1 Makũ Pↄlu, ma kútɛ kɛ̀árɛ kũ Kirisi nɛ̀sɛyĩdao kũ a busɛkɛo, makũ kũ òdi pi, tó má kú kãáo má busɛ, tó má kú kãáoro sↄ̃, madìgↄ̃ pãsĩárɛ. 2 Ma wɛ́ kɛ̀áwa, tó ma su, àsun tó màgↄ̃ pãsĩ kãáoro, zaakũ mani fↄ̃ màgↄ̃ pãsĩ kũ gbɛ̃ kũ òdi pi andunia yã mɛ́ àtɛn dowɛrɛ arɛnↄo. 3 Ó kú andunia gũmmɛ, ama odì zĩ̀ ká lán andunia gbɛ̃nↄ bàro. 4 Ó gↄ̃kɛbↄnↄ bi andunia pↄ́nlo, Luda gↄ̃kɛbↄ gbãna kũ odì zɛki gbãnanↄ gboroonↄmɛ. Odì ɛ́kɛ lɛ́kpakↄ̃ananↄ gboroo 5 kũ yↄ̃̀gↄ̃ yã kũ àdi gíńnɛ ò Luda dↄ̃o pínki. Odì laasun sĩnda pínki milɛ ble, de ò mì natɛ Kirisinɛ. 6 Tó a mìi nàtɛwɛrɛ mámmam, o laka kũ ò wɛ́ tã sãyãmarisaridenↄa.

7 Adì yã gwa musumɛ. Tó gbɛ̃ a zĩda náanikɛna kũ Kirisi pↄ́n a ũ, ade gↄ̃ dↄn kũ Kirisi pↄ́n ó ũ lán a bà se. 8 Bee tó ma lɛ́ gbɛ̃̀ à kɛ̀ zↄ̃kↄ̃ doka kũ Dikiri kpàwá yã musu, wé'i ni ma kũro, zaakũ á zĩni pɛtɛna yãimɛ, adi kɛ á lɛtɛna yãinlo. 9 Àsun kɛ lándↄ̃ má ye mà vĩna dadaái kũ ma takadakɛ̃naao bàro. 10 Òdi pi ma takadanↄn bɛ̀ɛrɛ vĩ, akũsↄ̃ ò gbãna, ama tó ò wɛ́ sìmalɛ, àdi ń kũ gbãnaro, ma yã dì ká pↄ́ke lɛ́iro. 11 Gbɛ̃ kũ òtɛn o lɛnↄ gↄ̃ dↄ̃ kũ lákũ ó yãnↄ de nà takadanↄ gũn tó ó kú kãáoro, lɛn óni kɛ lɛ, tó o kↄ̃ è.

12 Dín ó ũ ò ó zĩda kɛ lɛɛlɛ kesↄ̃ ò ó zĩda lɛkↄ̃a kũ gbɛ̃ kũ òtɛni ń zĩda sáabu kpánↄo. Tó ò ń zĩda kpàkũsũ kↄ̃o kesↄ̃ ò ń zĩda lɛ̀kↄ̃a kↄ̃o, òdigↄ̃ ↄ̃ndↄ̃ro. 13 Ókↄ̃nↄ sↄ̃, óni lɛ́ gbɛ̃ de a lɛ́laro. Óni gbɛ̃ ikokɛki kũ Luda dìtɛwɛrɛ lɛ́mmɛ, kũ à à kà á kĩnaa se. 14 Lákũ o ka á kĩnaa nà, ótɛn vĩ ó ikokɛki lɛ́laro, zaakũ o su kũ Kirisi baaru nnao ari á kĩnaa káaku. 15 Odì lɛ́ gbɛ̃ de a lɛ́la, ò gbɛ̃ pãndenↄ zĩ ká ó pↄ́laro. Zaakũ á ludanaanikɛna tɛn kara, ó ye zĩ kũ ótɛn kɛ á tɛ́ ↄ tá manamana ari à ká ikokɛki kũ Luda dìtɛwɛrɛ lɛ́n, 16 de ò gɛ́ ò baaru nna pì kpá bùsu kũ ò kú á arɛnↄ gũn, lɛ́gbɛ̃na kũ gbɛ̃ pãndenↄ tàragaabanaao sari. 17 Tó gbɛ̃ ye à lɛ́ gbɛ̃, à gbɛ̃ Dikiri yã musu. 18 Adi kɛ gbɛ̃ kũ àdi a zĩda sáabu kpá mɛ́ à manaro, sé gbɛ̃ kũ Dikiri dì a sáabu kpá.