20
Hoꞌowa ya Didima Umeꞌehu yai
Namba 20:1-13
1 Nawalahi bwaꞌibwaꞌina ganahewana yai, Isalaela dodogadi mahudoꞌidi sa mahano nuꞌu pitapitalina hesa yai hesana Diyin, be Kadesi yai sa miya. Amainiya, Miliyam ya peꞌi be sa boꞌusai.* Diusi edi bolima ai Mati o Epolo ya fatubu.
2 Nuꞌuna yai ni, hige adi hoꞌowa, be sa faꞌoiꞌesega na Mose yo Elon sa fawaiyunuꞌidi. 3 Sa fatalapili tiyen,
Fuyanna afa haidamai sa peꞌi, Guyau matana yai, egoba haꞌa ꞌe peꞌi! (Namba 16) 4 Sidohana be ai, Guyau ena dodoga, wa foyahimai nuꞌu pitapitalina yai te? Be haba ꞌe peꞌi aiteꞌi maꞌemai yosiyosi? 5 Amainiya hige hoꞌowa, yo hige witi, figi e wain e pomaganata. † pomaganata mate fuwafuwa hesa ya amna yo ya ipu. Na figi mate doha kuhou. Sidohana be Idipi yai wa abimai, be wa foyafahimai be wa lawemai nuꞌu heyaheyayana yai te?
6 Mose maꞌena Elon dodoga sa lau afuledi, be sa lau Aba Oiꞌoigogo Gwaꞌuna luhuluhu launa yai, sa hoba lidi, na Guyau ena namanamali ya taumahata lebedi yai. 7 Habahim, Guyau ya libalau Mose lisina, iyen,
8 Fuya ouꞌouli tuꞌe wa fafapaisowa mate u abi, na um yo Elon, dodoga au faꞌoigogo esegahidi. Be umeꞌehu laꞌilaꞌi ni u faliba dodoga ai matadi. Haba hoꞌowa ma alu babadana ya didima, be dodoga yo yosiyosi adi sa nom.
9 Yo fede, Mose tuꞌe ya abi, doha haꞌa Guyau ya fatalahaꞌen. 10 Mose maꞌena Elon dodoga sa faꞌoigogo esegahidima umeꞌehu sadaina yai na Mose iyen,
Tau kawayagala, au ataꞌatahi! Ai umeꞌehu te bena hoꞌowa ami ꞌe leyama?
11 In moho, Guyau alinana hige i lau watan be tuꞌe ya lau hitiꞌi, be umeꞌehu yai ya oitagu, ma luwaga, yo fede hoꞌowa ma alu babadana ya didima, be dodoga yo edi yosiyosi sa nom.
12 In moho, Mose yo Elon Guyau ya liba suꞌuidi iyen,
Hige au sunumaꞌegu be Isalaela dodogadi matadi yai hige egu gigibwali tabuna au kawawananahaꞌen. Logena, tanohi haꞌa E liba fasunuma bena enehemiu, ibege um Mose u foyahi lawedi ainiya.
13 Meliba Hoꞌowadi‡ Melibaaniyona mate fatalapili. yai te amainiya Isalaela dodogadi sa fatalapili lau Guyau lisina be amainiya Guyau ena fatabu, dodoga ya faꞌitadi. (Hebelu 3:8)
Elon ena Fuya Peꞌi
Namba 20:23-29
23 Holai Tuꞌana yai, Idom Nuꞌuna sigasigana sadaina yai, Guyau ya libalau Mose yo Elon lisidi yai iyen,
24 Tanohi haꞌa E liba fasunuma bena enehemiu mate Elon ibege i lau niya. Haba ya peꞌi paꞌana Meliba nuꞌuna yai tataumiu luwaga egu liba ami moꞌa peiyen. 25 Elon ma natuna Eliyesa u foya hasaedi Holai Tuꞌana. 26 Na amainiya, Elon ena antalasam lelidi u unufahidi be Natuna Eliyesa u faluhufi. Ai tuꞌana haba Elon ya peꞌi.
27 Guyau somo ya libaen mate Mose ya ginauli watan. Holai Tuꞌana sa finahe, Isalaela mahudoꞌidi matadi yai. 28 Tuꞌa hewana yai, Elon ena leli Mose ya wunufahidi be Eliyesa ya faluhufi. Amainiya, Elon ya peꞌi na Mose maꞌena Eliyesa sa leta fuyo lidi. 29 Fuyana dodoga mahudoꞌidi, ena peꞌi wasana sa atahiyen mate halana sa tan nawalahi esega.