2 Bɛɛ bwesenu kpuro, i swɑɑ dɑkio i nɔ.

Bɛɛ hɑnduniɑɡibu, i swɑɑ tem kpĩiyɔ i nɔ.

3 Dɑmɡibu kɑ bwɛ̃ɛbwɛ̃ɛbu, i swɑɑ dɑkio i nɔ.

Sɑ̃ɑrobu kɑ ɡobiɡibu, i swɑɑ tem kpĩiyɔ i nɔ.

4 Nɑ kon ɡɑri bwisiɡii ɡere.

Nɛn bwisikunu nu mɑɑ ɑsɑnsi mɔ.

5 Nɑ bwisiɡibun mɔnnu swɑɑ dɑki,

nɑ kon mɑɑ bɛɛ nu tubusiɑ kɑ mɔrɔku.

6 Mbɑn sɔ̃nɑ kon bɛrum ko wɑhɑlɑn sɑɑ sɔɔ.

Mbɑn sɔ̃nɑ kon bɛrum ko sɑnɑm mɛ nɛn yibɛrɛbɑ bɑ mɑn sikerenɛ nuku kɔ̃surun sɔ̃.

7 Bɑ ben dukiɑ nɑɑnɛ sɑ̃ɑ.

Mɑ bɑ tii sue dukiɑ yen kpɑ̃ɑrun sɔ̃.

8 Adɑmɑ ben ɡoo kun kpɛ̃ u win winsim hunde yɑkiɑ,

kpɑ u Gusunɔ yen kɔsiɑru wɛ̃.

9 Domi hunden yɑkiɑbu ɡɑ̃ɑ bɑkɑnɑ, bu ǹ nɔru mɔ.

Yen sɔ̃nɑ n ǹ koorɔ bu kpĩ bu ye ko,

10 n ǹ mɑɑ koorɔ bɑ n wɑ̃ɑ sere kɑ bɑɑdommɑɔ.

Bɑ ǹ kpɛ̃ bu ɡɔɔ yinɑ.

11 Domi sɑ wɑɑmɔ mɑ bwisiɡibu kɑ ɡɑri bɑkɑsu kpurowɑ bɑ ɡbimɔ.

Mɑ bɑ ben dukiɑ derimɔ ɡɑbu bu ɡurɑ.

12 Mɛyɑ be bɑ yĩsiru yɑrɑ bɑ rɑ n bwisikɑ

mɑ ben yɛnusu ko n wɑ̃ɑwɑ sere kɑ bɑɑdommɑɔ.

Ben wɑ̃ɑ yenu kun mɑɑ kɑm mɔ̀.

13 Adɑmɑ tɔnu wi u bɛɛrɛ mɔ u ku rɑ tɛ.

U sɑ̃ɑwɑ nɡe yɛɛ yi bɑ rɑ sɑkiri.

14 Nɡe mɛyɑ ben ɑre sɑ̃ɑ,

be kɑ be bɑ bu swĩi bɑ ben ɡɑri swɑɑ dɑki.

15 Bɑ rɑ bu surewɑ ɡɔriɔ nɡe yɑ̃ɑ ɡɔ̃ɔ ɡe bɑ sure wɔru sɔɔ,

kpɑ ɡɔɔ u bu di.

N sosi, tɔn dɛɛrobɑ koo bu tɑɑku, kpɑ ben bɛɛrɛ yu kpe,

kpɑ ɡɔribun wɑ̃ɑ yeru tu ko ben yɛnu.

16 Adɑmɑ Gusunɔ u koo nɛn hunde wɔrɑ sɑɑ ɡɔribun wɑ̃ɑ yerun di.

Domi u koo mɑn kɔ̃su.

17 Yen sɔ̃, ɑ ku nɑndɑ tɔnu ù n dukiɑ ɡurɑmɔ,

mɑ win yɛnun ɑrumɑni yɑ sosimɔ.

18 A n yɛ̃ mɑ u ǹ kɑ yen ɡɑɑ dɔɔ ɡɔriɔ,

bɑ ǹ mɑɑ kɑ nùn yen ɡɑɑ sikumɔ.

19 U ko n nuku dobu mɔ win wɑ̃ɑru sɔɔ,

kpɑ bɑ n nùn siɑrɑmɔ nuku doo bi u mɔ̀n sɔ̃.

20 Adɑmɑ yen kɔkɔrɔ, u koo win bɑɑbɑbɑ deemɑwɑ ɡɔriɔ.

Be, bɑ ǹ mɑɑ hɑnduniɑn yɑm bururɑm wɑsi.

21 Tɔnu wi bɑ bɛɛrɛ wɛ̃ɛmɔ, mɑ u ǹ bwisi mɔ,

u sɑ̃ɑwɑ nɡe yɛɛ yi bɑ mwɛɛrimɑ bu sɑkiri.