Yinni Gusunɔ, ɑ nɛn weeweenu nɔɔwɔ,

nɑ kĩwɑ ɑ mɑn ɡem wɛ̃.

Yinni Gusunɔ, ɑ swɑɑ tem kpĩiyɔ ɑ nɔ,

wunɛn somirɑ nɑ kĩ.

A nɛn kɑnɑru nɔɔwɔ,

nɛn ɡɔ̃run diyɑ tɑ wee.

2 A mɑn sirio,

ɑ yɛ̃ mɑ nɑ ɡem mɔ.

3 Wɔ̃kuru, ɑ nɑ nɛn mi,

ɑ wɛ̃ɛrɑ ye nɑ bwisikumɔ,

ɑ wɛ̃ɛrɑ ye nɑ ɡerumɔ,

ɑdɑmɑ ɑ ǹ torɑru ɡɑru wɑ.

4 A wɑ mɑ nɛn dɑɑ yɑ ǹ tiɑ kɑ ɡɑbuɡiɑ.

Nɑ wunɛn ɡɑri mɛm nɔɔwɑ.

Nɑ ǹ tɔn kɔ̃sobun yirɑ swĩi.

5 Nɑ yɔ̃rɑwɑ dim dim wunɛn swɑɑ sɔɔ.

Nɑ ǹ ɡɛrɑre yen min di.

6 Tɛ̃, wunɑ nɑ soku, Yinni Gusunɔ.

A mɑn wisio.

A nɛn ɡɑri nɔɔwɔ.

7 A mɑn wunɛn durom bɑkɑm sɔ̃ɔsio,

domi ɑ rɑ be bɑ nun nɑɑnɛ sɑ̃ɑ wɔre ben yibɛrɛbɑn nɔmɑn di.

8 A nɛn lɑɑkɑri koowo

nɡe mɛ tɔnu u rɑ n win nɔnin lɑɑkɑri mɔ.

A mɑn beruo

nɡe mɛ ɡuɑ yɑ rɑ yen binu bere yen kɑsɑ sɔɔ.

9 Domi tɔn kɔ̃sobɑ mɑn nɔni sɔ̃ɔmɔ,

yibɛrɛbɑ bɑ mɑn sikerenɛ, bɑ kĩ bu mɑn ɡo.

10 Bɑ nuki sosu bɑ ǹ wɔnwɔndu mɔ.

Bɑ ɡɑri mɔ̀ kɑ tii suɑbu.

11-12 Be wee bɑ sɑ̃ɑ nɡe ɡbee sunɔ ɡe ɡɑ yɑɑ mɑrɑ ɡu kɑsuku.

Bɑ nɛn yirɑ swĩi.

Bɑ mɑn nɑɑmwɛ bɑ kooro bure,

bɑ mɑn nɔni ɡirɑri bu kɑ mɑn ɡɑbɑ bu surɑ.

13 Yinni Gusunɔ, ɑ seewo ɑ bu wɔri,

ɑ ben dɑm buo.

A mɑn wɔro ben nɔmɑn di.

A bu ɡoowo kɑ wunɛn tɑkobi.

14 A ben wɑ̃ɑrun dɛ̃ɛbu kɑwo.

A de bu ben dɑɑ kɔ̃sɑ kpuron ɑre wɑ,

kpɑ yi n bu wɑ̃ɑsi sere kɑ ben bibun bibɔ.

15 Adɑmɑ nɛ, nɑ̀ n seewɑ, kon wunɛn wuswɑɑ wɑ yèn sɔ̃ nɑ dɛɛre,

kpɑ nɑ n nuku dobu yibɑ.