18
Mose Isalaela ya liba fasibasibaidi, otana.
Abi Ginauli yo Ayahan
Diutelonomi 18:9-14
9-11 Yena ami lau tanohi Guyau emi Yaubada ya felemiu ai lisina, tabu nuꞌudi ni edi laulau heyaheyayadi au laulauwedi:
Tabu sai laꞌi, natuna i antalasamen ai oyagi alaꞌalana,
Tabu sai laꞌi, nesu itaꞌita i fapaisowadi be doga i fagilu yo i fakasa.
Tabu sai laꞌi fafaꞌilala i fapaisowadi be somo haba ya tubu ai fuya matada ena aba siba.* Tabu sai laꞌi ataiꞌa edi gwanegwane yai, yo nawanawa edi malamala yai, yo kalele e dagugu ai tanaꞌai ti nuwatuhui bena fafaꞌilala hahaisa. Au itaꞌita lau Diyemsi 4:13-15, “Yena Guyau ena nuwatuhu doha, haba ꞌe abi doha ite, e doha mate,” hige doha fafaꞌilala moho.
Tabu sai laꞌi i ayahan e i kalawan.
Tabu sai laꞌi i abi ginauli,† Fafaꞌoyowa, kaukauli, e gabu; waihin yo taumoho, pelei, aiheya, failako yo ginaulidi hahaisa boludi.
Yo tabu sai laꞌi i lau dodoga peꞌipeꞌi lebedi, be i fatiꞌo lau onaꞌahanadi lisidi.
12 Sai yena laulau te ya ginaulidi mate, sa heyaya wananaha Guyau emi Yaubada lisina yai, be laulau te, debadi yai haba Guyau emi Yaubada nuꞌu ni dodogadi, ai nuwanuwamiu ya fageladi.
13 Tabu Yaubada somo hesa ai lisina i fagilumiu.
14 Dodogadi ni, sa ataꞌatahi lau, ayahan lebedi, yo fafaꞌilala sa fapaisowadi be doga sa fagilu yo sa fakasa. In moho, edi tanohi begana haba ami abi. Na Guyau emi Yaubada ya laugagayoꞌemiu, be tabu bena edi laulau te, au laulauwedi.
Yaubada Haba Peloweta Hesa ya Fatamaliyama
Diutelonomi 18:15-22
15 Guyau emi Yaubada haba peloweta hesa doha yau, ai ganahewamiu ya faꞌobiyo; na bena ami ataꞌatahi lau lebena. (Paisowa 3:23; 7:37; Diyon 1:24)
16 Fuyana ami faꞌoigogo Holebi yai, Guyau emi Yaubada ami anꞌanꞌetai doha ite, auwen,
Tabu Guyau ema Yaubada alinana ai atahi e oyagi ala balebalelemna ai ita fuyo. Doꞌata ꞌe peꞌi! (Auꞌaulaha 20:18-21; Hebelu 12:18-21)
17 Guyau, ya falibagu, iyen,
Somo sa libaen mate ya loholoho.
18 Peloweta hesa haba E faꞌobiyo doha um, hidamiu hesa, ai ganahewamiu; ginauli mahudoꞌina E faliba haba ai moꞌana ya falibamiu.
19 Guyau iyen,
In, haba ai hesagu, ya libaliba na yena sai hige i lau watan, haba E panisi. (Diyesuwa 2:19; Paisowa 18:6)
20 Yena peloweta hesa, in iyabona, hesagu yai ya libaliba, na Yau hige ya faliba, bena sa wunui, yo peloweta hesa yaubada hahaisa ai hesadi ya libaliba, mate hinaga bena sa wunui. (Paisowa 19:15-16)
21 Nuwana, ami nuwanuwatuhu, auwen,
Sidohana haba ꞌe siba mate, wasa te hige Guyau lisina yai i laoma?
22 Yena peloweta Guyau ai hesana somo ya libaen, na hige i tubu mate wasa ni, hige Guyau lisina yai i laoma. Peloweta ni, iyabona ena nuwatuhu yai ya libaliba; tabu au ꞌwasabuwen. (Diutelonomi 13:1-5; Maleko 13:21; 1 Diyon 4:1)
*18:9-11 Tabu sai laꞌi ataiꞌa edi gwanegwane yai, yo nawanawa edi malamala yai, yo kalele e dagugu ai tanaꞌai ti nuwatuhui bena fafaꞌilala hahaisa. Au itaꞌita lau Diyemsi 4:13-15, “Yena Guyau ena nuwatuhu doha, haba ꞌe abi doha ite, e doha mate,” hige doha fafaꞌilala moho.
†18:9-11 Fafaꞌoyowa, kaukauli, e gabu; waihin yo taumoho, pelei, aiheya, failako yo ginaulidi hahaisa boludi.