12
Kolomong-Auli 12 Oliu Krais-nga Yambuma Kangi Tiluele Molemuláliinga Kimbu Kima Mele Pulu Yili-nga Minéle-ni Oliu Moke Tepa Silimáliinga Ung Te
12:1-11 Pulu Yili-nga Minéle-ni ‘Pulu Yili-nga Uluma Oliu Lupa-Lupa Teamili.’ Nimba Tonduluma Lupa-Lupa Moke Tepa Silimú Ung Te
1 ⸤Kapula,⸥ angmene, Pulu Yili-nga Mini Kake Tiliele-ni Krais-nga yambuma tonduluma moke tepa silimáliinga ⸤pepá toku siring pepána walsiku piliiringeliinga ekupu ung te pundu topu ‘Mini Kake Tiliele-ni silimú tonduluma⸥ mimi-siku piliangi.’ nimbu akuma eni nimbu sambu:
2 Eni ui Krais-nga yambu-talapena ulsu muluring kene ⸤yi mare-ni⸥ eni gólu toku mani siring kene ‘Sika’ niku piliiku kene eni lawa teku, méle ung naa nili we-mélemandu ‘Ima oliu nokolemele pulu yambuma.’ niku mélema popu toku kalku, ulu akuma ui tiring mele piliilimili. 3 Akiliinga, eni ung te aima piliangi, nimbu sambu: Pulu Yili-nga Minéle-ni ambululemú yambu te-ni “Yesos molupa kis-sipili.” aima kapula naa nimbá. “Yesos yu Auliele.” nilimele akili we naa nilimeleko. Mini Kake Tiliele-ni ambululemú yambuma-ni mindi “Yesos yu Auliele” nilimele. Akili piliai!
4 Minéle-nga we silimú tondulu lupa-lupama pelemú akiliinga-pe silimú Mini tiluele mindi. 5 Auliele-nga kongun oliu-ni tenjilimulu kongun lupa-lupama pelemú akiliinga-pe ⸤“Kongun teai.”⸥ nilimú Yi-Auli tiluele mindi molemú. 6 Kongun telemulu tondulu lupa-lupama pelemú akiliinga-pe tondulu akuma pali yambuma silimú Pulu Yili tilu mindi molemú.
7 ⸤Krais-nga yambuma pali⸥ ‘Anju-yandu liiku tapunjangi.’ nimba Minéle-ni oliu tonduluma lupa-lupa moke tepa silimú.
We naa silimú. 8 ⸤Akili i-sipa mele:⸥
Ungma apurupa sumbi-sipa nimba kunjuli tondulale Minéle-ni yambu te silimú.
Pulu Yili-nga ulumanga puluma piliipa kungnjuli tondulale Mini tilu akili-ni mindi yambu te-ko silimú.
9 ‘Pulu Yili mawa tembu mele aima sika temba.’ nimba tondulu mundupa piliili tondulale Mini tiluele-ni-ko yambu te silimú.
Kuru tomba yambuma tepa kaí tili tondulale Mini tiluele-ni-ko yambu te silimú.
10 Ulu-tonduluma tili tondulale yambu te sipa,
Pulu Yili-ni “Ninjui!” nimba ung nimba silimúma piliipa yambuma nimba sili tondulale yambu te sipa,
Minéle-nga ungma kene uluma kene, kurumanga ungma kene uluma kene, piliipa mimi-sipa apuruli tondulale yambu te sipa,
bo-ung lupa-lupama naa piliipa we walu-sipa lili tondulale yambu te sipa,
bo-ung lupa-lupa we walu-sipa lili ung kanuma piliipa ⸤‘Yambuma piliangi.’ nimba⸥ topele topa nimba sili tondulale yambu te sipa,
⸤aku-sipa tondulu lupa-lupama Mini tiluele-ni moke tepa⸥ silimú. 11 Tondulu akuma pulele akiliinga-pe Mini tiluele. Tondulu akuma pali Mini tiluele-ni mindi tenjilimú. Yu-yunu numanale-ni piliipa tonduluma moke tepa yambuma lupa-lupa silimú.
12:12-31 Kangi Tilueliinga Kimbu-Ki Méle Pulele Angiliimú Mele Oliu Aku-Sipu Molemulu Ung Te (12:1—13:3,8-9, 14:1 pali)
12 ⸤Minéle-ni tondulu lupa-lupama yambuma lupa-lupa moke tepa silimáliinga pulele i-sipa mele:⸥ Kangiele kimbu-ki méle pulele angiliimú akiliinga-pe kangi tiluele. Sika kangieliinga kimbu-ki méle pulele angiliimú akiliinga-pe méle akuma liipa tere lepa kangi tiluele. Krais yu aku-sipako molemú. ⸤Yu kangi tiluele akiliinga-pe méle pulele. Yunga kangieliinga mélema oliu.⸥ 13 Oliu Juda-yambuma kene, Juda-yambu naa molku ulsukundu molemele yambuma kene, méle kaluli naa liiku kongun we tinjili kendemande-yambuma kene, yambu te-ni naa nokupa eni-enini we molemele yambuma kene, oliu pali ‘Enini yambu kangi tiluele molangi.’ nimba Mini ⸤Kake Tili⸥ tiluele-ni mindi no liinjirim. ⸤Pulu Yili-ni⸥ ‘No mele nangi.’ nimba sirim nurumulu Mini tiluele mindi ⸤oliunga pali numanuna molemú⸥.
14 Oliu piliilimulu, kangiele yu méle tiluele mindi mólu. Yu méle aima pulele liipa tere lepa kangi tiluele. 15 Akiliinga,
kimbele-ni nimba mele: “Na kili mólu akiliinga na kangieliinga méle te mólu.” nilkanje yu kangina angiliimáliinga yu kangieliinga méle te we naa angiliilkaye? ⸤Kimbele-ni aku nilkanje kepe yu kangina naa angiliimba kupulanum te wendu naa olka.⸥
16 ⸤Mola⸥ kumale-ni nimba mele: “Na mongale mólu akiliinga na kangieliinga méle te mólu.” nilkanje yu kangina angiliimáliinga yu kangieliinga méle te we naa angiliilkaye? ⸤Kumale-ni aku nilkanje kepe yu kangina naa angiliimba kupulanum te wendu naa olka.⸥
17 Kangiele pali mongale mendepulunje kangiele-ni nambi-sipa ungma piliilkaye? Kangiele pali kumele mendepulunje kangiele-ni nambi-sipa mélemanga murama piliilkaye?
18 Akiliinga-pe ⸤kangiele pali aku-sipa mólu.⸥ Pulu Yili-ni ‘Kangina mélema angiliipili.’ nirim-ma yunu ‘I-sipa i-sipa angiliipili.’ nimba numanale-ni piliirim mele “Angiliipili.” nirim. ⸤Kangieliinga mélema we walu-sipa naa angiliimú.⸥ 19 Kangieliinga méle tiluri mindi angiliilkanje yu sika kangi te mólu. 20 Akiliinga-pe kangiele aku-sipa mólu. ⸤Kangina⸥ kimbu ki méle pulele angiliimú akiliinga-pe liipa tere nimba yu kangi tiluele.
21 ⸤Akiliinga,⸥ mongale-ni kilindu nimba mele: “Nu naa molkenanje na-nanu molupu konjulka.” manda naa nilka. Pengale-ni kimbelendu “Nu naa molkenanje na-nanu kapula molka.” manda naa-ko nilka.
22 Akiliinga-pe aku-sipa mólu. Kangieliinga méle angiliimúmanga mare piliipu kene ‘Akuma ulu te mólu. Akuma-ni kongun tondulu te naa telemú.’ nimbu piliilimulu mélema naa angiliilkanje kangiele aima kapula naa molka. 23 Kangina angiliimú méle mare ‘Méle kaíma mólu.’ nilimuluma mimi-sipu nokulemulu; ‘Kanupu kaí naa piliilimulu mélema.’ nimbu ‘Mokeringa angiliilkanje oliu pipili telka.’ nilimulu mélema mimi-sipu panda tolemulu; 24 kangieliinga méle mare ‘We angiliimba kene ulu te mólu.’ nimbu panda naa topu ‘We lipili.’ nimbu kelelemulu. ⸤Aku-sipu kangieliinga mélema lupa-lupa piliipu apurupu telemulu⸥ akiliinga-pe kangina angiliimú mélema pali Pulu Yili-ni ‘Tere leku angiliangi.’ nirim. Kangina méle mare ‘Bi naa mulúlima.’ nilimele akuma Pulu Yili-ni ‘Aima kumbina mulupili.’ nirim. 25 ‘Kangieliinga mélema pula toku lupa-lupa ele-tu naa angiliipili. Anju-yandu tilu-siku nokuku molangi.’ nimba ⸤Pulu Yili-ni ‘Kangieliinga mélema pali kapula-kapula angiliipili. Te bi mululi, te bi naa mulúlima mólu.’⸥ nirim. 26 Kangieliinga méle te buni telemú mola mindili nolemú kene kangieliinga mélema pali buni tipili mindili noku molemeleko. Kangieliinga méle te kape nilimele kene kangieliinga mélema pali méle kanili kene wasie numanu siku molemeleko.
27 Kapula, ⸤kangielendu nikereliinga ung te enindu niambu:⸥ Eni pali Krais-nga kangiele; eni lupa-lupa kangi kaniliinga mélema. 28 ‘Krais-nga yambu-talapeliinga kongun teangi.’ nimba Pulu Yili-ni yambuma tondulu lupa-lupama sirim.
Yesos-ni “Nanga kongunale tenji-pai.” nimba liipa mundurum yima Pulu Yili-ni ui kumbi-lepa makó topa ‘Aku-siku molangi.’ nimba,
tale-sipa yu-ni “Ninjai!” nimba ung nimba silimúma piliiku yambuma niku silimele yambuma makó topa ‘Aku-siku molangi.’ nimba,
yupuku-sipa ⸤ungma mimi-siku piliiku⸥ yambuma ung-bo tonjuku mani silimele yambuma makó topa ‘Aku-siku molangi.’ nimba,
pe ⸤Pulu Yili-ni mindi manda telemú mele⸥ ulu-tonduluma telemele yambuma makó topa ‘Aku-siku molangi.’ nimba,
kuru tolemú yambuma teku kaí tinjilimele yambuma makó topa,
yambuma liiku tapunjulemele yambuma kene,
kongun lupa-lupama nokuku konjulemele yambuma kene,
bo-ung lupa-lupa naa piliilimilima we walu-sipa lelemele yambuma kene,
akuma pali makó topa ‘Aku-siku molangi.’ nimba ⸤aku-siku sumbi-siku teku mulungí tonduluma eni lupa-lupa moke tepa sirim⸥.
29 Yambu akuma pali Yesos-ni “Nanga kongunale tenji-pai.” nimba liipa mundurum yima molemeleye?
Mola akuma pali Pulu Yili-ni “Ninjai!” nimba ung nimba silimúma piliiku yambuma niku sili yambuma molemeleye?
Mola akuma pali ungma ung-bo tunjuli yambumaye?
Mola akuma-ni pali ulu-tonduluma telemeleye?
30 Mola yambu akuma pali kuru tolemú yambuma teku kaí tinjingí tondulale pelemúye?
Mola akuma-ni pali bo-ung lupa-lupa naa piliilimilima kapula we walu-sipa lemeleye?
Mola yambu akuma-ni pali yambu mare-ni bo-ung lupa-lupa we walu-sipa nilimele ungma sumbi-siku piliiku ⸤‘Yambuma piliangi.’ niku⸥ topele toku yambuma niku silimeleye?
⸤Aima mólu. yambu tiluele-ni mindi uluma pali kapula naa telemú.⸥ 31 Akiliinga-pe ‘⸤Mini Kake Tiliele-ni⸥ tondulu moke tepa we silimúmanga te liambu.’ niku piliiku kene ⸤yambuma⸥ olandupa ⸤liipa tapunjilimú⸥ tonduluma eni tondulu munduku ‘Aima liamili.’ niku numanu kimbu-siku molai.
12:31—13:13 Oliu ⸤Yambuma⸥ Numanu Monjumuláliinga Ung Te (12:27-31 kene wasie kanui)
⸤‘Tondulu olandupa akuma liamili.’ níngi lem kapula akiliinga-pe⸥ ekupu na-ni eni ulu aima kaí olandupale teku mulungí mele nimbu simbu teker.