Luda yã takada kũ Bisã yão LAASUNDE 3

Yã sĩnda pínki kũ a gↄrↄomɛ

1 Yã sĩnda pínki kũ a gↄrↄomɛ,

bↄkↄtɛ sĩnda pínki kũ a kɛgↄrↄo.

2 Nɛ́'igↄrↄ kun, gagↄrↄ kun,

pↄ́tↄ̃gↄrↄ kun, a wotogↄrↄ kun.

3 Dɛgↄrↄ kun, gbana aafia gↄrↄ kun,

gborogↄrↄ kun, a dↄgↄrↄ kun.

4 Ɔ́ↄdↄgↄrↄ kun, yáadↄgↄrↄ kun,

wɛ̃ndakɛgↄrↄ kun, kↄ̃kↄ̃'ogↄrↄ kun.

5 Gbɛ̀kↄtɛna gↄrↄ kun, gbɛ̀kakarana gↄrↄ kun,

bã̀ndaragagↄrↄ kun, a kɛ̃na gↄrↄ kun.

6 Pↄ́wɛtɛna gↄrↄ kun, a ↄgbarɛna gↄrↄ kun,

pↄ́kũna gↄrↄ kun, a gbarɛna gↄrↄ kun.

7 Pↄ́gaokɛ̃na gↄrↄ kun, a nabigↄrↄ kun,

lɛ́kũna gↄrↄ kun, yã'ona gↄrↄ kun.

8 Yenyĩ gↄrↄ kun, zãngu gↄrↄ kun,

zĩ̀kana gↄrↄ kun, vutɛna aafia gↄrↄ kun.

9 Bↄ́ àreen zĩkɛri dì le wari kũ à kɛ̀aa? 10 Ma zĩ kũ Luda dà bisãsirinↄnɛ ò kɛ è. 11 Luda tò pↄ́ sĩnda pínki mana a gↄrↄa. À kunna gↄrↄ sĩnda pínki laasun dà bisãsiri swɛ̃̀n dↄ, bee kũ abireo ani fↄ̃ à yã kũ Luda tɛn kɛ zaa andunia naana ari a lakanaa dↄ̀rↄ dↄ̃ro. 12 Má dↄ̃ kũ pↄ́ke mana kũ bisãsirio de kunna pↄnna gũn kũ manakɛnaao a wɛ̃̀ndi lɛ́nlaro. 13 Tó gbɛ̃ tɛn pↄ́ ble àtɛn í mi àtɛni a zĩ sĩnda pínki sáabu kpá, Luda mɛ́ à a gbà. 14 Má dↄ̃ kũ yã kũ Luda dì kɛ nigↄ̃ kun gↄrↄ sĩnda pínki. Oni fↄ̃ ò pↄ́ke karanlo, oni fↄ̃ ò pↄ́ke lagonlo. Luda kɛ̀ lɛ de ògↄ̃ a vĩna vĩ yãimɛ. 15 Pↄ́ kũ à kun tera gĩnakɛ à kun zaa zĩ kↄ̀. Pↄ́ kũ anigↄ̃ kun zia kun yã kↄ̀. Luda dì yã kũ ò kɛ̀ yãnↄ gbɛ̀ sísi.

16 Ma yã è andunia gũn dↄ,

gu kũ à de yãzɛde gↄ̃ kún,

yãzɛsaride mɛ́ à kú gwe,

gu kũ à de yã mana gↄ̃ kun sↄ̃,

yã vãni mɛ́ à kú gwe.

17 Ma ò ma swɛ̃̀ɛ gũn,

Luda ni yãkpatɛ kɛ kũ gbɛ̃ mananↄ

kũ gbɛ̃ vãninↄ ń pínki,

zaakũ yãkɛna sĩnda pínki kũ a gↄrↄomɛ,

bↄkↄtɛ sĩnda pínki kũ a kɛgↄrↄo.

18 Ma ò ma swɛ̃̀ɛ gũn dↄ, bisãsirinↄ sↄ̃, Luda dì ń yã wɛ́ wɛ̃ńnɛ de ò dↄ̃ ń zĩdaa kũ ò de lán nↄ̀bↄnↄ bàmɛ. 19 Bee zaa zĩ bisãsirinↄ kũ nↄ̀bↄnↄ, gó dokↄ̃nↄ mɛ́ àtɛni ń bikũ. Lákũ nↄ̀bↄↄ dì ga nà lɛn bisãsiri dì ga lɛ se, ń we'ona dokↄ̃nↄmɛ. Bisãsiri de nↄ̀bↄlaro, zaakũ a pínki pãmɛ. 20 Ń pínki dì gɛ́ gu dokↄ̃nↄmmɛ, zaakũ ń pínki bò bùsutiti gũmmɛ, ń pínki ni ɛra à gↄ̃ bùsutiti ũmɛ. 21 Tó bisãsiri nini dì tá musu, nↄ̀bↄ pↄ́ sↄ̃ àdi tá zĩtɛmɛ, dí mɛ́ à dↄ̃ↄ? 22 A yã mɛ́ à tò ma è yãke mana kũ bisãsirio de à a zĩ sáabu kpálaro, zaakũ a bakaan gwe. Dí mɛ́ ani tó à dↄ̃ yã kũ ani kɛ a gbɛraa?