2 Wɔllu kɑ kperi yi Gusunɔn yiiko sɔ̃ɔsimɔ.

Sɔ̃ɔ kɑ suru bɑ Gusunɔn bɛɛrɛ sɔ̃ɔsimɔ.

Kɑ win nɔmɑ u sɑɑbɑ yi yi.

3 Tɔ̃ru bɑɑtere tɑ ten seedɑ dimɔ.

Wɔ̃kuru bɑɑtere tɑ ten ɑreru dimɔ.

4 Adɑmɑ n ǹ kɑ nɔɔ ɡɑɡu,

n ǹ kɑ ɡɑri ɡɛɛ,

n ǹ kɑ bɑrum ɡɑm.

5 Kɑ mɛ, bɑ yiiko yen seedɑ nɔɔmɔ hɑnduniɑ kpuro sɔɔ.

Bɑ ye mɛɛrɑ hɑnduniɑn ɡoonu nnɛ sɔɔ.

A sɔ̃ɔ mɛɛrio.

Wɔllu miyɑ Gusunɔ u nùn wɑ̃ɑ yeru kuɑ.

6 Ù n yɑrɑ u rɑ n sɑ̃ɑwɑ nɡe kurɔ kpɑon durɔ.

Ù n sĩimɔ u rɑ n sɑ̃ɑwɑ nɡe tɑbu durɔ.

7 U rɑ yɑriwɑ wɔllun bee tiɑ,

kpɑ u du berɑ ɡiɔ.

Ù n sĩimɔ, ɡɑ̃ɑnu sɑri ni nu koo win yɑm susuru suuri.

8 Yinni Gusunɔn ɡɑri yi yibɑ.

Yi rɑ tɔnu wɑ̃ɑru kɑ dɑm wɛ̃.

Yinni Gusunɔn nɔɔn ɡɑri yi nɑɑnɛ mɔ.

Yi rɑ yɛ̃ru sɑriruɡii bwisi kɛ̃.

9 Yinni Gusunɔn ɡere yɑ dɛnde.

Yɑ rɑ tɔnu nuku dobu wɛ̃.

Yinni Gusunɔn sɔ̃ɔsiru tɑ dɛɛre.

Tɑ rɑ tɔnu yɑm wɑɑsie.

10 Yinni Gusunɔn sɑ̃ɑru tɑ sɑ̃ɑ ɡem.

Tɑ ko n wɑ̃ɑwɑ sere kɑ bɑɑdommɑɔ.

Ye Yinni Gusunɔ u yi, yɑ sɑ̃ɑwɑ dee dee,

yɑ rɑ tɔmbu kpuro siriwɑ.

11 Domi win ɡɑri yi wurɑ ɡeɑ kere.

Win ɡere yɑ tim ɡɔm dobu kere.

12 Nɑ̀ n win ɡɑri yi swĩi,

yi rɑ mɑn kirɔ ko.

Nɑ̀ n win woodɑbɑ mɛm nɔɔwɑ,

nɑ rɑ yen ɑrufɑɑni wɑ.

13 Kɑ yen de kpuro tɔnu koo kpĩ u win torɑnu kpuro tubu?

Yinni Gusunɔ, ɑ mɑn dɛɛrɑsio nɛn torɑ ni nɑ ǹ tubɑn di.

14 A ku mɑɑ de n durum ko kɑ deɡɑnɡɑm.

A ku de yu mɑn dɔɔrɛ ko,

kpɑ nɑ n durum bɑkɑn tɑɑrɛ mɔ.

Adɑmɑ ɑ de nɑ n dɛɛre.

15 Yinni Gusunɔ, ɑ de ɑ n sɑ̃ɑ nɛn kuku yeru.

Yinni Gusunɔ, ɑ mɑn fɑɑbɑ koowo durum kpuron di.

A de nɛn ɡɑri yi nun wɛ̃re.

A de nɛn bwisikunu nu nun wɛ̃re.