Yinni Gusunɔ u ɡɑri mɔ̀, u hɑnduniɑɡibu soku

be bɑ wɑ̃ɑ sɔ̃ɔ yɑri yerɔ n kɑ dɑ sɔ̃ɔ duu yerɔ.

2 Gusunɔ u kurɑmɑ sɑɑ Siɔni wuu burɔ ɡen min di kɑ yɑm bururɑm.

3 Bɛsɛn Yinni u wee wi, wi u ku rɑ mɑri.

Win wuswɑɑɔ dɔ̃ɔ boko sɔ̃ruɑ,

mɑ ɡuru woo bɔkɔ ɡɑ kɑ nùn sikerenɛ.

4 U nɔɔɡiru sue wɔllɔ kɑ temɔ u kɑ win tɔmbu siri.

5 U mɔ̀, i mɑn nɛn tɔmbu mɛnnɑmɑ be bɑ mɑn nɑɑnɛ sɑ̃ɑ,

be, be bɑ kɑ mɑn ɑrukɑwɑni bɔkuɑ

mɑ bɑ ye sire kɑ yɑ̃kuru.

6 Wɔllu kpuro tɑ koo win ɡem ɡɑri kpɑrɑ.

Domi wiyɑ u sɑ̃ɑ siri kowo.

7 Yinni Gusunɔ u nɛɛ,

i swɑɑ dɑkio bɛɛ nɛn tɔmbu Isirelibɑ.

Nɑ kon bɛɛ sɔ̃ mɑ nɛnɑ nɑ sɑ̃ɑ bɛɛn Yinni.

8 N ǹ bɛɛn yɑ̃kunun sɔ̃ nɑ bɛɛ ɡerusimɔ.

Domi nɑ rɑ bɛɛn yɑ̃ku dɔ̃ɔ mwɑɑrɑruɡinu mwɛ bɑɑdommɑ.

9 Nɑ ǹ mɑɑ nɑɑ kinɛnu mwɑɑmɔ bɛɛn yɛnuɔ,

ǹ kun mɛ boo kinɛnu bɛɛn boo ɡɔ̃sɔ.

10 Domi nɛnɑ nɑ ɡbeeku yɛɛ kpuro mɔ

kɑ yi yi wɑ̃ɑ ɡuunɔ dɑbi dɑbinu.

11 Nɑ ɡunɔ si su wɑ̃ɑ ɡuunɔ kpuro yɛ̃

kɑ mɑɑ yɛɛ yi yi wɑ̃ɑ yɑkɑsɔ.

Yi mɑɑ sɑ̃ɑwɑ nɛɡii.

12 Ǹ n ɡɔ̃ɔrun nɑ tɑ mɑn mɔ̀, n ǹ wunɛ kon sɔ̃.

Domi nɛnɑ nɑ hɑnduniɑ mɔ kɑ ye yɑ wɑ̃ɑ ye sɔɔ kpuro.

13 I tɑmɑɑ kon nɑɑ kinɛnun yɑɑ temwɑ?

I tɑmɑɑ boo kinɛnun yɛmɑ kon nɔ?

14 Ye n burɑm bo, yerɑ i nɛ Gusunɔ bɛɛn Yinni siɑrɑ.

Kpɑ i bɛɛn nɔɔ mwɛɛnu yibiɑ ni i mɑn kuɑ.

15 A mɑn sokuo sɑnɑm mɛ ɑ nuki sɑnkire.

Sɑɑ ye sɔɔ, kon nun wurɑri, kpɑ ɑ mɑn bɛɛrɛ wɛ̃.

16 Adɑmɑ Gusunɔ u kɔ̃sɑn kowo sɔ̃ɔmɔ u mɔ̀,

mbɑn sɔ̃nɑ ɑ nɛn woodɑbɑ siɑmɔ mɑ ɑ nɛn ɑrukɑwɑnin ɡɑri ɡerumɔ,

17 wunɛ wi ɑ ku rɑ sɔ̃ɔsiru kɑ̃,

mɑ ɑ nɛn ɡere ɑtɑfiiru sɑ̃ɑ.

18 À n ɡbɛnɔ wɑ, ɑ rɑ kɑ nùn nɔɔ tiɑ ko,

ɑ rɑ n wɑ̃ɑ kɑ sɑkɑrɑ kowobu.

19 Wunɛn nɔɔ ɡɑ rɑ n kɔ̃sɑ yibɑwɑ,

wunɛn yɑrɑ yɑ weesu sekumɔ.

20 Mi ɑ sinɑ kpuro, wunɛn winsimwɑ ɑ rɑ n wĩimɔ,

kpɑ ɑ n wunɛn mɛro bisin kɔ̃sɑ ɡerumɔ.

21 Yenibɑ kpurowɑ ɑ kuɑ, mɑ nɑ mɑɑri.

Domi ɑ tɑmɑɑ nɑ sɑ̃ɑwɑ nɡe wunɛ.

Adɑmɑ kon nun tɑɑrɛ wɛ̃

kpɑ n kpuro terɑsiɑ wunɛn wuswɑɑɔ.

22 I lɑɑkɑri koowo, kpɑ i swɑɑ dɑki i nɔ

bɛɛ be i nɛ Gusunɔ duɑri.

Mɑ n kun mɛ, kon bɛɛ sɛ̃re n yɑɑku.

Goo kun mɑɑ kpɛ̃ u bɛɛ wɔrɑ.

23 Wìn yɑ̃kuru tɑ sɑ̃ɑ siɑrɑbu,

yɛ̃rowɑ u mɑn bɛɛrɛ wɛ̃ɛmɔ.

Wi u mɑɑ win tii nɛni dee dee

yɛ̃rowɑ u koo nɛn fɑɑbɑ wɑ.