9
1 Adi kũ mà takada kɛ̃árɛ Luda gbɛ̃nↄ kↄ̃ kámaza kɛnaa pì yã musuro, 2 zaakũ má dↄ̃ kũ a nɛ̀sɛmana dà, akũ ma lɛ́ gbɛ̃̀ Masedonia gbɛ̃nↄnɛ ma pì, Girisi gbɛ̃nↄ soru mà zaa muniyã. Á aniakɛnaa pì ń gbɛ̃nↄ mɛ̀ɛ fùtɛ dasi. 3 Akũ ma ó gbɛ̃ pìnↄ zĩ̀áwa de àgↄ̃ kú soru gũn lákũ ma ò nà, de lɛ́ kũ o gbɛ̃̀ yã pìi musu sún kɛ pãro. 4 Tó Masedonia gbɛ̃kenↄ sù kũmao, tó ò è á soru dí manaro, wé'i ni ó kũ, kũ o á náanikɛna yãi., Oni á pↄ́ o dↄ yá? 5 Abire yãi ma dìtɛ à mana mà o gbɛ̃ pìnↄnɛ ò domɛnɛ arɛ, ò gba kũ a gĩnakɛ a a lɛ́ sɛ̀ yã kɛkɛ káaku, de á soru gↄ̃ mana, àgↄ̃ de nɛ̀sɛdo gba ũ, adi kɛ gba tilasinlo.
Gbadana kũ nɛ̀sɛdoo
6 Àgↄ̃ yã díkĩna dↄ̃:
Tó n tↄ̃̀ fíti, ĩni kɛ̃ fíti,
tó n tↄ̃̀ zↄ̃kↄ̃, ĩni kɛ̃ zↄ̃kↄ̃.
7 Baadi kpá lákũ à dà a swɛ̃̀ɛ gũn nà ãnsisinaa sari tilasii sari. Luda ye gbɛ̃ kũ àdi gba da kũ pↄnnaooi. 8 Luda ni fↄ̃ à tó arubarika sĩnda pínki likaái, de gↄrↄ sĩnda pínki pↄ́ sĩnda pínki mↄ́áwa yã sĩnda pínki gũn ari à fɛ̃̀ kãáo à yã mana sĩnda pínki kɛo. 9 Lákũ à kɛ̃na Luda yãn nà ò pì:
Àdi pↄ́ fã takasidenↄnɛ,
a yãmanakɛna lakana vĩro.
10 Lákũ Luda dì pↄ́buri kpá pↄ́tↄ̃riia nà kũ pↄ́ kũ òdi bleo, ani pↄ́buri kpááwa, à karaárɛ, de á manakɛna ↄgbɛ le à ↄ tá. 11 Ani á kɛ pↄ́denↄ ũ yã sĩnda pínki gũn de àgↄ̃ gba da dasidasi gↄrↄ sĩnda pínki, gbɛ̃nↄ Luda sáabu kpá gba kũ a dàńnɛ ó gãi yãi. 12 Zaakũ Luda gbɛ̃nↄ pↄ́kĩammana bↄkↄtɛn kámaza zĩ pì tɛn kɛ adoro, ani tó Luda sáabukpana dagula manamanamɛ dↄ. 13 Gbɛ̃nↄ ni Luda tↄ́ bo, zaakũ kámaza kũ a kɛ̀ɛ pì ni mↄńnɛ, kũ a mìi nàtɛ Kirisi baaru nna kũ a zɛoonɛ, akũsↄ̃ a gbɛ̃kɛ kɛ̀ńnɛ kũ gbɛ̃ sĩnda pínkio kũ nɛ̀sɛ doo. 14 Oni adua kɛárɛ kũ á yão dana ń swɛ̃̀n Luda gbɛ̃kɛ kũ à pìsiáwa yãi. 15 À Luda sáabu kpá a gba kũ à gɛ̃̀ onala yãi.