainggan binganggan Dzubal. Dzubal isu garam rima musik i gita da yamungꞌ tafanggan. 22 Tsila iwangun da irim narun marub binganggan Tubal Kein. Arangan garam bangimurun i tipa nam mara maran i bras da ain. Da arangan nafunggan binganggan Nama.
23 Gubuꞌ mangan da Lamek itsarif runggan da finin rusan ibiani,
“Ada da Tsila, waringant i gabunggam dzi, Lamek, nan gangꞌ!
Dzi bungꞌ ais garam mangan funub bida rima biꞌ da dzi.
Da bungꞌ abinigi angu bida mamaꞌ rinifaꞌ mangan intingꞌa dzi.
24 Bida garam mangan isa Kein funub da arangan bungꞌ abuaringꞌ barabin nayus 7.
Da bida manga nanga bangin yaba i dzi, Lamek, da arangan bungꞌ abuaringꞌ barabin tsiraꞌ angu nayus 77.”
Ifa Itip Irim Narun Mangan
25 Raiyi da Adam itip irut fininggan Ifa impai da fininggan iwangun da irim narun marub, da ifaringꞌ arangan binganggan Set (wainggan ibi irim) da ini, “Anutu irim mamaꞌ narun mangan da dzi i uda Abel faganggan aru Kein isa funub ugu.” 26 Raiyi da Set irim narunggan marub mangan da ifaringꞌ i binganggan Inos. Mingꞌa arangan gubuꞌ gan arigi da fadan da garam gar iyugin da nifun itsaf Anutu da ifaringꞌ i binganggan Yawe.