9
Iesu embo ipatai ambari gao esisina.
(Mark 2:1-12; Luke 5:17-26)
1 Edo Iesu mada wotedo ubutu be neida temundo ainda nasida* ainda nasida awa Kapenium (Mark 2:1). gupusina. 2 Edo giwo! Embo neneimi embo ipatai ambari topida durari isiri ainda yai budo guputera. Ango edo awamaneda gebé ari gido Iesu mi embo ipatai ambari ainde sisina, “Mai nato, do ito jiyo! Jimbo ito awa kotembedo dotena.”
3 Aindabé ami ango tesiri, burigibé Aodarida atopapasigari nenei akuta tedo mina gara esitera, “Embo eiwa God da yai ge bebegae sira!”
4 Edo Iesu mi awamaneda kotembari gido awa sisina, “Ro awaembo imomane do itomanemi kotembari bebegae kotembetevi? 5 Tari indawa awa gadaeri, ‘Jimbo ito awa kotembedo dotena,’ ko ‘Erido ainto e’ tari ri? 6 Ata nane itomane yai ano arapa ari gain ewa, Embo da Mai da awara tari butu einda awa jimboda kotembedo dowari isira.” Ango site embo ipatai ambaride sisina, “Nane imonde tena, Eri! Topi ito ji erari kundo mando itoda mambate.” 7 Edo embo awa erido ainda mandoda maunsisina. 8 Aindabé God mi awara tari dá ango embo enemboda yai pipisisina, embo jisijisimi eiwa gido korebé edo God dasiga esitera.
Iesu Matthew dao sisina.
(Mark 2:13-17; Luke 5:27-32)
9 Edo Iesu yai awa dodo aunteite embo dao Matthew awa tax kumbari oroda anumbedo isiri gosisina. Edo embo ami ainde sisina, “Na ambo ambo e!” Edo Matthew erido embo awa ambo ambo esisina.
10 Ango edo Iesu, Matthew da mandoda anumbedo, turo rorae indeiri tax kumbari embobo de jimbo beyae ari embobo de jiwae gundo imo ae ainda ambodani deda dada edo rorae injitera. 11 Edo Parasi mane eiwa gido awamanemi ainda ambodanide tedogositera, “Ro awaembo itomane atopatarimi ae tax kumbari embobo de jimbo beyae ari embobo de daedo rorae indeiri?”
12 Edo ge awa ingido Iesu mi sisina, “Embo karu itaemi siwo ari embo jipapa ae edo era, ata karu embomi siwo ari embo jipapa edo era. 13 Ata aundo geda moka einda gidogogo ewo: ‘Na do ari udo ena, edo rorou piari ae.’ Hosea 6:6 Na awa embo wasiri dambu darari dao tain gumbae, ata embo bebegae dao tano awamaneda jimbo beyae dodo God da yai wareregorote guputena.”† Aodarida atopapasigari ae Parasi mane demi ge engo tedo era, “Nakare akuta awa ‘embo wasiri dambu darari’. Natokare yai jimbo itae!” Ata awamane daedo awa jimbo beyaede, God da jisida.
Embomi Iesu de veta arida tedogari pipisitera.
(Mark 2:18-22; Luke 5:33-39)
14 Ango edo John da ambodani gundo tedogari ainda yai pipisitera, “Ro awaembo nakare iji jiwae veta edo era, edo daedo Parasi mane ango edo era, ata ito ambodani veta ae edo eri?”
15 Edo Iesu mi awamanede mina sisina, “Iji ainde jimbari tutu isiari ainda embo topomi mamato arita? Ata deguta awa gumbari jimbari tutu awamaneda yai kundo mamaina, edo ainda amboda awamane veta ara.
16 “Embo da ain gongo tekada jibigi kundo gongo matu kerari ainda gaiae edo eira. Ango aina awa jibigi tekami gongo matu awa dumbari keredo beyaebé aina. 17 Dá ango embomi waini‡ waini awa un okainda dao. Embomaimi dongo ‘gurepi’ be tapedo ainda gama budo awamaneda un okain ango siya edo esitera. Iji matu edo gundo boroko embomai un eiwa matawa injido era. teka awa sigi aintomi ari§ sigi aintomi ari. Iji ounde embomaimi waini awa sigi goutu aintomi ari gerigedo esitera. Wo goutuda ge nei Ge Moka Teteka doda ove einda gunda daedo giwo. mamatuda gerigae edo era. Ango ara awa waini tekami sigi mamatuda ainto awa mitari sigi kekerigedo usibesi ara, edo waini idegedo butuda wotaina. Ata embomi waini teka awa sigi aintomi ari tetekada gerigaro rorae tote (2) matawa dave itara.”
Iesu da gorobami karu ae betari de awa daginegesisina.
(Mark 5:21-43; Luke 8:40-56)
18 Edo iji dá ainde Iesu ge eiwa site isiri benunu oroda badarari gundo ainda yai baongo dadari edo sisina, “Nato gagara iji boroko betesira. Ata gumbu! Ito ipa tamonda piato tekago erare.” 19 Edo Iesu erido embo aindeda maunsisina, edo ainda ambodani de daedo.
20 Edo burigibé eutu da (1) karu ororo bari duberi 12 awa, ami ainda gunda gundo Iesu da ombari riborida begisi awa tujijisina. 21 Eutu ami akuta sisina awa, “Nane dabé embo ainda ombari ribori awa tujiana awa na kaviegana.”
22 Ango edo Iesu wareregedo eutu awa gido sisina, “Do jiyo, gagara nato. God mi ito gebé ari nato yai pieteta ami imo esiri kaviegeteta.” Edo eutu awa iji dá ainde kaviegesisina.
23 Edo Iesu badararida mandoda totoreite embo viriko yavi tari awa putero embo jiwae ji tedo ge sirero gosisina.* Jew embomaida ewowo gawowoda ambo ambo ari awa engo: Edo ito orobeda embo o eutu o maida betari gido, inemi viriko putari edo ji tari embomai awa ganumi oriedo ito orobeda mandoda kundo gumbata. Ango edo awamanemi kondade edo ito orobeda dubo vevera ari awa embomai berarida yai aro arapa ari gorote. 24 Edo embo ami awamanede sisina, “Imomane dodo mambuwo! Gagara awa betae, ata jitao aveira.” Edo awamanemi embo awa tedojijiritera. 25 Ata ine embo jiwae awa arapada piesiri idegetero torido aundo gagara awa ipada budo jiri erorisina. 26 Edo bino eiwa yai berari ainda arapu esiri embomai ingitera.
Iesu embo tote (2) jisi akikeimbari gao esisina.
27 Edo Iesu yai awa dodo aunteiri embo tote (2) jisi akikeimbari embo ainda amboda aunsite aorogatedo sitera, “Nakare do ewasi, David da Mai!”† David da Mai awa God da Avigari Embo ‘Keriso’ da dao nei.
28 Ango edo embo awa mando doda toriri embo jisi akikeimbari awa ainda yai guputera. Edo embo ami awamanede sisina, “Imomane buro eiwa nane ari tao awa gebé evita?”
Edo awamanemi mina ainde sitera, “Ge bé, Badari.”
29 Ango tetero gido embo ami awamaneda jisi awa tujido sisina, “Aindabé imomane buro eiwa nane ari tao gebé ewa, imomane gao ari bawa,” sisina. 30 Edo awamaneda jisi awa dave esisina. Edo Iesu awamanede ge okain sisina, “Giwoǃ Inemane embo da (1) ande buro eiwa teove.” 31 Ata awamanemi idegedo embo awa buro ro esiri ainda bino awa yai berari ainda kundo maundo gundo embomaide tetero gositera.
Iesu mi embo da (1) ge tari tao ae awa gao esisina.
32 Ango edo iji ainde embo tote (2) Iesu mi gao esira ami idegetero, giwo, embomai neneimi embo da (1) bineimi bundari ge tari tao ae awa kundo Iesu da yai guputera. 33 Edo binei ondesiri idegesiri embo ge tari tao ae awa ge sisina. Edo embomai jisijisi awa korebé edo sitera, “Iwata ari engo awa Israel doda kaena gisi gae!”
34 Ata Parasi mane mi sitera, “Bibineida gisijiarimi Iesu da yai goroba pieuri bibinei ondeuri idegedo era.”
Embo jiwae God da gisijiarida bino dave awa ingain jipapa esitera.
35 Edo Iesu nasi berari babain edo babaingaeda torido idegedo maundo benunu oroda torido atopasido esisina. Edo embo ami gisijiarida bino dave‡ gisijiarida bino dave awa nongo edo embomaimi God da sima ari dave awamaneda yai bari tao. awa karigeteite embomaida burau ari edo karu amburo neide kainde bari berari awa gao eiuri kaviegedo esitera. 36 Ata iji ainde imo embo jisijisida do buriya ari edo kondade ari itae awa gosisina, awamane awa wo sipumane sima ari embo itae ango. Awatedo embo ami awamane gido do memesi burisina. 37 Edo embo ami ainda ambodanide sisina, “Buroda rorae jiwaebé awa tari esira. Ata tokari embomai awa indewae. 38 Awatedo rorae tari arida Badari da yai benunu tewo, tokari embomai piari maundo ainda buroda torore.”
*9:1 ainda nasida awa Kapenium (Mark 2:1).
9:13 Hosea 6:6
†9:13 Aodarida atopapasigari ae Parasi mane demi ge engo tedo era, “Nakare akuta awa ‘embo wasiri dambu darari’. Natokare yai jimbo itae!” Ata awamane daedo awa jimbo beyaede, God da jisida.
‡9:17 waini awa un okainda dao. Embomaimi dongo ‘gurepi’ be tapedo ainda gama budo awamaneda un okain ango siya edo esitera. Iji matu edo gundo boroko embomai un eiwa matawa injido era.
§9:17 sigi aintomi ari. Iji ounde embomaimi waini awa sigi goutu aintomi ari gerigedo esitera. Wo goutuda ge nei Ge Moka Teteka doda ove einda gunda daedo giwo.
*9:23 Jew embomaida ewowo gawowoda ambo ambo ari awa engo: Edo ito orobeda embo o eutu o maida betari gido, inemi viriko putari edo ji tari embomai awa ganumi oriedo ito orobeda mandoda kundo gumbata. Ango edo awamanemi kondade edo ito orobeda dubo vevera ari awa embomai berarida yai aro arapa ari gorote.
†9:27 David da Mai awa God da Avigari Embo ‘Keriso’ da dao nei.
‡9:35 gisijiarida bino dave awa nongo edo embomaimi God da sima ari dave awamaneda yai bari tao.