Luda yã takada kũ Bisã yão ƐSITA 3

1 Yã birenↄ gbɛra kína Asueru Amɛdata nɛ́ Amana, Agaga buri gwenaa kàra à a gbà gbãna, à vutɛki kũ à de a gbãnade dakenↄ pↄ́la ń pínki kpàa. 2 Kína ìba kũ ò kú a bɛ gãnu gũnnↄ dì kútɛ ò mì natɛ Amananɛ lákũ kína dìtɛ nà, ama Mↄdekai dì kútɛ à mì natɛnɛro. 3 Akũ kína ìbaa pìnↄ Mↄdekai là ò pì: À kɛ̀ dera ńdi kína yã maroo? 4 Lákũ gu dìgↄ̃ dↄ nà òdigↄ̃ onɛ lɛ, ama àdi ń yã daro, à pì Yudan a ũ. Akũ ò ò Amananɛ de ò le ò dↄ̃ tó ani Mↄdekai yãkɛnaa pì fↄ̃. 5 Kũ Amana è Mↄdekai dì kútɛ à mì natɛarɛro, akũ a pↄ fɛ̃̀. 6 Kũ ò Mↄdekai buri ònɛ, akũ a dɛna ado kɛ̀nɛ fíti, akũ àtɛn zɛ́ wɛtɛ à Mↄdekai buri Yuda kũ ò kú Asueru bùsuu gũnnↄ dɛdɛ ń pínki.

Amana lɛ́kpakũsũna Yudanↄi

7 Kína Asueru kíblena wɛ̃̀ kuri awɛɛpladen a mↄ káaku Nisã gũn, Amana gbɛ̀ kũ òdi pi purimu zù à gu gwà, de à mↄ kũ ani yã pì kɛa dↄ̃ kũ a gↄrↄo. Akũ gugwanaa pìi bò mↄ kuri awɛɛpla kũ òdi pi Ada gũn. 8 Akũ Amana pì kína Asuerunɛ: Buri ke kun a gbɛ̃nↄ fã̀kↄ̃a buri pãndenↄ tɛ́ n bùsu dasinↄ gũn pínki. Ń futɛokarayãnↄ donadona kũ buri kparanↄ pↄ́o, òdi n doka daro. Adi kↄ̃ sí ǹ ń tó tɛɛnɛro. 9 Kí, tó à kɛ̀nnɛ nna, ǹ yã ditɛ de ò láka kũńwo, mani andurufu tↄn wàa pla kpá n ↄgↄ'utɛrinↄa ò ká n aruzɛkɛkatɛkin. 10 Kína a tãnka sèedakɛbↄↄ bò à kpà Amɛdata nɛ́ Amana, Agaga buri Yudanↄ zãngurii pìia 11 à pì: Ǹ kɛ buri pìinɛ lákũ à kɛ̀nnɛ mana nà, ǹgↄ̃ andurufu pì kũna n pↄ́ ũ.

12 Mↄ káaku gↄrↄ kuri awɛɛ'aakↄ̃de zĩ Amana kína takadakɛ̃rinↄ sìsi. Ò yã kũ Amana dìtɛ kína ìbanↄ kũ kína kũ ò kú bùsu kũ bùsuuonↄ, buri kũ burio gbãnadenↄnɛ dà takadan. Ò kɛ̃̀ buri kũ burioonɛ, baadi kũ a yã takao, bùsu kũ bùsuuo kũ a takadakɛ̃na burio. Ò kɛ̃̀ kũ kína Asueru tↄ́o, akũ ò a sèedaa kɛ̀ takada pìia kũ a tãnkao. 13 Ò takada pìnↄ nà zĩ̀rinↄnɛ ń ↄĩ ò ń gbárɛ kína bùsu dasinↄ gũn. Takada pìi gũn ò pì ò Yudanↄ dɛdɛ ò láka kũńwo ò ń buri bo, nɛ́ fíti gbɛ̃ zↄ̃kↄ̃, gↄ̃gbɛ̃nↄ kũ nↄgbɛ̃nↄo gↄrↄ do gũn, mↄ kuri awɛɛplade Ada gↄrↄ kuri awɛɛ'aakↄ̃de zĩ, ò ń pↄ́nↄ kakara. 14 Oni yã kũ à dìtɛ pì takada kpãzã bùsu kũ bùsuuoonɛ pínki de àgↄ̃ de doka ũ, oni a kpàkpa kɛ buri sĩnda pínkinɛ de ògↄ̃ kú soru gũn gↄrↄ pì zĩ. 15 Zĩ̀rinↄ wã̀ ò gɛ̀ɛ gↄ̃̀nↄ yã kũ kína dìtɛ pì yãi, akũ ò a kpàkpaa kɛ̀ Susa wɛ́ran. Kína kũ Amanao vùtɛ òtɛn í gbɛ̃. Susadenↄ sↄ̃ ò bídi kɛ̀ yã pìia.

ƐSITA
<
3
>