14
Yesu Oilibana
Maleko 14:1-2
(Matiu 26:1-5; Luka 22:1-2; Diyon 11:45-53)
1 Lahai luwaga moho haba Bayawa yo Fwalawa Fafayisti Gesana Anꞌangogodi.* Bayawa mate “pasowa mataꞌasina” yo Fwalawa Fafayisti Gesana Anꞌangogona fafaꞌilalana. (Auꞌaulaha 12)
Tau antalasam babaꞌisadi yo laugagayo tau lau faꞌataendi, edaꞌeda sa yoꞌo bena bwalabwala yai haba Yesu sa tohai be sa wunui. 2 Tiyen,
Tabu anꞌangogo yai ta ginauli. Doꞌata dodoga te eli fasifasinadi be lulu sa fatubu.
Betani yai Waihin Hesa Yesu ya Famaꞌi
Maleko 14:3-9
(Matiu 26:6-13; Diyon 12:1-8)
3 Betani nuꞌuna yai Yesu ya kalakalahe lepela dogana hesa hesana Saimon ena luma yai. Waihin hesa maꞌi panepanena hesana nada, maisana ya laꞌi ya abi, na ya luhuma luma yai. Maꞌi botolona gadona ya dem pwai na ya fagoi Yesu bolobolona yai.† Maꞌi panepanena te hesana nada hige amaiteꞌi, na umeꞌehu hudoꞌi hesana alabasta yai botolona sa ginauli. 4 Dodoga haisa amainiya sa fatalapili tiyen,
Sidohana be maꞌi panepanena ya anfagofafogo elaꞌen?
5 Yo fede sa fafatala pili tiyen,
Ibe te uneꞌuneyen mate maisana laꞌina doha doga esega ya paisowa bolima esega, na maisana haba tau gogo gesagesa felendi.
6 In moho Yesu iyen,
Sidohana be ami mode lisina yai? I otawa. In laulau loholohona ya ginauli lisigu yai. 7 Tau gogo gesagesa fuya ouꞌouli maꞌemiu, na lahai hesa - hesa haba ami saguhidi. In moho, Yau ibege fuya ouꞌouli maꞌemiu. 8 Waihin te, somo gonowana ya ginauli, ya ginauli watan, be taugu ya famaꞌi nonohai, na habahim toletoletau lahaina. 9 E faliba dudulaimiu mate tanoꞌubu mahudoꞌina yai somo yai wasa loholohona sa lauguguyaꞌen, mate waihin te somo haꞌa ya ginauli wasana haba sa fafanuwa hitin.
Diudasi ya Tauꞌulu be Yesu Ana ya Wewe
Maleko 14:10-11
(Matiu 26:14-16, Luka 22:3-6)
10 Habahim Diudasi Isakaliyoti, in mate tau famuli wata safuhudohudoꞌi luwaga hesa, ya aulaha ya lau tau antalasam babaꞌisadi lisidi, be Yesu ana ya wewe. 11 Ena nuwatuhu ya falibadi, yo fede nuwadi sa amna be sa liba fasunuma mate moni haba sa felen. Habahim Diudasi ya fatubu edaꞌeda ya yoꞌo.
Bayawa Anꞌangogona Abi Nonohana
Maleko 14:12-21
(Matiu 26:17-30; Luka 22:7-14, 21-23; Diyon 13:21-30)
12 Fwalawa Fafayisti Gesana Anꞌangogona lahaina bwaꞌibwaꞌina yai sipi sa lau funuhidi be Bayawa Anꞌangogona sa abi nonohai. Yesu ana hewahewali sa fatiꞌoi tiyen,
Haba ꞌe lau ai somo, Bayawa Anꞌangogona ꞌe abi nonohai? (Auꞌaulaha 12:3-11)
13 Yo fede Yesu ana hewahewali luwaga ya fatalahadi iyen,
Au lau taon yai taumoho hesa hoꞌowa leduna ya bahebahei haba ya lobahimiu. Au lau watan, 14 be luma tausomo ainiya ya luhulau, tanuwagana au faliba auwen,
“Tanuwaga ya fatiꞌo mate: ‘Maꞌagu hewahewali, Bayawa Anꞌangogona Ai bili tausomo haba ꞌe kalahe?”
15 Bili laꞌilaꞌi hewa yai haꞌa sa faꞌaꞌa nonohai haba ya faꞌitamiu. Ainiya eneheda, au abi nonoha.
16 Yo fede ana hewali luwaga sa aulaha sa lau taon yai be somo Yesu ya fatalahadi sa itadi. Amainiya Bayawa Anꞌangogona sa abi nonohai.
17 Maimailafina Yesu maꞌana hewahewali safuhudohudoꞌi luwaga sa mahanoma aba kalahe yai.
18 Yesu iyen,
E falibamiu mate sai esega ganahewamiu yai, haba agu ya wewe. Dogana maꞌeda te kalakalahe.
19 Nuwadi sa heyaya be esega - esega sa fatiꞌo lau Yesu lisina, tiyen,
Bena yau?
20 Yesu alinadi ya bui iyen,
Safuhudohudoꞌi luwaga ganahewamiu yai, sai esega nimamai maꞌegu ꞌe bwaluidi aiyohe yai, mate in, logena. 21 Doga Natuna haba ya peꞌi doha Buka Tabuna haꞌa ya libaen. In moho agu tau wewe haba heyaheyaya laꞌilaꞌi ya fahoina. Loholohona moho dogana ni tabu ti yosi.
Yesu ena Anyaweyawesa.
Maleko 14:22-25
(Matiu 26:26-30; Luka 22:7-20; 1 Kolinto 11:23-25)
22 Sa kalakalahe na Yesu fwalawa ya abi na ya lauꞌuꞌula lau Yaubada lisina, habahim ya ifi be ana hewahewali ya feledi na iyen,
Itete au abi be au an. Itete Yau taugu.
23 Habahim kaputi ya abi na Yaubada ya lautoꞌiyen na ya feledi be mahudoꞌidi adi sa nom. 24 Yesu iyen,
Itete mate yau ꞌwasinagu. Yaubada ena yali fwaufwauna fafaꞌilalana ya tabuliwa dodoga mahudoꞌidi debadi yai.
25 E faliba dudulaimiu mate wain te ibege ya nom fuyoi ya lau ee–, Yaubada ena Aba Baꞌisa yai haba E nom fuyo.
26 Wana hesa sa wanai mulina yai sa aulaha sa lau Oliwe Piuna.
Yesu Pita ena Falefalele ya Liba Bwaꞌiyedi
Maleko 14:27-31
(Matiu 26:31-35; Luka 22:31-34; Diyon 13:36-38)
27 Yesu ya libalau lisidi,
Mahudoꞌimiu haba ami lau afulegu na ami gela. Buka Tabuna yai haꞌa ya libaen iyen, “Yaubada haba sipi tau ita watanina ya lau funuhi na sipi haba sa failaulauwidi.”
28 E mwahuli fuyo ai mulina, haba E bwaꞌi E lau Galili.
29 Pita iyen,
Mahudoꞌidi haba sa suha papa afulem, na Yau hige gonowana.
30 Yesu iyen,
Pita, E liba dudulai lisim yai mate iꞌipa te hola kamkam ibege i gwane ma luwaga na haba wa faleleꞌegu ma faihona.
31 Pita ya aso, iyen,
Hige gonowana ya faleleꞌem, haba te peꞌi luwaluwaga.
Na ana hewahewali mahudoꞌidi edi liba gonogonowadi.
Getesemeni yai, Yesu ya Lauꞌuꞌula
Maleko 14:32-42
(Matiu 26:36-46; Luka 22:39-46)
32 Sa laoma Getesemeni nuꞌuna. Yesu ya libalau ana hewahewali lebedi yai iyen,
Aiteꞌi au taꞌataꞌai na hola E lau E lauꞌuꞌula.
33 Pita, Diyemsi yo Diyon maꞌedi Yesu sa lau. Nuwa kamkamna laꞌilaꞌi yo nuwa mwahu ya laoma tauna ya famohafu. 34 Yo fede ya falibadi iyen,
Nuwa heyaya nuwagu yai ya laꞌi wananaha begana haba ya kamfunuhigu. Aiteꞌi au miyamiya na au tuhutuhuli.
35 Begana ya sigilau, ya lofe lidiyen tanohi yai na ya lauꞌuꞌula iyen,
Yena gonowana, ibege kamkamna lahaina te ya fahoina.
36 Ya lauꞌuꞌula iyen,
Aba, Tamagu, ginauli mahudoꞌidi um gonowam. Kamkamna te u abi fahi lisigu yai. In moho hige yau egu fanuha, um em fanuha.
37 Habahim ya fuyo ana hewahewali faihona lisidi na ya itadi sa enoꞌeno. Ya libalau Pita lebena,
Saimon, wa eno? Hige gonowana u tuhutuhuli awa esega moho? 38 Au tuhutuhuli yo au laulauꞌuꞌula haba ibege lau lubu au fahoina. Yaluwamiu sa nonoha na taumiu sa belubelu.
39 Maꞌesega moho ya lau afuledi na ya fuyo ya lauꞌuꞌula. Libadi gonogonowadi ya libaedi. 40 Ya fuyoma ana hewahewali lisidi ya itadi sa maimaiduꞌe be hige somo ti faliba.
41 Fafaihonana ya fuyoma na ya falibadi iyen,
Hola ma enomiu? Ma anyawasimiu? Maihalana ya mahano! Haꞌasi, Doga Natuna aho te sa fele lawen dodoga heyaheyayadi lisidi yai. 42 Au obiyo ta lau! Agu tau wewe ya laoma!
Yesu sa Au
Maleko 14:43-52
(Matiu 26:47-56; Luka 22:47-53; Diyon 18:3-12)
43 Yesu ma libalibana yo fede Diudasi, in safuhudohudoꞌi luwaga hesa, maidana dodoga boludi ma baibainetidi yo ma kepakepatadi sa mahanoma. Iti mate tau antalasam babaꞌisadi, babada yo laugagayo tau lau faꞌataendi sa duidima. 44 Tau wewe mate fafaꞌilala hudoꞌi haꞌa babaꞌisa ya falibadi iyen,
Sai E falafu mate logenana. Au tohai be au lawen, na ami gati komokomaniꞌi.
45 Fuyana Diudasi ya mahano ya dudulai ya lau Yesu lisina iyen,
Tanuwaga!
Na ya falafu.
46 Yo fede Yesu sa tohai be sa lawen.
47 Tau obiꞌobiyo hesa amainiya ena baineti ya faguli be Tau Antalasam edi Baꞌisa ena tau lau fayofayo beyana ya talafahi.
48 Alinadi Yesu ya bui iyen,
Bena Yau tau angafu? Logena ma baibainetimiu yo ma kepakepatamiu ami laoma ami augu. 49 Fuya ouꞌouli yau maꞌemiu Dubu Tabuna dobidobina yai E laulau faꞌata na hige au augu. In moho Buka Tabuna bena ya fawananaha. (Isaiya 53:7-12)
50 Habahim ana hewahewali mahudoꞌidi sa gela afulen. 51 Hewali hudoꞌi ya lau kaleko na Yesu ya laulau watan mate sa tohai, 52 yo fede ya dalu peidi be kaleko ya taufahi na ma tau afa afaꞌafana ya gela.
Yesu sa Lawen Sanhedeli Lisidi
Maleko 14:53-65
(Matiu 26:57-68; Luka 22:54-55, 63-71; Diyon 18:13-14, 19-24)
53 Yesu sa lawen Tau Antalasam Baꞌisana lisina na tau antalasam haisa, babada lalaꞌi yo laugagayo tau lau faꞌataena mate sa faꞌoigogo amainiya. 54 Pita muli yai ya laoma be ya luhulau Tau Antalasam edi Baꞌisa ena luma dobidobina yai. Be maidana gati sa taꞌai na ya anmwahibo.
55 Tau Antalasam edi Baꞌisa yo Sanhedeli mahudoꞌidi edi fanuha bena liba wananaha laꞌi sa lobahidi, haba ainiya bena Yesu sa wunui. In moho hige somo laꞌi ti lobahi.‡ Diusi edi Konisela laꞌilaꞌi hesana mate Sanhedeli.
56 Tau fagiluna boludi edi liba bwalabwala sa libaedi mate hesa - hesa ena ya laulau hudoꞌi. 57 Haisa sa obiyo be liba bwalabwala sa libaedi Yesu lisina yai tiyen,
58 ꞌE atahi ya libaliba iyen, “Dubu Tabuna dodoga sa ginauli haba E dem lopa. Na lahai faihona ganahewadi yai hesa haba E faꞌobiyo fuyoi. Dubuna mate hige dodoga nimadi yai ti ginauli.”
59 Hesa - hesa ena liba ya lau hudohudoꞌi. Hige edi liba esega.
60 Tau Antalasam edi Baꞌisa ya obiyo mahudoꞌidi matadi yai na ya fatiꞌo lau Yesu lisina iyen,
Sa fagilum te haga alinadi u bui.
61 In moho Yesu hige somo laꞌi i libaen. Yo fede Tau Antalasam edi Baꞌisa ya fatiꞌo fuyoi iyen,
Um Keliso, Loholoho Tau Abina Natuna? (Isaiya 53:7-8)
62 Yesu iyen,
Yau, Logegu. Haba Doga Natuna ya taꞌataꞌai Gigibwali Yaubadana sibana yai na yada yai ya laolaoma, ami ita.
63 Tau Antalasam Baꞌisana ena leli ya ankamgiginidi na iyen,
Hei! Hige gonowana wikinisi hesa haba ta yoꞌoi!
64 Yesu ya liba pono iyen, “Yau maꞌegu Yaubada gonogonowamai.” Ami atahi! Emi nuwatuhu somo?§ Au italau Maleko 14:62.
Mahudoꞌidi sa fagilu, be ehe watawatan tiyen,
Ii–, peꞌi moho.
65 Habahim haisa Yesu sa lau kanikanisoi Matana sa suma yo sa talai na tiyen,
U anmasi, sai ya talaim!
Habahim gati sa lawen be sa lau papaliꞌi.
Pita ya Falele Ma Faihona
Maleko 14:66-72
(Matiu 26:69-75; Luka 22:56-62; Diyon 18:15-18; 25-27)
66 Pita mate hola luma dobidobina yai na Tau Antalasam edi Baꞌisa ena tau lau fayofayo waihinna ya laoma, 67 ya italau be Pita ya ita ya anꞌanmwahibo yo fede iyen,
Um hinaga maꞌem Yesu Nasaleta.
68 In moho Pita ya falele iyen,
Somo wa libalibaen hige ya nuwatuhu lobahi!
Yo fede edaꞌeda hafohafona yai ya kalamahano na kamkam ya gwane.* Uliꞌuli haisa mate, “kamkam ya gwane” tefana hige ti tole, lausoisoi ganahewana yai te.
69 Tineꞌeu wa ya itaꞌita lau be Pita ya ita fuyoi yo fede tau obiꞌobiyo ya falibadi iyebom,
Ite ana hewali hesa.
70 In moho Pita ya falele boda. Hige walolona na dodoga sa obiꞌobiyo Pita sadaina yai sa faliba tiyen,
Wananaha! Um hidana hesa. Paꞌana um Galili yai wa laoma.† Ya sibai mate in Galili dogana paꞌana ya libaliba doha iti.
71 Pita ya angwala dodoga lisidi iyen,
Taumohona ami libalibaen hige ya sibai.
72 Hige walolona kamkam ya gwane boda. Yo fede Yesu ena liba Pita ya nuwatuhuidi fuyana ya faliba iyen,
Ibege hola kamkam i gwane ma luwaga na haba wa falele ma faihona mate hige u sibaigu.
Yo fede Pita ya tan eloꞌelolosi.
*14:1 Bayawa mate “pasowa mataꞌasina” yo Fwalawa Fafayisti Gesana Anꞌangogona fafaꞌilalana.
†14:3 Maꞌi panepanena te hesana nada hige amaiteꞌi, na umeꞌehu hudoꞌi hesana alabasta yai botolona sa ginauli.
‡14:55 Diusi edi Konisela laꞌilaꞌi hesana mate Sanhedeli.
§14:64 Au italau Maleko 14:62.
*14:68 Uliꞌuli haisa mate, “kamkam ya gwane” tefana hige ti tole, lausoisoi ganahewana yai te.
†14:70 Ya sibai mate in Galili dogana paꞌana ya libaliba doha iti.