8
1 Nan amebam ti nɨ bategha, otem nɨ ganɨngizɨ,
kamaghɨn deraghai.
Kamaghɨn, kɨ tuavir ekiamɨn nɨ batogh,
nɨn tortɨ gumazitam pazɨ ga gɨnɨghnɨghan kogham.
2 Egha kɨ nɨ inigha ga uan amebamɨn dɨpenimɨn ghuzɨ,
nɨ deravɨra nan sure gamighai.
Ezɨ kɨ, wain ko pauran isɨngtɨzim sara verezim,
a isa nɨ ganighai.
Egha kɨ uan pomigranetɨn ovɨzibar dɨpaba nɨ ganɨngizɨ, nɨ da ameghai.
3 Kɨ ghaze, nan roroam uan agharir kɨriam
nan dapanimɨn aghorogham.
Eghtɨ an agharir guvim, a nan namnam muigham.
4 O Jerusalemɨn amiziba, kɨ kamaghɨn ian azai,
ia na ko akam akɨrigh suam,
ga uaning gifongezir arazim, ia an tuavim apɨran markɨ,
egh ikɨ mangɨtɨ gan ifongiam gɨvagham.
Onger akar namba 6
Amizibar onger akam
5a Ia gan. Munar amizir manam gumazamiziba puvatɨzir danganim ategha izi,
egha uan roroar gumazir a ifongezim dukuagha aning izi?
Gumazir igiamɨn onger akam
5b Ga temer ovɨzir aghuiba itimɨn povimɨn ikiava,
kɨ nɨn ifongiam gamizɨ, a dɨkafi.
Nɨn amebam temer kamɨn apebamɨn nɨ bate.
Amizir igiamɨn onger akam
6 Nɨ uan navir averiamɨn aven, narara ifongegh,
egh uam amizitam gifueghan markɨ.
Nɨ amizir igharazitam uan dafarimɨn an suighan markɨ.
Kɨrara, nɨ nan dafarimɨn suigh.
Nan ifongiam nɨ bagha bar gavgafi,
mati Ovevem nɨ iniasa gavgafi.
Kamaghɨra, nan ifongiam nɨ bagha puvɨra dɨkafi,
mati avim isia pamten dɨkafi.
7 Ifongiar arazim, an avir mɨzariamɨn mɨn isi,
kamaghɨn ongarir ekiaba anemungan iburagham,
eghtɨ aperiar ekiaba izɨva anegɨvaghan kogham.
Gumazitam nan ifongiam givesɨ nɨghnɨgh, uan dagɨaba ko biziba isɨ na danɨngtɨ, tam tughatɨghan kogham.
Kɨ dagh ifueghan kogham.
Kɨ pura nɨ gifuegham.
Amizir igiamɨn tuebabar onger akam
8 En buaramizim suvighavɨra iti
ezɨ an otemning tɨgharɨ.
An amizir ekiamɨn otoghtɨ,
gumazitam an ikɨsɨ damutɨ,
e manmaghɨn a bagh damuam?
9 En buaramizim nguibar ekiamɨn dɨvazimɨn mɨn deravɨra ikɨtɨ,
e dɨvazir kam gisɨn a bagh silvan tauan a geghuvamimɨn ingaram.
Eghtɨ a nguibar ekiamɨn tiar akamɨn mɨn ikɨtɨ,
e temer sidan ararir gavgavibar anepɨrigham.
Amizir igiamɨn onger akam
10 Kɨ mati nguibar ekiam ekɨaruzir dɨvazim,
ezɨ nan otemning mati tauan ruarir pumuning.
Kɨ ifongezir gumazim nan gari,
kɨ aghuigha amizir ekiamɨn oto.
Egha kɨ an damazimɨn bar dera.
Gumazir igiamɨn onger akam
11 Atrivim Solomonɨn wainɨn azenim Balhamonɨn nguibamɨn iti.
Gumaziba azenir kamɨn ingarsɨ,
me vaghvagh 1,000 silvan dagɨaba isɨ Atrivim Solomon danɨng.
12 Solomon mar uan 1,000 silvan dagɨaba ini.
Ezɨ gumazir azenimɨn ingariba,
me mar uan 200 silvan dagɨaba ini.
Ezɨ kɨ bizir kabagh nɨghnɨzir puvatɨ,
kɨ uabɨ, nan wainɨn azenim iti.
Kɨ uabɨ wainɨn azenir kamɨn gari.
13 O amizir kɨ ifongezim,
nɨ azenimɨn aven ikɨ mɨkɨmtɨ, kɨ nɨn tiarim baragham.
Nan namakaba uaghan nɨn tiarim baraghasa.
Amizir igiamɨn onger akam
14 O nan roroar gumazir kɨ bar ifongezim,
nɨ uamategh atamra izasa kɨ ifonge,
mati dian asɨzir atiar aghuim mɨghsɨabagh isɨn ivemara izi,
mɨghsɨar kaba, bizir mughuriar aghuir avɨriba dar iti.