47
1 Eɡibitin sinɑ boko u sere Gɑsɑ tɑbu wɔri, wee ye Yinni Gusunɔ u Yeremi sɔ̃ɔwɑ Filisitibɑn sɔ̃. U nɛɛ,
2 wee, yibɛrɛbɑ bɑ wee sɑɑ sɔ̃ɔ yɛ̃sɑn nɔm ɡeu ɡiɑn di,
bɑ tɛriɑmɔ tem sɔɔ nɡe dɑɑ te tɑ nim yibumɔ tɑ bɔ̃ɔ sɑrɑmɔ.
Mɑ bɑ tem kɑ ye yɑ wɑ̃ɑ mɛ sɔɔ wukiri
kɑ mɛn wusu kɑ tɔn be bɑ wɑ̃ɑ si kpuro sɔɔ.
Tɔn be kpuro bɑ kuuki mɔ̀, bɑ weeweenu mɔ̀.
3 Dumin nɑɑ dɑmu dɑmusu kɑ tɑbu kɛkɛbɑn uruubɑn wɔkinu nɔɔrɑmɔ.
Bɑɑbɑbɑ bɑ ben bibu derimɔ,
domi ben ɡɔmɑ kpuro dwiiyɑ.
4 Sɑɑ yɑ tunumɑ yè sɔɔ bɑ koo Filisitibɑ kpuro ɡo,
kɑ tɔn be bɑ koo kpĩ bu Tiriɡibu, kɑ Sidoniɡibu somi,
kɑ tɔn be bɑ tie bɑ wɑ̃ɑ tem bure te bɑ mɔ̀ Kɑfitoriɔ.
5 Gɑsɑɡibu bɑ wɑ̃ɑwɑ nuku sɑnkirɑnu sɔɔ
bɑ wii pɔɔnu pote.
Asikɑloniɡibu kɑ be bɑ wɑ̃ɑ wɔwɑɔ bɑ nɔɔ mɑɑri.
Bɛɛ be i tie, sere sɑɑ yerɑ̀ i ko i n wɑ̃ɑ
i n tii muririmɔ i kɑ ɡɔɔ swĩ.
6 Wee, i ɡerumɔ i mɔ̀,
Yinni Gusunɔn tɑkobi, dommɑ kɑɑ wɛ̃rɑ.
A wuro wunɛn kɑrɑrɔ,
kpɑ ɑ n wɑ̃ɑ mi sɛ̃ɛ.
7 Amɔnɑ yɑ koo kɑ wɛ̃rɑ.
Domi Yinni Gusunɔn tiiwɑ u ye woodɑ wɛ̃,
yu kɑ Asikɑloniɡibu kɑ nim wɔ̃kun ɡoonuɡibu wɔri.
Gɑri yi Yinni Gusunɔ u ɡeruɑ
Mɔɑbubɑn sɔ̃