1 Gubuꞌ garam gar yusan da dzarangan mpada sangꞌa intap santan da rima narun ruas finam yusan, 2 da Anutu narun rusan* Anutu narun rusan: Nan ani wainggan anungꞌ idzidziwan u. Mani angira ma nam marantaꞌan fain Anutu tanginda mpruꞌa gunungun da intap ma garam gar fain. itsangan garam intap narun rusan finam igi mara rifirif runggan angu da iyu isu i finin rusan isangꞌ maranggan aridagin. 3 Da Yawe itsangan da ini ibiani, “Dzi nifu pauꞌ gangꞌ marantaꞌan wasangꞌ i mingꞌa da garam gar ntingan u, i ribarangan garam gar intap angu. Da gan udzufan mpadan wasangꞌ i fayusa 120 u.” 4 Mingꞌa gubuꞌ igi da yaba badan da garam yingꞌa maraurun tsiraꞌ tsiraꞌ bingan impai intap. Garam igi Anutu narun rusan rima da sagat intap. Rib igi garam ngifa ngants nidzun da miamun bingan ugu.

5 Da Yawe itsangan garam gar santan i nanggan maisan nangan da maran fura nam maisan nidzun angu bida nam bini isu gudzufugun i ribarangan. 6 Da Yawe nugun ibarabin nidzun bingan angu da maran ifur, “Dzi damami tipa garam gar mpada intap da madadaum.” 7 Ibinigi da Arangan ini, “Dzi bungꞌ asiat garam gar santan dzi tangindan rai sinungꞌ intap, garam gar da apu marantaꞌan santan mpada intap da dzufan. Dzi wangungꞌ ibarabin i dzi tangin ribarangan.” 8 Da bitsintaꞌ Yawe nugun inuf i Noa angu.

9 Noa nan gan ani.

Noa runtaꞌ garam rururungan imingꞌ wasaꞌ i garam santan da gan gubuꞌ gan mpadan da garam watsanga sanab asub mangan wayab i arangan, da arangan itsuwir Anutu i sanaban mararam. 10 Noa irim narun rusan iruꞌ da bits: Sem da Ham da Yafet.

11 Garam intap santan nanggan maisan nangan isu mais imingꞌ Anutu maranggan. Da nam isa ruan idasangꞌ isangꞌ intap santan garam mpada gin. 12 Anutu irarab intap da itsangan nam maisan tsiraꞌ suda gudzufugun i garam gar da tanginda sanab bini rai. 13 Ibinigi da Anutu ini da Noa ibiani, “Dzi marangꞌ ifur i siata garam gar santan rai, i ribarangan isu gudzu uris i ruan iyus. Hai, nan nidzun! Dzi bungꞌ asiat garam gar da nam santan mingꞌa intap nampruꞌ. 14-16 Ibinigi da watip madzung† madzung: Madzung igi ibi bugis garam mampan gingꞌa gin; gan sitia gan ma sel mingꞌa wagungꞌ imaꞌ. i runggam i gai riniurun bini, da wasi kolta i wasaꞌ da manaꞌ. Da watip madzung igi guntiꞌ gan nasangꞌ 140 mitas da maradza gan 23 mitas da yaban gan 14 mitas. Warim i gudzun sib da warim pangꞌ wasaꞌ i gudzun da ringampa gan nasangꞌ 45 sentimitas. Wais tiriang farab nasangꞌ iruꞌ da bits, manga warangꞌ da wasaꞌ da wagungꞌ. Da wais mumai igi wasaꞌ farab farab in i apu mpada gin. Da warim muantsi namingꞌ i ringampa gan. 17 Dzi bungꞌ atangin mpui tsiraꞌ nawaꞌ intap i isa nam marantaꞌan sib angu funub. Da nam sib angu mingꞌa intap bungꞌ amamp. 18 Da bitsintaꞌ dzi bungꞌ autus i nan utusa i ruan gin da agu. Nabiani, warut fininggam da narum rusam da gan finin rusan natangꞌ madzung. 19-20 Da apu santan marantaꞌan mara maran sib angu iruꞌrun, arapuꞌ da rinan, naba da agu da natangꞌ madzung nampruꞌ i mpada marataꞌ. 21 Wayu nam gadan mara maran santan da waufum nasangꞌ i agam da apu santan i gadan.”

22 Noa inang nam sib angu isangꞌ Anutu nan gan nidan da arangan.