Luda yã takada kũ Bisã yão LAASUNDE 4

Kunna kũ kↄ̃o

1 Akũ ma gbãna kũ òtɛn mↄ gbɛ̃nↄnɛ andunia gũn yã gwà dↄ pínki. Ma gbɛ̃ kũ òtɛn wɛ́ tãḿmanↄ wɛ́tɛ̃ è, ò laakarikpatɛri vĩro. Ò laakarikpatɛri vĩro, zaakũ ń wɛ́tãmmarii pìnↄ mɛ́ ò gbãna vĩ. 2 Akũ ma pì, gbɛ̃ kũ ò gànↄn sáabu vĩ de gbɛ̃ kũ ò kunnↄla, 3 ama gbɛ̃ kũ odi i kↄ̀ro akũsↄ̃ adi wɛ́ kɛ pla kũ a vãni kũ òdi kɛ andunia gũnworo sã̀naḿma ń pínki. 4 Ma è kũ pↄ́ kũ à tò gbɛ̃ dì zĩ kɛ à mɛ̀ kpáa, de àgↄ̃ de a gbɛ̃dakela yãimɛ. Abirekũ pãmɛ dↄ, pɛna gukoriamɛ.

5 Yↄ̃nkↄ dì ↄ kpa a kùla ari à fɛ̃fɛ̃.

6 Kunna kũ pↄ́ okũ doo kũ laakarikpatɛnaao

mana de kunna kũ pↄ́ okũ plao

kũ ísimmawaranaao kũ pɛna gukoriaola.

7 Akũ ma ɛra ma yã pã pãnde è andunia gũn dↄ. 8 Gbɛ̃ke mɛ́ à kun à nɛ́ vĩro, à vĩ̀ni kesↄ̃ dakũna vĩro. A ísimma dì lákaro, bee kũ abireo a aruzɛkɛ dì mↄ́aro. Dí yãin àtɛn zĩ kɛɛ? Bↄ́yãi à nnamanaa tɛ̃̀ a zĩdanɛɛ? Abirekũ pãmɛ dↄ, yãbↄkↄtɛ pãsĩmɛ.

9 Pla de dola,

zaakũ ń zĩkɛna àre nigↄ̃ mana.

10 Tó gbɛ̃ mɛ̀n do lɛ̀tɛ, a gbɛ̃ndo ni a sɛ́.

Waiyoo gbɛ̃ mɛ̀n do!

Tó à lɛ̀tɛ, anigↄ̃ sɛ̀ri vĩro.

11 Tó gbɛ̃nↄn planↄn wutɛna gu dokↄ̃nↄn,

oni kↄ̃ puusu ma.

Deran gbɛ̃ mɛ̀n do ni kɛ nà à bo ĩann?

12 Òdi gbãna mↄ gbɛ̃mɛndonɛ,

gbɛ̃nↄn planↄ sↄ̃ òdi zɛ ò gímɛ.

Bà nɛ́ mɛ̀n aakↄ̃ dì kɛ̃ likaro.

13 Kɛfɛnna ↄ̃ndↄ̃ri takaside mana de kína zĩkũna yↄ̃nkↄ kũ àdi lɛ́damma ma dorola, 14 bee tó kɛfɛnna pìi bò kpɛ́sira gũn, akũ à gↄ̃̀ kína ũ, ke tó ò a ì bùsuu pìn takaside ũ. 15 Ma è andunia tɛ̀ kína gɛ̃nɛ kũ à de kɛfɛnna ũ pìiimɛ. 16 Gↄrↄ birea à gbɛ̃nↄ dasi lɛ́ vĩro, à de ń don'arɛde ũ. Ama gbɛ̃ kũ ò sù zãnↄ dí a sáabu kpáro. Abirekũ pãmɛ dↄ, pɛna gukoriamɛ.