18
Judas mi Iesu gitopoda ipada pipisisina.
(Matthew 26:47-56; Mark 14:43-50; Luke 22:47-53)
1 Iji ainde Iesu benunu tedo itae edo imo ae ainda ambodani de yai awa dodo Kidron Poga ainda temundo maunsitera. Edo kupo neida buro isira ainda, imo ae ainda ambodani de totoritera.
2 Edo Iesu iji jiwae ainda ambodani de yai ainda doregedo esisina, awatedo Judas (Embo ami Iesu gitopoda ipada piaina.) awa daedo yai awa gari. 3 Edo pirisi babain ae Parasi mane demi Rome da itoro embobo ae sima ari embobo* sima ari embobo awa Jew embomaida buro embo babain. Awamanemi Jew embomaida oro kotopu bajina sima edo esitera. Ge moka dá awara John 18:18 isira. de awa Judas da yai pipisitera. Edo awamane giami de parara ae keimo de bero Judas mi gisijido yai ainda gupusina.
4 Edo Iesu ro berari ainda yai idegaina awa gosisina, awatedo imo idegedo iunte awamanede sisina, “Imomane ave gain evi?”
5 Awamanemi ainde mina sitera, “Iesu Nasaret Embo.”
Edo Iesu mi awamanede sisina, “Na embo awa.” Edo Judas (Embo ami Iesu gitopoda ipada piaina.) daedo awamanede petedo isira. 6 Edo iji ainde Iesu mi awamanede sisina, “Na embo awa,” awamane gun mi iunte butuda duduritera.
7 Edo ami tekago awamanede tedogosisina, “Imomane ave gain evi?”
Edo awamanemi sitera, “Iesu Nasaret Embo.”
8 Edo Iesu mi sisina, “Nane imondemane tetena awa, na embo awara. Imomane na gain ewa gido, embobo eiwa dowo mambore.” 9 Iesu mi ge eiwa sisina, ge awa imo gisi sisina awa bé arate, “Awamane inemi namonde pipisiteta ainda embo da ji nane dadoegae.” John 17:12
10 Edo Simon Peter kasiwo† kasiwo. Eiwa awa duduno ari rorae ji demo tote (2). de gundo worugedo pirisi maneda gisijiari bajinada buro emboda dengoro ipa beda awa dedo kautugesisina. Edo buro emboda dao awa Malchus.
11 Awatedo Iesu mi Peter de sisina, “Ito kasiwo woruda pieyo! Nane memesida akou Mamo natomi pipisisina awa dodo mamana kotembetesita? Nane awa inana.”
Awamanemi Iesu kundo Annas da yai maunsitera.
12 Edo itoro embobo ae itoroda badari‡ itoroda badari awa Rome da duduno ari embo bajinabé. Imo Rome da duduno ari embobo ajijigari 600 edo maundo 1,000 gisijido esisina. de, Jew embomaida sima ari embobo demi Iesu kundo bunjitera. 13 Ango edo imo kundo Annas da yai gisi maunsitera. Edo duberi ainde Caiaphas awa pirisi maneda gisijiari bajina edo Annas§ Annas awa pirisi maneda gisijiari bajina matu (A.D. 6-15), awarata, Rome da gavana Valerius Gratus mi embo awa teugedo Caiaphas ainda deroda pipisisina (A.D. 18). awa Caiaphas da ato. 14 Edo iji gisi Caiaphas mi Jew embobode ao darari ge sisina, dave awa embo da (1) embomai awaembo daro betaina. John 11:50
Peter mi tuturoda imo akuta toreite sisina, imo awa Iesu da ambodani ae.
(Matthew 26:69-70; Mark 14:66-68; Luke 22:55-57)
15 Edo Simon Peter ae ambodani nei da (1)demi Iesu ambo ambo esitera. Edo pirisi maneda gisijiari bajinami ambodani awa Peter de gumbira awa gari. Awatedo ambodani awa ae Iesu de daedo pirisi maneda gisijiari bajinada mando guwada torido maunsisina. 16 Ata Peter awa manguro be arapada petedo isira. Edo ambodani nei awa, (Pirisi maneda gisijiari bajinami imo gari.) ami idegedo maundo manguro sima ari gagarade tesiri giri Peter budo totorisina.
17 Edo buro gagara manguro sima edo eira ami Peter de sisina, “Imo daedo awa embo ounda ambodani da (1), awa gebé rita?”
Edo ami mina sisina, “Na awa ae.”
18 Iji ainde awa damodamo edo buro embobo ae sima ari embobo de ni mundu veverada jiroro edo pepetegedo aveite itera. Edo Peter awamanede daedo petedo aveite isiri jijirisina.
Pirisi maneda gisijiari bajinami Iesu de tedogari pipisisina.
(Matthew 26:59-68; Mark 14:55-65; Luke 22:63-71)
19 Iji dá ainde pirisi maneda gisijiari bajinami Iesu de tedogari ainda ambodanida edo ainda atopatarida awa pipisisina.
20 Edo Iesu mi ainde mina sisina, “Na embo berarida yai arapada ge tedo etena. Na iji matawa benunu oroda edo oro kotopu bajinada, yai nonda Jew embomai dada eoro atopasido etena. Nane onjigedo ge da ji tae. 21 Ro embo namonde tedogotesi? Ouwamane ainkainmi ge ro awamanede teono ingido etera awa tedogiyo. Awa gebé, nane ge ro tedo etena awa awamane gari.”
22 Edo Iesu ge eiwa tesiri, sima ari emboboda embo da (1) demonda petari isira ami ipa do bereya edo Iesu dombuda iji da (1) dedo sisina, “Ine pirisi maneda gisijiari bajina de ge ango tainyae!”
23 Iesu mi embo ainde mina sisina, “Na ge beyae tetena gido, ge beyae ro tetena awa arapada karigewasi; ata gebé tetena gido, nongain na doresi?” 24 Ango edo Annas mi imo bundari matawa piesiri pirisi maneda gisijiari bajina, Caiaphas da yai, maunsisina.
Iji nei tote (2) Peter mi imo akuta toreite sisina, imo awa Iesu da ambodani ae.
(Matthew 26:71-75; Mark 14:69-72; Luke 22:58-62)
25 Edo Simon Peter awa petedo ni aveite isiri awamanemi ainde sitera, “Imo embo ounda ambodani da (1) awa gebé rita?”
Edo imo akuta toreite sisina, “Na awa ae!”
26 Edo pirisi maneda gisijiari bajina ainda buro embo da (1) awa embo Peter mi dedo dengoro kautugesira ainda embotopo. Embo ami sisina, “Na imo ae embo ounde buro doda gena, awa gebé rita?” 27 Edo tenda Peter imo akuta toreite ge sisina, edo boraebé kokora aoro sisina.
Iesu Pilate da doda peposisina.
(Matthew 27:11-18, 20-23; Mark 15:2-15; Luke 23:2-3, 18-25)
28 Ango edo sipobéde awamanemi Iesu Caiaphas da yai awa dodo gisijido kundo Rome gavanada mando bajinada maunsitera. Edo awamane Darutegari Bondoda rorae indorote jipapa esitera, awatedo awamane mando awa torae,* awatedo awamane mando awa torae. Rome da gavana awa Gentile embo. Gentile embomaimi God da aodari kera ae edo esitera, awatedo Jew embomaimi kotembedo esitera, Gentile embomaida oromando awa donode God da jisida. Daedo, Jew embomaida piari petari sisina, edo awamanemi Gentile embomaida mandoda torara gido, awamane donode God da jisida ara, edo Darutegari Bondoda sima eorekae. awamane akuta God da jisida dono ari buorekae. 29 Edo Rome gavana, Pilate, idegedo gundo awamanede sisina, “Embo einde bekumba ge tewa, ainda buriya rori?”
30 Edo awamanemi mina ainde sitera, “Embo eiwa buriya embo ae gido, nanekare embo awa ito yai kundo gumainyae.”
31 Edo Pilate mi awamanede sisina, “Imomane embo eiwa kundo itomane aodarida ro tari isira ainda katewo.”
Awatedo Jew embomaimi ainde sitera, “Rome da aodarida tari isira awa nakare embo dari betari tao ae.” 32 Edo ge awamanemi sitera awa idegesisina, Iesu mi ainda betari nongo idegaini geda tedo esisina awa bé arate.
33 Edo Pilate tekago ainda mando bajina doda torido Iesu dao tedo ainde sisina, “Imo Jew embomaida Daotari rita?”
34 Iesu mi mina ainde sisina, “Imo ge eiwa ito topo awa tesita o embo neimi nato daoda imonde tetero geta awa tesi?”
35 Edo Pilate mi mina sisina, “Na awa Jew embo ta? Ito Jew embomai ae pirisi babain demi imo nato yaida pietera. Imo buriya ro etesi?”
36 Iesu mi mina sisina, “Nato gisijiari awa butu einda ae. Ko nato gisijiari awa butu einda gido, nato kondade ari embobomi erido na dedegae etera. Ango aro Jew embomaimi na kumbari tao ae. Ata boroko nato gisijiari awa butu einda ae.”
37 Edo Pilate mi ainde sisina, “Awatedo imo daotari rita?”
Iesu mi mina sisina, “Imo gebé teta. Na awa daotari. Edo na awaembo engisina, edo na awaembo butuda guputena, embomaida yai gebé awa rori kariganate. Embo berari ainmi gebé ambo ambo eite nato ge yavi ingido eira.”
38 Pilate mi ainde sisina, “Gebé awa rori?” Ango tedo imo tekago idegedo maundo Jew embomaida yai, awamanede sisina, “Na embo einda yai buriya da ro tambae ena. 39 Ata itomane piari petari isira, duberi da da Darutegari Bondo iji ainde nanemi bundari oroda embo da (1) awa itomane yai udegedo ena. Awatedo nane Jew embomaida Daotari awa itomane yai udeganate udo evita?”
40 Edo awamane berari tekago aorogatedo sitera, “Embo awa ae, ata Barabbas!” Edo Barabbas awa jivere embo.
*18:3 sima ari embobo awa Jew embomaida buro embo babain. Awamanemi Jew embomaida oro kotopu bajina sima edo esitera. Ge moka dá awara John 18:18 isira.
†18:10 kasiwo. Eiwa awa duduno ari rorae ji demo tote (2).
‡18:12 itoroda badari awa Rome da duduno ari embo bajinabé. Imo Rome da duduno ari embobo ajijigari 600 edo maundo 1,000 gisijido esisina.
§18:13 Annas awa pirisi maneda gisijiari bajina matu (A.D. 6-15), awarata, Rome da gavana Valerius Gratus mi embo awa teugedo Caiaphas ainda deroda pipisisina (A.D. 18).
*18:28 awatedo awamane mando awa torae. Rome da gavana awa Gentile embo. Gentile embomaimi God da aodari kera ae edo esitera, awatedo Jew embomaimi kotembedo esitera, Gentile embomaida oromando awa donode God da jisida. Daedo, Jew embomaida piari petari sisina, edo awamanemi Gentile embomaida mandoda torara gido, awamane donode God da jisida ara, edo Darutegari Bondoda sima eorekae.