2 mbɑn sɔ̃nɑ ɑ derɑ tɔmbu bɑ ǹ nɛn himbɑ tubumɔ kɑ wunɛn wiirɑ ɡɑri.

3 Tɛ̃, ɑ sɔɔru koowo,

kpɑ ɑ yɔ̃rɑ nɡe tɔn durɔ wɔruɡɔ.

Kon nun ɡɑri bikiɑ, kpɑ ɑ mɑn yi tubusiɑ.

4 Mɑnɑ ɑ wɑ̃ɑ sɑnɑm mɛ nɑ tem kuɑ.

A ye ɡeruo, ɑ̀ n bwisi mɔn nɑ.

5 A yɛ̃ wi u mɛn ɡoonu yi yi?

Wɑrɑ u nu yĩirɑ kɑ wɛ̃ɛ.

6 Mɑ sɔɔrɑ bɑ mɛn kpɛɛkpɛɛku swĩi.

Wɑrɑ u mɛn ɡɔmburun kperu swĩi.

7 Sɑɑ ye wɔllun ɡɔrɑdobɑ bɑ dɛsiru kɑrɑmɔ,

mɑ n sɑ̃ɑre kperin tii yi nuku dobun womu mɔ̀ yɑm sɑ̃re bururu,

8 wɑrɑ u nim wɔ̃ku kɛnuɑ kɑ ɡɑmbobɑ

sɑnɑm mɛ ɡɑ yɑrimɑ tem nukurun di.

N ǹ nɛ?

9 Nɑ ɡuru wiru kuɑ ɡen bekuru,

mɑ nɑ ɡu yɑm wɔ̃kuru wukiri.

10 Nɑ ɡu woodɑ wɛ̃ nɑ nɛɛ, ɡu yɔ̃ro mini.

Mɑ nɑ ɡu ɡɑmbobɑ kɑ kɔkɔrɔbɑ dokeɑ.

11 Nɑ ɡu sɔ̃ɔwɑ nɑ nɛɛ,

ɡu nɑ sere mini, kpɑ ɡu yɔ̃rɑ ɡu ku sɑrɑ.

Miniwɑ ɡen nim kurenun dɑm mu koo yɔ̃rɑ.

12 Sɑɑ mìn di ɑ wɑ̃ɑ,

ɑ sɔ̃ɔ sɔ̃ɔre u yɑrio bururu,

13 kpɑ u yɑrimɑ u dɑ hɑnduniɑn ɡoonu nnɛ sɔɔ,

u nuku kɔ̃suruɡibu terɑsiɑ ben kuku yenun di,

14 kpɑ tem kpuro mu kɔsi nɡe sɔndu te bɑ yĩreru doke,

kpɑ tɑ n sɑ̃ɑ nɡe wi u yɑbe burɑru sebuɑ?

15 Adɑmɑ nuku kɔ̃suruɡibu bɑ ǹ yɑm bururɑm kĩ,

domi mu yinɑmɔ bu ben kom kɔ̃sum ko.

16 Yoobu, ɑ bɔsum dɑɑre sere mi nim wɔ̃kun nɔnu ɡɑ wɑ̃ɑ?

A dɑɑre sere ɡen temɔ?

17 Bɑ nun ɡɔribun wɑ̃ɑ yeru sɔ̃ɔsire?

A ten kɔnnɔ wɑɑre?

18 A hɑnduniɑn kpɑ̃ɑru lɑɑkɑri koore?

A mɑn sɔ̃ɔwɔ ɑ̀ n ye kpuro yɛ̃.

19 Mɑnɑ swɑɑ wɑ̃ɑ ye yɑ dɔɔ yɑm bururɑm ɡiɑ.

Mɑnɑ yɑm wɔ̃kuru tɑ ten wɑ̃ɑ yeru mɔ.

20 À n yen swɛɛ yɛ̃n nɑ, ɑ ǹ kɑɑ dɑ mi?

21 Kɑɑ n ye kpuro yɛ̃, domi bɑ nun mɑrɑ n tɛ.

22 A dɑɑre sere mi nim mu rɑ ɡɔsie nɡe kperu?

A wɑ mi ɡuru kpenu nu rɑ n wɑ̃ɑ?

23 Nɑ nu yiiwɑ sɑɑ ɡɑɑn sɔ̃,

yè sɔɔ tɔmbu bɑ koo nuki sɑnkirɑ tɑbun sɔ̃.

24 A yɛ̃ mìn di yɑm bururɑm mu rɑ nɛ?

A mɑɑ yɛ̃ mìn di sɔ̃ɔ yɑri yerun woo ɡɑ rɑ nɛ?

25 Wɑrɑ u ɡurɑ swɑɑ yɑbɑ.

Wɑrɑ u ɡuru mɑɑkinu kɑ ɡuru kukiribun swɑɑ yi yi.

26 Wɑrɑ u rɑ de ɡurɑ yu nɛ ɡbɑburɔ, tem mi ɡoo sɑri,

27 kpɑ yu tem mi n dɑɑ ɡbere yɛmiɑsiɑ,

kpɑ yɑkɑsu su kpi.

28 Gurɑ yɑ tundo mɔ ro?

Wɑrɑ u kɑkoru mɑrɑ.

29 Mɑn diyɑ ɡuru kpenu nu rɑ yɑri.

30 Wɑrɑ u rɑ nim bɔbiɑsie wɔllɔ nɡe kperu,

kpɑ u nim wɔ̃kun wɔllɔ ko nɡe kpee bɑkɑru.

31 Kɑɑ kpĩ ɑ wɔllun kperi swɑɑru bwese bwesekɑ bɔke,

kpɑ ɑ mɑɑ yi kusiɑ?

32 Wunɑ ɑ rɑ de wɔllun kperi bwese bwesekɑ yi yɑri yin sɑɑ sɔɔ,

kpɑ ɑ yin wuunu kpɑrɑ?

33 A yɛ̃ nɡe mɛ wɔllɑ kɑ sĩisinɑmɔ?

Kɑɑ kpĩ ɑ kɑ ten woodɑbɑ sɔmburu ko tem sɔɔ?

34 Wunɑ ɑ rɑ nɔɔɡiru sue ɑ ɡuru wiru soku,

kpɑ ɡurɑ yu kɑ nɛ yu nun so?

35 Wunɑ ɑ rɑ ɡuru mɑɑkinu koosie?

À n nu koosiɑ, nu rɑ nɛ wunɛn mi nu nɛɛ, nu sɔɔru kpɑ,

kpɑ nu mɑɑkinu ko?

36 Wɑrɑ u tɔnun ɡɔ̃ruɔ lɑɑkɑri doke.

Wɑrɑ u tɔnu bwisi wɛ̃.

37 Wɑrɑ kɑ win bwisi kpuro,

u koo kpĩ u ɡuru winu ɡɑri,

kpɑ u nu sikɑsiɑ ɡurɑ yu nɛ,

38 kpɑ ɡurɑ ye, yu yɑnim ɡurɑ yu subu,

kpɑ yu tem kusɑnu mɔnsinɑ.

39 Yinni Gusunɔ u mɑɑ nɛɛ,

Yoobu, wunɑ ɑ rɑ ɡbee sunɔ ɡen dĩɑnu kɑsue,

kpɑ ɑ ɡen binun ɡɔ̃ɔru kpeesiɑ

40 sɑnɑm mɛ nu kpĩ nin wɑ̃ɑ yerɔ nu yɑɑ mɑrɑ?

41 Wɑrɑ u rɑ ɡunɔ bɑkeru ten dĩɑnu wɛ̃

sɑnɑm mɛ ten binu nu nɔɔ sue nɛn mi ɡiɑ,

ǹ kun mɛ, nù n bɔsu nu dĩɑnu kɑsu.