14
Dodoga Mose yo Elon sa Fatalapiliyedi
Namba 14:1-10, 26-35
Tatau adi asiyala lalaꞌi yo taon ganadi adiꞌadidilidi wasadi debana yai, dodoga sa ꞌwasabu yo sa tan ꞌwalaꞌwalawui.
1 Iꞌipana dodoga mahudoꞌidi sa tan ꞌwalaꞌwalawui.* Sa tan ꞌwalaꞌwalawui paꞌana tau ita sipo hahaisa wasa heyaheyayana sa falibadi be sa faꞌwasabuꞌedi. 2 Sa fatalapili Mose yo Elon lebedi yai tiyen,
Nahalidi hige ai Idipi e ai nuꞌu pitapitalina te, ta peꞌi! 3 Sidohana be Guyau ya laweda tanohi te, lisina yai? Haba sa wunuida na lalahuda yo nanatuda, haba sa gelaedi. Ya loholoho moho ibe te fuyo Idipi.
4 Sa fafatiꞌo fuyoꞌidi tiyen,
Haga tau lau kulukulu ta fasinabo be ta fuyo Idipi.
5 Yo fede, Isalaela nuwanuwadi yai, Mose yo Elon sa hoba lidi tanohi yai. 6 Habahim Nun natuna, Diyesuwa yo Diyefunehi natuna, Kelebi, tanohi tau tafo dadaina haisa, edi kaleko sa kamgigidi, 7 na sa libalau Isalaela mahudoꞌidi lebedi tiyen,
Tanohina ꞌe tafo dadai mate ya loholoho wananaha. 8 Nuꞌu mahumahula. Na yena Guyau nuwana ya loholoho lebeda yai haba ya foyahida, te lau niya be aiꞌeda ya feleda.
9 Tabu moho Guyau au moꞌa peiyen yo dodoga tanohina yai ni, au ꞌwasabuwedi paꞌana haba te lei hafihafitidi. Hige tau bobodiyedi na ita Guyau maꞌeda be tabu au ꞌwasabuwedi.
10 In moho Isalaela mahudoꞌidi sa oiliba bena sa lau umeꞌehuidi. Makai ma luwaga, Guyau ya taumahata lau Isalaela mahudoꞌidi lebedi Oigogo Palaina hewana yai, ma namanamalina.
Yaubada Iye Ena Dodoga Haba ya Faꞌankamkamnadi
Namba 14:26-35
Yaubada Mose ya faliba bena ya timuli bui be ena dodoga ya foyahidi sa lau nuꞌu pitapitalina haba Gabogabo Balebalelemna Edaꞌedana sa lau watan.
26 Habahim Guyau ya libalau Mose yo Elon lisidi iyen,
27 Dodoga heyaheyayadi te, edi fatala pili lebegu yai haga i lofa. E tausiꞌololo! 28 Be u falibadi uwe, “Guyau ya liba iye, Yau E miya esegahigu! Ginaulidi somo ami libaedi E atahiyedi, haba E ginauli watanidi ai lebemiu. 29 Safalumamiu emi bolima 20 na ya hasai yo hesamiu sensisi bukana yai, mahudoꞌimiu haba ami peꞌi ai nuꞌu pitapitalina te paꞌana ami fatala piliyegu.
30 “Tanohi E liba fasunumaʼen aiꞌemiu mate ibege sai laꞌi i mahano lau ai lisina. Diyefunehi natuna, Kelebi yo Nun natuna, Diyesuwa moho haba sa mahano lau niya. 31 Nanatumiu ami libaedi auwe, ‘Ama waiyunu haba, nanatumai, sa tohaidi.” In moho higeꞌe! Haba E lawedi be tanohina ami ꞌwaiyoꞌoꞌen, ainiya haba sa miyai. 32 In moho, umi, ai nuꞌu te haba ami peꞌi. 33 Ami lau afulegu doha waihin lahuna ya lau afulen na ya lau taumoho hesa - hesa lebena. Lisina yai nanatumiu haba sipi tau itaꞌita wata ai nuꞌu pitapitalina te, haba sa ankamkamna bolima 40 yo hiti te dogana ofiꞌofina ya peꞌi. 34 Tanohi ami tafo dadai lahai 40 lisina yai bena ami ankamkamna bolima 40, emi heyaya debadi yai. Bolima esega mate lahai esega, enehena. Ami fawaiyunugu, logena, kamkamnana haba ami fahoina.
35 “E liba dudulai! Ginaulidi te haba E ginauli watanidi dodoga heyaheyayadi te ai lisidi, safalumadi sa nuwa esega be sa taꞌai mulimuliyegu. Haba sa peꞌi ofi ai nuꞌu pitapitalina te. Yau, Guyau haꞌa E liba.”
*14:1 Sa tan ꞌwalaꞌwalawui paꞌana tau ita sipo hahaisa wasa heyaheyayana sa falibadi be sa faꞌwasabuꞌedi.