8
Yaubada ena Foyafoyahimiu au Nuwatuhui
Diutelonomi 8:2-3
2 Au nuwatuhui sidohana Guyau emi Yaubada eda lofalofa yai ena foyafoyahimiu nuꞌu pitapitalina yai, bolima 40 mulidi yai. Ya nuwa lidilidiyemiu yo ya lau itamiu, be haba emi nuwanuwatuhu ya sibaidi. Ena laugagayo haba ami lau watanidi, e higeꞌe?
3 Ya faꞌanguliyammiu be haba ami nuwa lidilidi. Habahim, mena yai ya fakalahemiu. Mena te, beyabeyana ma afa wahamiu hige au sibai, be hige au anꞌanniꞌi.* Mena mate Isalaela adi kalahe Guyau ya feledi nuꞌu pitapitalina yai. Hebelu alinadi yai, mena aniyona mate “Ite somo?” (Auꞌaulaha 16:15)
Doha ite ya ginauli, paꞌana bena ya fatalahamiu, mate dodoga ibege anꞌan ai lisina ibona ti mwahumwahuli, na Guyau ena liba moho, ai lisina haba sa mwahuli. (Matiu 4:4; Luka 4:4)
Guyau Tabu au Nuwa Afulen
Diutelonomi 8:11-18
11 Au itaꞌita komakoman!
Tabu Guyau emi Yaubada au nuwa afulen,
na tabu ena laugagayo somo E falibamiu lahai ite,
au nuwa afuledi.
12 Yena ami andan be bogamiu sa yahayaha,
yo luma loholohodi ami lau ginauli be ami gogoidi.
13 Yo yena emi bulumakau, gouti, sipi,
emi siluba yo gole sa ouli wananaha,
yo ginauli mahudoꞌina lisimiu yai, sa ouli heyaya,
14 au itaꞌita komakoman! Nuwa saesae ibe i tanuwagaimiu,
be Guyau emi Yaubada au nuwa afulen.
In logena, Idipi nuꞌuna yai ya foyahimiu,
yo lau fayofayo yai, ya fofofahimiu.
15 Tabu au nuwa afulen!
Ya foya lawemiu nuꞌu laꞌilaꞌina pitapitalina fatau ꞌwasaꞌwasabuna yai.
Amainiya mate weso anꞌanlewadi yo kalanadenade.
Nuꞌuna ya fagado magu, hige hoꞌowa!
In moho, Guyau umeꞌehu yai hoꞌowa ya fadidiyama. (Namba 20:11)
16 Ya fakalahemiu mena yai, nuꞌu pitapitalina yai. Mena te beyabeyana afa wahamiu hige ti anꞌanniꞌi. Guyau doha ite ya ginauli lisimiu yai; ya nuwa lidilidiyemiu yo bena ya lau itamiu, be ai ofiꞌofina haba loholoho ya leyawa lisimiu.
17 Haba auwen,
“Egu gigibwali yo egu adidili yai, egu gogo E fatubudi.”
18 In moho, Guyau emi Yaubada au nuwatuhui paꞌana In, logena, ya faꞌadidilimiu be emi gogo ami fatubudi. Yo fede, ena yali ya fawananaha lisimiu yai, doha haꞌa ya fawananaha afa wahamiu lisidi yai.
*8:3 Mena mate Isalaela adi kalahe Guyau ya feledi nuꞌu pitapitalina yai. Hebelu alinadi yai, mena aniyona mate “Ite somo?”