46
1 Gɑri yiniwɑ Yinni Gusunɔ u Yeremi sɔ̃ɔwɑ bwese tukunun sɔ̃.
Bɑ Eɡibitiɡibu kɑmiɑ
Kɑɑkemisiɔ
2 Bɑbilonin sinɑ boko u Eɡibitin sunɔ Nɛko kɑ win tɑbu kowobu kɑmiɑ Kɑɑkemisiɔ, Efɑrɑtin dɑɑrun bɔkuɔ. N deemɑ sɑɑ ye sɔɔ, Yoyɑkimu, Yosiɑsin bii, Yudɑbɑn sinɑ bokon bɑndun wɔ̃ɔ nnɛse sɔɔrɑ mi. Sɑɑ ye sɔɔrɑ Yinni Gusunɔ u ɡɑri yini ɡeruɑ Eɡibitin sinɑ boko kɑ win tɑbu kowobun sɔ̃ u nɛɛ,
3 wee Eɡibitin tɑbu sinɑmbu bɑ kuuki mɔ̀ bɑ mɔ̀,
i tɛrɛnu sɔɔru koowo,
bɑkɑnu kɑ piiminu,
kpɑ i se i tɑbu dɑ.
4 I bɛɛn tɑbu kɛkɛ be dumi ɡɑwe sɔɔru koowo.
Bɛɛ mɑɑsɔbu, i bɛɛn dumi yɔɔwo,
kpɑ i bɛɛn tɑbu furɔsu doke.
I bɛɛn yɑɑsi sunkuo yi bɑlli,
kpɑ i bɛɛn tɑrɑkpenu sebe.
5 Adɑmɑ mbɑ Yinni Gusunɔ u sere wɑɑmɔ yɑ koorɑmɔ ben suunu sɔɔ.
U nɛɛ, be wee bɑ mwiɑ kpɑnɑ bɑ biruku yirɑ wurɑmɔ.
Bɑ ben tɑbu durɔbu kɑmiɑ.
Mɑ bɑ duki mɔ̀, bɑ ǹ mɑm biru mɛɛrimɔ.
Tem mɛ kpuro mu bɛrum duurɑ.
6 Kɑm sɔɔrɑ be bɑ sɑ̃u bɑ duki mɔ̀.
Bɑɑ tɑbu durɔ dɑmɡibu bɑ̀ n duki suɑ kɑmɑ.
Domi sɔ̃ɔ yɛ̃sɑn nɔm ɡeu ɡiɑ, Efɑrɑtin dɑɑrun bɔkuɔ,
dɑbiru tɑ sokurɑmɔ tɑ wɔrukumɔ.
7 Wɑrɑ u kɑ dɑɑ te bɑ mɔ̀ Nilu weenɛ tɑ̀ n yibɑ.
Wɑrɑ u kɑ tu weenɛ sɑnɑm mɛ ten torɑ bɔ.
8 Eɡibitiɡibɑ bɑ kɑ tu weenɛ.
Domi bɑ nɛɛ, nɡe mɛ Nilun nim mu rɑ tɛrie kɑ dɑm tem sɔɔ,
nɡe mɛyɑ ben tɑbu kowobu bɑ koo mɑɑ tɛriɑ tem sɔɔ,
kpɑ bu wusu kɑ sin tɔmbu kɑm koosiɑ.
9 Wee bɑ mɔ̀, ben mɑɑsɔbu bu seewo fuuku.
Be bɑ tɑbu kɛkɛ be dumi ɡɑwe duɑ,
bu duki doo.
Ben tɑbu durɔbu bu seewo.
Puti kɑ Kusin tɑbu durɔbu be bɑ tɛrɛ piiminu nɛni,
kɑ sere Ludibɑ be bɑ sɑ̃ɑ tɛn towobu,
bu seewo.
10 Adɑmɑ tɔ̃ɔ teni, tɑ ko n sɑ̃ɑwɑ Gusunɔ, wɔllu kɑ tem Yinniɡiru.
Tɑ ko n sɑ̃ɑwɑ tè sɔɔ u win yibɛrɛbɑ mɔru kɔsiemɔ.
Tɑkobi yɑ koo tɔmbu di,
kpɑ yu yɛm debu.
Tɔn dɑbi te yɑ koo ɡo,
Gusunɔ wɔllu kɑ tem Yinnin sɔ̃,
tɑ ko n kpĩ nɡe yɑ̃ku yɑɑ
Efɑrɑtin dɑɑrun ɡoorɔ,
sɔ̃ɔ yɛ̃sɑn nɔm ɡeu ɡiɑ.
11 Bɛɛ Eɡibitiɡibun tɑbu kowobu,
bɑɑ ì n seewɑ i dɑ Gɑlɑdiɔ i tim kɑsu, kɑmɑ.
Bɛɛn mɛɛrɑ yɑ ǹ kpeemɔ.
12 Bwesenu kpuro nu koo nɔ
nɡe mɛ bɑ bɛɛ sekuru doke.
Domi bɑ koo bɛɛn dɛsirun kuuki nɔ bɑɑmɑ.
Bɛɛn tɑbu durɔbu bɑ ko n bɑ̃ɑrimɔwɑ.
Bɑ̀ n yinnɑ, bɑ koo wɔrukuwɑ sɑnnu.
Nɛbukɑnɛsɑɑ u Eɡibiti wɔri
13 Gɑri yiniwɑ Yinni Gusunɔ u Yeremi sɔ̃ɔwɑ sɑnɑm mɛ Bɑbilonin sinɑ boko, Nɛbukɑnɛsɑɑ u nɑ u Eɡibiti wɔri. U nɛɛ,
14 ɑ Eɡibitiɡibu nɔɔsio
kɑ be bɑ wɑ̃ɑ yen wuu si bɑ mɔ̀ Miɡidoli, kɑ Mɛnfisi, kɑ Tɑpɑnɛsi sɔɔ,
ɑ nɛɛ, ben bɑɑwure u seewo u sɔɔru ko.
Domi bɑ bu tɑbu wɔrimɑ bɑɑmɑn di.
15 Ben tɑbu durɔ dɑmɡibu bɑ wɔrukɑ.
Bɑ ǹ kpĩɑ bɑ kɑ tii yinɛ.
Nɛ, Yinni Gusunɔwɑ nɑ bu fukɑ.
16 Nɑ derɑ ben tɑbu kowo dɑbiru tɑ sokurɑ tɑ wɔrukɑ.
Mɑ bɑ mɔ̀, bu seewo bu wurɑ ben temɔ
mi bɑ bu mɑrɑ, mi tɑbu sɑri.
17 Nɛ, Yinni Gusunɔ nɑ nɛɛ,
bu Eɡibitin sunɔ yĩsi kpɑɑru kɛ̃ɛyɔ
bu nɛɛ, woo kɑnɔ.
U derɑ sɑɑ ɡeɑ nùn doonɑri.
18 Nɛ Gusunɔ, wɔllu kɑ tem Yinni,
nɛ wi nɑ sɑ̃ɑ sinɑ boko,
sere kɑ nɛn wɑ̃ɑru,
nɡe mɛ bɑ yɛ̃ mɑ ɡuu te bɑ mɔ̀ Tɑbori
tɑ ɡuu ni nu tie ɡunum kere,
kɑ nɡe mɛ bɑ yɛ̃ mɑ ɡuu te bɑ mɔ̀ Kɑɑmɛli
tɑ wɑ̃ɑ nim wɔ̃kun bɔkuɔ,
nɡe mɛyɑ bɑ n yɛ̃ kɑm kɑm
mɑ yibɛrɛbɑ bɑ koo nɑ bu bu wɔri.
19 Bɛɛ Eɡibitiɡibu, i sɔɔru koowo i bɛɛn yɑ̃nu ɡurɑ,
bɑ koo bɛɛ yoru mwɛɛri.
Domi wee, Mɛnfisi yɑ koo ko bɑnsu.
Goo kun mɑɑ sinɑmɔ ye sɔɔ.
20 Bɛɛ Eɡibitiɡibu, i sɑ̃ɑwɑ nɡe nɑɑ ɡbiibɑ ye yɑ wɑ̃.
Adɑmɑ wee, dɑru swɑ̃ɑ ɡɑɑ yɑ wee
sɑɑ sɔ̃ɔ yɛ̃sɑn nɔm ɡeu ɡiɑn di,
yu ye wɔri.
21 Bɛɛn tɑbu kowo be bɑ rɑ bɛɛ somi ɡobin sɔ̃,
bɑ bɔɔru nɡe nɑɑ ɡumɡiɑ.
Kɑ mɛ, ben tii bɑ koo biruku yirɑ wurɑ
bu duki yɑkikirɑ.
Domi nɔni swɑ̃ɑrɑ koo bu wɔri.
Ben sɛɛyɑsiɑbun sɑɑ yɑ turɑ.
22 Eɡibitiɡibɑ duki mɔ̀
nɡe wɛɛ yi yi doonɔ wɔkinu sɑri.
Domi yibɛrɛbɑ bɑ bu wɔrimɔ bɑ suririmɔ,
nɡe dɑ̃ɑ buro wi u dɑ̃ɑ suririmɔ kɑ ɡbɑ̃ɑ, dɑ̃ɑ sɔ̃ɔwɔ.
23 Bɑɑ mɛ ben dɑ̃ɑ sɔ̃ɔ ɡɑ kpɑ̃
sere ɡoo kun kpɛ̃ u du mi,
kɑ mɛ, bɑ koo ɡu bɔɔriwɑ.
Domi yibɛrɛ be, bɑ twee dɑbiru kere.
Goo kun kpɛ̃ u ben ɡeeru ɡiɑ.
Nɛ, Yinni Gusunɔwɑ nɑ yeni ɡeruɑ.
24 Eɡibitiɡibɑ wɑ̃ɑ sekuru sɔɔ.
Domi wee, bɑ bu sɔ̃ɔ yɛ̃sɑn nɔm ɡeuɡibu nɔmu sɔndiɑ.
25 Nɛ, Gusunɔ Isirelibɑn Yinni, nɛ wi nɑ wɔllu kɑ tem mɔ, nɑ mɑɑ nɛɛ, kon bũu wi bɑ mɔ̀ Amɔɔ sɛɛyɑsiɑ wi u wɑ̃ɑ Tebɛsiɔ, kɑ Eɡibitin sunɔ, kɑ Eɡibitiɡibu kpuro kɑ ben bũnu kɑ ben sinɑmbu, kɑ sere mɑɑ be bɑ Eɡibitin sunɔ wi nɑɑnɛ sɑ̃ɑ. 26 Kon bu Nɛbukɑnɛsɑɑ, Bɑbilonin sinɑ boko kɑ win sɔm kowobu nɔmu bɛriɑ, be bɑ kɑsu bu bu ɡo.
Adɑmɑ yenibɑn biru, Eɡibiti yɑ koo wurɑmɑ nɡe yellu. Yeniwɑ nɛ, Yinni Gusunɔ nɑ ɡeruɑ.
Yinni Gusunɔ
u koo Isirelibɑ yɑkiɑ
(I mɑɑ mɛɛrio 30:10-11)
27 Yinni Gusunɔ u nɛɛ,
bɛɛ Isirelibɑ, Yɑkɔbun bweseru,
bɛɛ, nɛn sɔm kowobu,
i ku bɛrum ko, i ku mɑɑ nɑndɑ.
Domi kon bɛɛ wɔrɑmɑ sɑɑ tontonden di.
Kon bɛɛn bweseru yɑkiɑmɑ sɑɑ yorun di.
I ko i wurɑmɑ i wɛ̃rɑ,
i n wɑ̃ɑ bɔri yɛndu sɔɔ.
Goo kun mɑɑ bɛɛ nɔni sɔ̃ɔmɔ.
28 I ku bɛrum ko.
Domi nɑ wɑ̃ɑ kɑ bɛɛ.
Kon bwese ni kpuro kpeerɑsiɑ,
nìn suunu sɔɔ nɑ rɑɑ bɛɛ yɑrinɑsiɑ mi.
Adɑmɑ bɛɛ, nɑ ǹ bɛɛ kpeerɑsiɑmɔ.
Kon bɛɛ sɛɛyɑsiɑwɑ nɡe mɛ n weenɛ,
domi nɑ ǹ kpɛ̃ nɑ kun bɛɛ sɛɛyɑsie.
Gɑri yi Yinni Gusunɔ u ɡeruɑ
Filisitibɑn sɔ̃