51
1-2 Ye Dɑfidi u kɑ Bɑti Sebɑ kpunɑ u kpɑ, Gusunɔn sɔmɔ Nɑtɑni u dɑ win mi. Yen biruwɑ Dɑfidi u wom kowobun wiruɡii womu ɡeni kuɑ. Ge wee.
3 Gusunɔ, ɑ mɑn durom kuo wunɛn kĩi ɡeerun sɔ̃.
A nɛn torɑru wunɔ wunɛn wɔnwɔndun sɔ̃.
4 A mɑn woburuo sɑ̃ɑ sɑ̃ɑ kpɑ ɑ nɛn kom kɔ̃sum wɔkɑ.
A nɛn durum wunɔ kpɑ n sɑ̃rɑ.
5 Domi nɑ nɛn torɑru wurɑ,
nɛn durum yɑ mɑɑ mɑn bitɑni mɔ̀ bɑɑdommɑ.
6 Wunɛ turowɑ nɑ torɑri,
nɑ mɑɑ kuɑ ye yɑ ǹ nun dore.
Yen sɔ̃, ɑ ɡem mɔ ye ɑ kɑ mɑn tɑɑrɛ wɛ̃.
Wunɛn siribu bu dɛnde.
7 N wee, kom kɔ̃sum sɔɔrɑ bɑ mɑn mɑrɑ.
Nɛn mɛro wi u mɑɑ nɛn ɡurɑ suɑ, win tii u sɑ̃ɑwɑ durumɡii.
8 Adɑmɑ ɡemɑ ɑ bikiɑmɔ ɡɔ̃ruɔ.
Ǹ n mɛn nɑ, ɑ de wunɛn bwisi yi n mɑn wɑ̃ɑsi.
9 A mɑn dɛɛrɑsiɑbun wororu * wororu - Yuubɑ bɑ̀ n dɛɛrɑsiɑbun wororu mɔ̀, bɑ rɑ dɑ̃ɑ kiku ɡe bɑ mɔ̀ isɔpu wɑsiwɑ dɛɛrɑsiɑbun nim sɔɔ kpɑ bu kɑ ɡu durumɡii yɛ̃kɑ. koosio kpɑ n dɛɛrɑ.
A mɑn woburuo kpɑ n bururɑ n wɛ̃su kerɑ.
10 A mɑn nuku dobu wɛ̃ɛyɔ kpɑ nɑ n dɛsinu kɑrɑmɔ.
Bɑɑ mɛ ɑ nɛn ɡɔmɑ dwiiyɑsiɑ, kon kpɑm yɛ̃ɛri.
11 A ku nɛn durum mɛɛri,
ɑ nɛn kom kɔ̃sum kpuro wɔko.
12 Gusunɔ, ɑ mɑn ɡɔ̃ru wɛ̃ɛyɔ ɡe ɡɑ dɛɛre,
kpɑ ɑ mɑn hunde kpɑɑ wɛ̃ ye yɑ koo yɔ̃rɑ sim sim.
13 A ku mɑn ɡirɑ wunɛn bɔkun di,
ɑ ku mɑɑ mɑn wunɛn Hunde Dɛɛro mwɑɑri.
14 A kpɑm mɑn wunɛn fɑɑbɑn nuku dobu wɛ̃ɛyɔ,
kpɑ kĩi ɡeeru tu nɛn hunde dɑm kɛ̃.
15 Sɑnɑm mɛyɑ kon durumɡibu wunɛn swɑɑ sɔ̃ɔsi,
be, be bɑ nun torɑri,
kpɑ bu wurɑmɑ wunɛn mi.
16 Gusunɔ, wunɛ wi ɑ mɑn fɑɑbɑ kuɑ,
ɑ ku mɑɑ mɑn ɡoon yɛm bikiɑ.
Ko nɑ n wunɛn ɡem mɛ ɑ mɑn wɛ̃ tɑkɑru mɔ̀.
17 Yinni Gusunɔ, ɑ nɛn nɔɔ wukio
kpɑ ɡu nun siɑrɑ bu nɔ yɑm kpuro.
18 À n dɑɑ yɑ̃ku dɔ̃ɔ mwɑɑrɑruɡiru kĩ,
nɑ n dɑɑ nun tu kue.
Adɑmɑ ɑ ǹ yɑ̃kunu kĩ.
19 Yɑ̃ku te tɑ nun wɛ̃re,
teyɑ ɡɔ̃ru ɡe ɡɑ tii kɑwɑ.
Gusunɔ, ɑ ǹ tɔmbu yinɑmɔ
be bɑ tuubɑ kuɑ kɑ tii kɑwɑbu.
20 A de ɑ kɑ Siɔni nɔnu ɡeu mɛɛri kpɑ ɑ ye ɡeɑ kuɑ,
kpɑ ɑ Yerusɑlɛmun ɡbɑ̃rɑru seeyɑ.
21 Sɑnɑm mɛyɑ kɑɑ yɑ̃kunu mwɑ ni ɑ bikiɑ.
Niyɑ yɑ̃ku dɔ̃ɔ mwɑɑrɑruɡinu.
Kpɑ bu nɑɑ kinɛnu ɡo wunɛn yɑ̃ku yerɔ.
*51:9 wororu - Yuubɑ bɑ̀ n dɛɛrɑsiɑbun wororu mɔ̀, bɑ rɑ dɑ̃ɑ kiku ɡe bɑ mɔ̀ isɔpu wɑsiwɑ dɛɛrɑsiɑbun nim sɔɔ kpɑ bu kɑ ɡu durumɡii yɛ̃kɑ.