1 Ákↄ̃nↄ nɛ́nↄ, Dikiri gũn àgↄ̃ á de kũ á dao yã ma, zaakũ abire mɛ́ à mana. 2-3 À bɛ̀ɛrɛ lí á de kũ á daonɛ, de àgↄ̃ aafia à gì kɛ andunia gũn. Yã kũ Luda dìtɛ káaku kũ lɛ́sɛnaaon gwe.

4 Ákↄ̃nↄ denↄ sↄ̃, àsun á nɛ́nↄ pↄ yakaro. À ń tùtu kɛ à lɛ́ daḿma Yesude nɛ́gwana ũ.

5 Ákↄ̃nↄ zↄ̀nↄ, àgↄ̃ á andunia dí dikirinↄ yã ma kũ nɛ̀sɛdoo kũ vĩnao kũ lukanaao lákũ Kirisin átɛn kɛnɛɛ bà. 6 Àsun zĩ kɛńnɛ ń wɛ́ yãiro. Àgↄ̃ Luda pↄyenyĩna kɛ kũ yãpurao kũ ákↄ̃nↄmɛ Kirisi zↄ̀nↄ ũ yãi. 7 Àgↄ̃ zĩ kɛ kũ kokario lákũ Dikirin átɛn kɛnɛɛ bà, adi kɛ bisãsirinlo. 8 Àgↄ̃ dↄ̃ kũ Dikiri ni baadi yãmanakɛna fĩna bonɛ, zↄ̀ kesↄ̃ zĩdade.

9 Ákↄ̃nↄ dikirinↄ sↄ̃, àgↄ̃ kɛńnɛ lɛ se. À yã pãsĩ ońnɛna tó. Àgↄ̃ dↄ̃ kũ mↄ́kↄ̃nↄ kũ ákↄ̃nↄo pínki, á Dikiri kú musu, àdi yã kɛ gbɛ̃ke wɛ́ yãiro.

10 Yã kũ à gↄ̃̀n dí: Àgↄ̃ gbãna Dikiri gũn kũ a iko gbãna zↄ̃kↄ̃ↄo. 11 À gↄ̃kɛbↄ kũ Luda kpàáwanↄ da pínki, de à le à zɛ gíngin à Ibilisi ↄ̃ndↄ̃ fↄ̃. 12 Zaakũ adi kɛ bisãsirinↄn ótɛn ↄsi ká kũńworo, sé nini vãni kũ ò kú musunↄ. Ò de andunia díkĩna gusira kíblerinↄ ũ kũ ń mìdenↄ kũ ń ikodenↄ. 13 Abire yãi à gↄ̃kɛbↄↄ pìnↄ sɛ́tɛ à da pínki, de à fↄ̃ à zɛ à gí gↄrↄ vãnia, gbasa à gↄ̃ zɛna gíngin a pínki kɛnaa gbɛra. 14 Àgↄ̃ zɛna gbãna, à yãpura dↄ á pi asa ũ, à yãzɛdekɛ da mↄ̀ uta ũ. 15 À kɛna nna kũ Ludao baaru nna kpá kyate ũ, de àgↄ̃ kú kũ soruo. 16 Àgↄ̃ ludanaanikɛna kũna sɛ̃gbako ũ gↄrↄ sĩnda pínki, de à fↄ̃ à Setan kà tɛ́denↄ dɛ pínki. 17 À surabana sɛ́ à kú mↄ̀ fùra ũ, àgↄ̃ Luda yã kũ à de a Nini fɛ̃nɛda ũ kũna. 18 Àgↄ̃ adua kɛ gↄrↄ sĩnda pínki, àgↄ̃ Luda kpányĩ gbɛka yã sĩnda pínki gũn kũ a Nini donnɛna arɛo. Àgↄ̃ itɛ̃ kɛ kũ mɛna zↄ̃kↄ̃ↄo, àgↄ̃ adua kɛ Luda gbɛ̃nↄnɛ ń pínki. 19 À adua kɛmɛnɛ dↄ, de tó matɛn yã o, Luda ma gba lɛ́ mà a baaru nna asiri ońnɛ vĩna sari. 20 Baaru nna pì yãi má de Luda wɛ́de kũ ò dà kpɛ́siran ũ. Àgↄ̃ adua kɛmɛnɛ, de mà baaru nna kpá vĩna sari lákũ à kũ̀ mà kpá nà.

21 Ó gbɛ̃ndo yenyĩde Tikiku, Dikiri zĩkɛri náanide ni ma baaru kpáárɛ pínki, de à le àgↄ̃ ma kunna dↄ̃ kũ pↄ́ kũ matɛn kɛo. 22 Ma a zĩ̀áwa de à ó kunna oárɛmɛ, á nɛ̀sɛ le à yĩda kũ.

23 Ó gbɛ̃nↄ, De Luda kũ Dikiri Yesu Kirisio á gba aafia, à á yena kↄ̃i karaárɛ kũ á ludanaanikɛnaao. 24 Luda gbɛ̃kɛ kɛ gbɛ̃ kũ ò ye ó Dikiri Yesu Kirisii lakanaa sarinↄnɛ ń pínki.