1 A yɛ̃ sɑɑ yè sɔɔ kpee bɛrɑ yɑ rɑ yen binu mɑ?

A kɑ nɛmun mɑrubu yinnɑre?

2 A rɑ nin ɡurɑn suru ɡɑri,

kpɑ ɑ n yɛ̃ sɑɑ ye nu koo mɑ?

3 Nu rɑ yiire nu nin binu mɑ,

kpɑ nu yɑri mɑrubun wɑhɑlɑn di.

4 Nin bii ni, nu rɑ kpɛ̃yɛ nu dɑm ko yɑkɑsɔ,

kpɑ nu yɑrinɑ nu nin mɛro deri.

Nu ǹ mɑɑ wee mi.

5 Wɑrɑ u rɑ de ɡbeeku kɛtɛku ɡɑ n tii mɔ,

ɡoo u kun ɡu bɔkuɑ.

N ǹ nɛ?

6 Nɑ derɑ ɡɑ wɑ̃ɑ tem mi ɡɑ̃ɑnu ku rɑ kpi,

kɑ mɑɑ tem bɔruɡimɔ.

7 Gen bɑɑye kɑ wuun wɔkinu.

Gɑ ǹ mɑɑ yinni ɡoon ɡbɑ̃sukubu nɔɔmɔ.

8 Gɑ rɑ n bɔsuwɑ ɡuunɔ ɡu kɑ ɡen dim wɑ.

Yɑkɑ bekusɑ ɡɑ rɑ n kɑsu.

9 Gbeeku kɛtɛ yɑ koo wurɑ yu nun sɔmburu kuɑ?

Yɑ koo wurɑ yu kpunɑ wunɛn nɑɑ ɡɔ̃ɔwɔ?

10 Kɑɑ ye wɛ̃ɛ doke yu nun sɔmburu kuɑ?

Yɑ koo wurɑ yu nun tem kusɑnu kɔsukuɑ wɔwɑ sɔɔ?

11 Kɑɑ ye nɑɑnɛ ko yèn sɔ̃ yɑ dɑm bɑkɑm mɔ?

Kɑɑ ye wunɛn sɔmburu kpuro nɔmu sɔndiɑ?

12 Kɑɑ nɑɑnɛ ko yu nun wunɛn dĩɑnu ɡurɑmɑ

yu kɑ dɑ doo soo yerɔ?

13 Tɑɑtɑɑrun kɑsɑ yɑ rɑ n wɑ̃ tɑ̀ n ye dɛrie.

Mɛyɑ yen sɑnsu mɑɑ wɑɑbu wɑ̃.

14 Tɑɑtɑɑ te, tɑ rɑ ten sɛ̃ɛnu sikewɑ temɔ.

Kpɑ yɑni sɛɛri yi nu swĩɑsiɑ.

15 Tɑ rɑ duɑri mɑ ɡoo ǹ kun mɛ ɡbeeku yɑɑ ɡɑɑ

koo kpĩ yu nu tɑɑku yu kɔsuku.

16 Tɑ rɑ n sɛ̃ kɑ ten binu.

A ǹ kɑɑ n mɑm tɑmɑɑ ten binɑ.

Tɑ rɑ ten wɑhɑlɑ duɑri ye tɑ kuɑ tɑ kɑ nu mɑrɑ.

17 Domi nɑ ǹ tu bwisi kɑ̃,

nɑ ǹ mɑɑ tu lɑɑkɑri kɑ̃.

18 Adɑmɑ tɑ̀ n seewɑ tɑ dukɑ mɔ̀,

tɑ ǹ mɑɑsɔ kɑ win dumɑ ɡɑrɑ.

19 Wunɑ ɑ dumi dɑm wɛ̃?

Wunɑ ɑ yi sɑrubɑsu dokeɑ?

20 Wunɑ ɑ rɑ de yi yɔ̃ nɡe twee?

Yin wurɑ yɑ rɑ tɔmbu nɑndɑsie,

21 kpɑ yi n tem bwiyɑmɔ wɔwɑ sɔɔ yi n nuku dobu mɔ̀ yin dɑm sɑɑbu.

Yì n tɑbu durɔbu wɑ,

yi rɑ bu tɑbu wɔriwɑ kɑ dɑm.

22 Yin bɑɑye kɑ bɛrum.

Yi ǹ ɡɑ̃ɑnu nɑsie.

Yi ku rɑ mɑɑ biru wure yì n tɑkobi wɑ.

23 Yin yinnibun sɛ̃ɛ bwɑ̃ɑnu kɑ ben yɑɑsi yi rɑ n wɔki

kpɑ yi n bɑllimɔ yin wɔllɔ.

24 Bɑ̀ n tɑbun kɔbɑ so, yi rɑ n ɡɑ̀ri wɔrɑwɑ,

kpɑ yi n tem kɔsukumɔ.

25 Mɛyɑ yì n kɔbɑ ye nuɑ, yi rɑ n sɔɔru kpeerewɑ,

kpɑ yi n tɑbun woo numiɑmɔ tontonden di,

kpɑ yi n yibɛrɛbɑ kɑ ben sinɑmbun nɔɔ dɑmɡisu nɔɔmɔ.

26 Wunɑ ɑ rɑ kɑsɑ bwisi kɛ̃ yu kɑ kɔsɔru dɑ sɔ̃ɔ yɛ̃sɑn nɔm dwɑru ɡiɑ?

27 Wunɑ ɑ rɑ ɡunɔ bɑkeru sɔ̃ tu kɑ se tu ten sokuru ko ɡuuru wɔllɔ?

28 Kpee bɑɑbɑ sɔɔrɑ tɑ rɑ ten wɑ̃ɑ yeru ko,

mì ɡɑ̃ɑnu kun kpɛ̃ nu tu mwɑ.

29 Sɑɑ min diyɑ tɑ rɑ ten nɔni kɔ̃ tu kɑ yɑɑ sɑ̃kiriɑ.

30 Mi ɑ yɑɑ ɡoru wɑ, miyɑ ɑ rɑ mɑɑ tu wɑ.

Yɛmɑ ten binu nu rɑ nɔ.