4
Shenek Lotu Um Iruhin Gani Iruhw Heven
1 Douk enyudok nyanakuk aria eik yatik anat wit tanajik tape iruhw heven. Aria yemnek anah mah. Aria enyudok arpen nyeyagwreh debeg kabi shahapur oruhw-umori douk iganigadae yemneken nyeyagwrehi iri nyakripe nyakri, “Nyak nyutowi agundok iruhw aria iyabigen eshudok eneshenesh douk ta shutogur iri.” 2 Aria ahudok atuh Iruhin ananin Mishin nyatogrume dodogowin atin aria yatigu enen debeinyi wagitur douk king-omi atum hapenyen iri nyakus iruhw heven. Aria anan arman nape enyudok wagitur. 3 Anan natrugun kabi anam yopumi abom utom nyeigurim um jaspa iri um mani kupaimi owishiborimi nyeigurim um konilian iri batrugun um. Aria enen renbo nyakus aria enyenyir yamuger rakih rananug enyudok debeinyi wagitur. Enyudok renbo douk yopin abom kabi anam yopumi grinporeim utom nyeigurim um emeral iri um. 4 Aria 24-poreish debeishi wagiturahos shopunek shakus shersharih um enyudok debeinyi wagitur. Aria anam debeimi armam 24-poreim hatem eshudok wagiturahos. Amam hore shigorihwihi rupeh aria howem yopugwi hatog shenekog gol iri douk king-omi atum hogwem iri. 5 Aria utag bogaragi gani enyudok debeinyi wagitur nyakus um aria utag brereyarog geyagwreh debeg. Aria hurukatin um enyudok debeinyi wagitur 7-poreish ourehish douk hanish atish iri shakus. Eshudok ourehish douk shakri wobuwobren baraen um Iruhin ananish 7-poreish yopishi mishish.4:5Putik futnot nyape Revelesen 1:4 iri. 6 Aria hurukatin um enyudok debeinyi wagitur, enen enyudok kabi douk debeigwi youg um nyakus. Enyen nyatrugun abom nyape kabi wenyir um. Aria eshudok 4-poreish dodogowishi eshudok douk mishish shoresh iri shape orokohun aria shape shersharih um enyudok debeinyi wagitur. Aria sabaisi nabes sape yamagosish um shani aparuhish um shani agabusish um. 7 Aria nyarik iri dodogowinyi douk mishin nyoren iri douk nyape kabi enen debeinyi wanohwinyi mahin nyeigurinum laion iri. Aria nyagiguk iri nyape kabi enen abonin bulmakau um. Aria binyatin iri enyenyig yamag gape kabi arpenyig yamag um. Aria nubatin-enyi nyape kabi anan debeini kumun nehuru nanak iruhw iri um. 8 Aria eshudok nubatish, eshesh atin atin douk anawipish kapraigiyohos shapenyesh. Aria numuniruh um hani adukiruh um esheshiruh yegeshiweruh ihiruhmorim douk shukniruh abom um nabes atus. Aria nyumneh weibus eshesh shapeum shakri,
“Debeini Iruhin douk dodogowini abom.
Anan douk yopuni abom, anan douk yopuni abom,
anan douk yopuni abom.
Seiwok nape, aria douk shopunek nape,
aria kweipon shopunek ta nunaki.”
Eshesh madae shupe um shurao uhwin atin um shakri enyudok baraen um uwe. 9-11 Eshesh shape shatuk Iruhin douk nape enyudok debeinyi wagitur iri ananin nyeigur nyato iruhw. Anan douk nape ihih nyumneh iri. Eshesh shanadudareh-uman shenek tenkyuman shakri anan yopuni. Aria abudok nyutob eshudok nubatish dodogowishi douk mishish shoreshi shenekesh namudok um, amudok 24-poreim debeimi habuh hoduk ohrubus hurukatin um Iruhin douk nape wosik abom ihih nyumneh iri douk nape enyudok debeinyi wagitur iri aria hape henek lotuman. Amam honik amamig yopugwi hatog douk king-omi atum hogwem iri hawashog hurukatin um enyudok debeinyi wagitur aria hakri,
“Apakin debeini Iruhin, nyak douk
dodogowinyi yopunyi abom.
Aria ihishmorim arpesh ta shutuk nyakin atin nyeigur nyuto iruhw.
Um maresh? Nyak nyagipesh nyakim atum urkum
aria nyenek ihishmorim eneshenesh eshudok shatogur shape aria nyorukesh yapis.
Eshesh douk nyakim urkum atum morumesh nyakriyesh
aria eshesh shatogur shape.”