10
Iesu mi ainda ambodani 12 avigesisina.
(Mark 3:13-19; Luke 6:12-16)
1 Edo Iesu mi dao tesiri ambodani 12 ainda yai gumbero awara tari pipisisina, awamanemi asisi bebegae ondaro idegorote edo embomai burau ari edo karu amburo neide kainde bari berari awa gao aro kaviegorote.
2 Edo aposil* aposil awa Guriki da ge apostolos edo gumbari. Ainda moka awa ‘piari mambari embo’. Iesu mi tuturoda ainda ambodani doda embobo 12 ainda aposil mane avigesisina (Matthew 10:1-8; Luke 6:12-16). Embobo eiwamanemi Iesu de daedo isite maundo gundo eiworo Iesu mi awamane atopasido esisina. Iesu mi awamane piesiri maunsitera embomai gao aro kaviegorote, edo ainda bino dave karigorote sisina. mane 12da dao awa eiwa: gisi awa Simon (Ainda dao Peter tedo esitera.) edo ainda nameji Andrew; James, Zebedee da mai, edo ainda nameji John; 3 Philip edo Bartholomew; Thomas edo Matthew, tax kumbari embo; James, Alphaeus da mai, edo Lebbaeus (Ainda dao nei awa Thaddaeus.); 4 Simon awa Keina Embo,† Keina Embo da moka awa embo Keina nasida edo gumbari, o Rome da gisijijiegari awa jipapa ae ari embo (Luke 6:15 edo Iwata Ari 1:13 giwo.). edo Judas Iscariot. Judas dá ami Iesu budo ainda gitopo emboboda ipada pipisisina.
Iesu mi ainda ambodani 12 piesiri idegesitera.
(Mark 6:7-13; Luke 9:1-6)
5 Eiwamane 12 awa Iesu mi piesiri idegetero buro nongo nongo arida ge awamanede sisina: “Gentile embomaida yaida mambove, edo Samaria embomaida nasi babain awa torove. 6 Ata Israel embomaida yai mambuwo. Awamane awa kariwa dá wo sipumane dadoegari ango. 7 Edo imomane maundo ge karigeteite, ‘Utuda gisijiari aikae esira,’‡ Utuda gisijiari aikae esira. Kondade ari ge Matthew 3:2da tuda giwo. awa tewo gore. 8 Edo karu embomai gao ewo kaviegore, edo embo ginimi tutupegari awamane gao ewo dono itae are,§ dono itae are. Karu emi euri embomai donode God da jisida idegotora. Awatedo, edo awamaneda karu itae aina, awamaneda dono God da jisida itae aina. (Leviticus 13:1-46). edo betari awa jiwo erore,* edo betari awa jiwo erore. Ge eiwa awa davebé, ata Guriki da ove gaiari mamatu jiwae ge eiwa piae doturitera. edo bibinei ondewo idegore. Ango edo gao arida mina piari ganu awa benunu teove. God mi imomane tepo kondade esisina, awatedo embomai tepo kondade ewo. 9-10 Embo avekave inemane kondade awa, awamanemi imomane mina kondade orote tena, awatedo gold ta silver ta copper† gold ta silver ta copper. Iji angode Iesu mi Israel ainda isima edo esisina, Jew embomaimi ganu gold mi ari, silver mi ari, edo copper mi ari jigamo edo roviravi oriedo esitera. ri itomane bupuri ipuda ainda jido kundo aimbove. Iji ainde imomane pepeta erido kaita da (1) jiove. Edo ombari tote (2), ta tai woru nenei, ta ketu nei ri awa jiove.
11 “Edo imomane maundo nasi bajina ko nasi saka nonda torido gido, ainda embo dave awa kakowa edo tamundo yai ainda matawa isimango buro itae edo idegewo. 12 Edo iji nonde imomane mando da (1) totoreite gido awamaneda yai ategari davemi piewo. 13 Edo mando ainda embomaimi imomane ategesite dave baro gido, inemane benunu tewo God mi ainda béga awamaneda yai piarate tena. Ata ango ainyae gido, God mi ainda béga awamaneda yai piainyae, ata itomane yai piaina. 14 Edo yai ainda embo ainkain imomane ategesite bae aina gido, ko itomane ge ingae aina gido, mando ko nasi bajina awa dodo maunteite konipo tai itomaneda awa denden ewo. 15 Eiwa gebé imondemane tena, iji ainde God embomai berari kataina, rirowa awa emi nasi bajina embomai ainkain itomane ge ajiregetera da yai piaina awa, Sodom ae Gomora nasi embomai deda rirowa awa daginegaina.
Aindabé itomane gebé ari nato yai pipisitewa, embomaimi memesi neide kainde itomane yai piara.
(Mark 13:9-13; Luke 21:12-17)
16 “Giwo! Nane imomane pieteno wo sipumane ango idegedo abu sino goroba deda toropuda auntewa. Awatedo dá jimangomi gidogogo edo ima era, ango ewo. Edo dá ni ribo beyae itaede ango ewo. 17 Ata embomai dave edo goteite iwo! Awamanemi imomane kundo katari emboboda ipada piara, edo imomane awamaneda benunu oro doda vedara. 18 Aindabé itomane gebé ari nato yai pipisitewa, awamanemi imomane katain kundo gavana mane ae daotegeregari deda dombuda mambara. Ango edo imomane nato bino dave awamane ae Gentile embomai deda yai karigawo gara. 19 Ata iji nonde imomane awamaneda ipada piaro, God mi imondemane ge ro tavi awa piari tawa. Awatedo ge ro tavi ko nongo tavi, ainda kotembari jiwaemi do buriya eure. 20 Ge awa inemane akuta tae, ata Mamo itomaneda Asisi mi imomane gisijijieiari ge tawa.
21 “Edo nanonamejimi awamaneda nanonameji awa katari emboboda yai piaro betarida piara, edo daedo mamonomi awamaneda mamai awa betarida piara. Edo mamaimi awamaneda aimamo ajiregedo awamaneda gitopo emboda ipada piaro daro betara. 22 Aindabé itomane gebé ari nato yai isira, embo berarimi imondemane sinigambari ara. Ata embo da ainmi ainda gebé ari nato yaida piedogogo aina, edo imo iji beao arida matawa ango mamaina awa, God mi toregaina. 23 Edo iji nonde embomai nasi bajina da (1) ainda ami memesi neide kainde itomane yaida piaro gido, erido dodo nasi bajina neida burigibé mambuwo. Eiwa gebé imondemane tena, Embo da Mai gumbae gisida awa imomane Israel da nasi babain awa torido idegedo itae ae isiawo gumaina.
24 “Ambodanida dero awa ainda atopatarida dero tuda, edo buro emboda dero awa ainda badarida dero tuda. 25 Edo embomaimi ambodani sima edo era dá ango ainda atopatari sima edo era gido, ambodani awa dubodave arate, ko embomaimi buro embo sima edo era dá ango ainda badari sima edo era gido, buro embo awa dubodave arate. Edo awamanemi mandoda mamo awa dao Beelzebul‡ Beelzebul awa Satan da dao nei. tetera gido, awamanemi ainda orobeda embomaide ge bebegae jiwae daginegedo tara!
God adu ewo, ata embomai adu eove.
(Luke 12:2-9)
26 “Rorae berari apuregari isira awa God mi ari arapa aina, edo rorae berari onjigarida awa arapada piari gara, awatedo embomai adu eove. 27 Edo ge ro berari imondemane muyaeda tedo ena awa inemane ijida pararada tewo. Edo daedo ge ro berari imondemane pisipasi teono ingido ewa awa, nasi arapada petedo karigewo. 28 Embomaimi tamo daro betaina, ata asisi daro betari tao ae, awatedo awamane adu eove. Awarata God mi asisi ae tamo de awa yai beyae niyao matawa itari aveira ainda usibesi ari tao. Awatedo God adu ewo. 29 Inemanemi ni suriri tote (2) awa ganu saka§ ganu saka da tega awa 60 toyea ango. mi oriedo ewa. Edo ni suriri dabé awa butuda durudo betari tao ae, ata Mamo itomane awa gari. 30 Ata itomane kopuru tu berari awa God da ajijigarida isira. 31 Awatedo adu eove. Itomane tega God da jisida awa ni suriri jiwae daginegari.
32 “Awatedo embo ainmi emboda doda petedo imo awa nato ambodani taina gido awa, nane Mamo nato utuda doda petedo, embo awa nato ambodani tana. 33 Ata embo ainmi emboda doda petedo, imo awa nato ambodani ae taina gido awa, nane Mamo nato utuda doda petedo, embo awa nato ambodani ae tana.
Iesu mi béga butuda kundo gumain gumbae, ata embomai evekara ain gupusina.
(Luke 12:51-53; 14:26-27)
34 “Edo nane béga kundo gumain butuda guputena kotembeove. Na béga kundo gumain gumbae ata kasiwo.* kasiwo. Eiwa awa duduno ari rorae ji demo tote (2). 35 Na guputena awa embomai kundo evekara ain, awatedo
“ ‘embo ae ainda mamo de mina mina ara,
edo gagara ae ainda ai de mina mina ara,
edo mai aro ae ainda imbosi de mina mina ara.
36 Edo emboda gitopo embo awa ainda orobeda edo idegara.’ Micah 7:6
37 “Embo ainmi mamo ko ai na daginegedo dubobudo eira awa inono ae nato yai, edo nato ambodani ari tao ae. Edo embo ainmi mai ko gagara na daginegedo dubobudo eira awa inono ae nato yai, edo nato ambodani ari tao ae. 38 Edo embo ainmi ainda orega† orega awa inguta babain tote (2) oregedo jiari. Buriya embo awa orega ainda pioro duroro benomami ipatai deoro ingutada takimboro jioro erido petedo isite deguta tote (2) ta tamonde (3) itae euri awamane betora. Ata ge orega einda awa kariwa ge. Ainda moka awa memesi neide kainde awa Iesu da kera ari embomaimi kundo maundo ara, iji angode awamane Iesu da jipapa akuta ambo ambo edo era. kundo na ambo ambo ae awa inono ae nato yai, edo nato ambodani ari tao ae. 39 Embo ainmi ainda wasiri butuda tamaina awa, dadoegaina. Edo embo ainmi ainda wasiri butuda na awaembo dadoegaina awa, wasiri natopo itari tamaina.
God mi tau dave ainda buro embomaida yai piaina.
(Mark 9:41)
40 “Embo ainmi imomane ategeteite budo eira awa na budo eira. Edo embo ainmi na ategeteite budo eira awa, embo na piesiri guputena awa budo eira. 41 Embo ainmi peroveta ategeteite budo eira aindabé embo awa peroveta awa, perovetada tau awa baina. Edo embo ainmi embo wasiri dambu darari ategeteite budo eira aindabé embo awa wasiri dambu darari awa, embo wasiri dambu dararida tau awa baina. 42 Edo embo ainmi eiwamane babaingae einda da (1)de un damodamo akou da (1) piaina aindabé embo awa nato ambodani, eiwa gebé imondemane tena, God mi tau embo ainde piaina.”
*10:2 aposil awa Guriki da ge apostolos edo gumbari. Ainda moka awa ‘piari mambari embo’. Iesu mi tuturoda ainda ambodani doda embobo 12 ainda aposil mane avigesisina (Matthew 10:1-8; Luke 6:12-16). Embobo eiwamanemi Iesu de daedo isite maundo gundo eiworo Iesu mi awamane atopasido esisina. Iesu mi awamane piesiri maunsitera embomai gao aro kaviegorote, edo ainda bino dave karigorote sisina.
†10:4 Keina Embo da moka awa embo Keina nasida edo gumbari, o Rome da gisijijiegari awa jipapa ae ari embo (Luke 6:15 edo Iwata Ari 1:13 giwo.).
‡10:7 Utuda gisijiari aikae esira. Kondade ari ge Matthew 3:2da tuda giwo.
§10:8 dono itae are. Karu emi euri embomai donode God da jisida idegotora. Awatedo, edo awamaneda karu itae aina, awamaneda dono God da jisida itae aina. (Leviticus 13:1-46).
*10:8 edo betari awa jiwo erore. Ge eiwa awa davebé, ata Guriki da ove gaiari mamatu jiwae ge eiwa piae doturitera.
†10:9-10 gold ta silver ta copper. Iji angode Iesu mi Israel ainda isima edo esisina, Jew embomaimi ganu gold mi ari, silver mi ari, edo copper mi ari jigamo edo roviravi oriedo esitera.
‡10:25 Beelzebul awa Satan da dao nei.
§10:29 ganu saka da tega awa 60 toyea ango.
*10:34 kasiwo. Eiwa awa duduno ari rorae ji demo tote (2).
10:36 Micah 7:6
†10:38 orega awa inguta babain tote (2) oregedo jiari. Buriya embo awa orega ainda pioro duroro benomami ipatai deoro ingutada takimboro jioro erido petedo isite deguta tote (2) ta tamonde (3) itae euri awamane betora. Ata ge orega einda awa kariwa ge. Ainda moka awa memesi neide kainde awa Iesu da kera ari embomaimi kundo maundo ara, iji angode awamane Iesu da jipapa akuta ambo ambo edo era.