1 Lákũ á de Luda nɛ́ yenyĩdenↄ ũ nà, à a ágba sɛ́. 2 Lákũ Kirisi yewái nà à gì a wɛ̃̀ndiii ó yãi sa'obↄ kũ a gbĩ nna Ludanɛ ũ, à tó yekↄ̃i doárɛ arɛ lɛ se.

3 Lákũ á de Luda gbɛ̃nↄ ũ nà, adi kũ ò pãpãkɛna ke dà vãni buri sĩnda pínki ke wãkũ yã ma á tɛ́ sero. 4 Wé'isariyã'ona kũ yã dↄ̀rↄ sari onaao kũ fàai bɛ̃̀nɛ bonaao mana kãáoro dↄ, sé sáabukɛna yã. 5 Àgↄ̃ dↄ̃ sãnsãn kũ pãpãkɛri ke kesↄ̃ dàvãnide ke kesↄ̃ wãkũde ke ni kpata kũ à bò Luda kĩnaa ble lɛɛlɛ kũ Kirisioro. Pↄ́ kũ gbɛ̃ dì a wãkũ kɛ gↄ̃̀ a dikiri ũmɛ. 6 Àsun tó gbɛ̃ke á sãtɛ kũ yã pã korioro. Yã bire takanↄ mɛ́ ani tó Luda pↄfɛ̃ kipa a yãdarisarinↄa. 7 Àsun tó á bàka gↄ̃ kú kũńworo. 8 Á kú gusiran yã, tera sà Dikiri gũn á kú gupuran. Àgↄ̃ kun gupura gbɛ̃nↄ ũ, 9 zaakũ gupura dì mana buri sĩnda pínki ińnɛ kũ yãzɛdeo kũ yãpurao. 10 À yã kũ àdi ká Dikirigu dada. 11 Á bàka súngↄ̃ kú kũ gusira yãkɛna kũ à karana vĩrooro. À yã birenↄ bobo gupurai. 12 Bee yã kũ gbɛ̃ pìnↄ dì kɛ asiri gũn ona bi wé'iyãmɛ. 13 Tó ò bò kũ yão gupurai, òdi a súsu dↄ̃, 14 zaakũ gupura dì tó ò pↄ́ sĩnda pínki e. Abire yãi òdi pi:

15 Àgↄ̃ á táa'ona dↄ̃ manamana. Àsungↄ̃ de yↄ̃nkↄnↄ ũro, sé ↄ̃ndↄ̃rinↄ. 16 Àgↄ̃ yã kũ Luda a zɛ́ bòárɛ kɛ, zaakũ gↄrↄ díkĩnanↄn vãni. 17 Abire yãi àsungↄ̃ de yↄ̃nkↄnↄ ũro, àgↄ̃ dↄ̃ lákũ Dikiri pↄyenyĩna de nà. 18 Àsungↄ̃ kú kũ wɛ̃dɛkɛnaaoro, àdi pãpã zĩḿmamɛ, ama à tó Luda Nini gↄ̃ zĩ kɛ á guu papana, 19 gbasa à fàai bo kũ kↄ̃o kũ zaburao kũ Luda tↄ́kpanaao kũ lɛ̀ kũ Luda Nini dì daárɛo. À lɛ̀ sí, à Dikiri tↄ́ kpá á swɛ̃̀ɛ gũn, 20 àgↄ̃ De Luda sáabu kɛ gↄrↄ sĩnda pínki yã sĩnda pínki gũn kũ ó Dikiri Yesu Kirisi tↄ́o. 21 À mì natɛkↄ̃nɛ Kirisi vĩna kũ á vĩ yãi.

22 Ákↄ̃nↄ nↄgbɛ̃nↄ, á baadi gↄ̃ mì natɛ a zãnɛ lákũ Dikirin átɛn kɛnɛ bà. 23 Zaakũ gↄ̃gbɛ̃mɛ nↄgbɛ̃ mì ũ, lákũ Kirisi de sↄsi gbɛ̃ kũ ò de a mɛ̀ ũnↄ mì ũ nà kũ ń Surabariio. 24 Lákũ sↄsi gbɛ̃nↄ dì mì natɛ Kirisinɛ nà, lɛmɛ se nↄgbɛ̃nↄ gↄ̃ mì natɛ ń zãnↄnɛ lɛ yã sĩnda pínki gũn.

25 Ákↄ̃nↄ gↄ̃gbɛ̃nↄ sↄ̃, á baadi gↄ̃ ye a nanↄi lákũ Kirisi ye sↄsi gbɛ̃nↄi nà, à gì a wɛ̃̀ndiii a yãi. 26 À gbã̀ bònɛ kũ ío a yã gãi de àgↄ̃ de a pↄ́ ũ, 27 de à ń kpan'arɛ kɛ kũ gakurio sãa sari yitorokũnaa sari mamberu sari gbãsĩ sari taari sari. 28 Lɛn à kũ̀ gↄ̃gbɛ̃ sĩnda pínki gↄ̃ ye a nanↄi lɛ lán a zĩda mɛ̀ɛ bà. Gbɛ̃ kũ à ye a nanↄi ye a zĩdaimɛ. 29 Gbɛ̃ke dì gí a zĩda mɛ̀ɛiro. Àdi pↄ́ble kpáa, àdi laakari dↄa lákũ Kirisi dì kɛ sↄsi gbɛ̃nↄnɛ nà, 30 kũ ó de a mɛ̀gunↄ ũ yãi. 31 Abire yãi gↄ̃gbɛ̃ ni bo a de kũ a dao bɛa, oni nakↄ̃a kũ a nanↄo, ń gbɛ̃nↄn pla ni gↄ̃ mɛ̀ do ũ. 32 Asiri zↄ̃kↄ̃ kú yã pìi gũn, ma è à de lɛ Kirisi dagura kũ sↄsi gbɛ̃ↄo. 33 Bee kũ abireo à de á yã ũ se dↄ. Á baadi gↄ̃ ye a nanↄi lán a zĩda bà. Nↄgbɛ̃ sↄ̃, à a zã yã da.