Luda yã takada kũ Bisã yão ƐSITA 4

Mↄdekai wɛ́kɛna Ɛsitaa de à lɛ́ da yãn

1 Kũ Mↄdekai yã kũ ò kɛ̀ɛ pìi mà, à a pↄ́kasanↄ gà à kɛ̃̀, akũ à uta kasanↄ kùala à túbu gbɛ̃̀ a mìia, akũ àtɛn kure wɛ̃tɛ gũn àtɛn wɛ̃nda ↄ́ gbãna dↄ. 2 À gɛ̀ɛ ari kínabɛ gãnulɛa, zaakũ gbɛ̃ke dì fↄ̃ à gɛ̃ kínabɛ gãnu gũn kũ uta kasanↄ danaro. 3 Ò yã kũ kína dìtɛ doka ũ pìi kpàkpaa kɛ̀ bùsu kũ bùsuuoonɛ pínki, akũ Yudanↄ nà ↄ́ↄdↄnaaa manamana gu sĩnda pínki kũ lɛ́yĩnaao. Òtɛn wɛ́tɛ̃ kↄ́tɛ òtɛn wɛ̃nda ↄ́ↄ dↄ. Ń gbɛ̃nↄ uta kasanↄ dàda dasi ò túbu gbɛ̃̀ ń mìia.

4 Kũ Ɛsita ìba nↄgbɛ̃nↄ kũ gↄ̃gbɛ̃nↄ sù ò ònɛ, a nɛ̀sɛɛ yàka manamana. À pↄ́kasanↄ kpã̀zã Mↄdekainɛ à da uta kasanↄ gbɛ̀n, ama adi we à sìro. 5 Ataka kũ ò a fɛ̀rɛɛ kɛ̀ɛmɛ dogari kũ kína dìtɛ àgↄ̃ kú Ɛsita sarɛ ũ. Ɛsita a sìsi à a zĩ̀ Mↄdekaia à gɛ́ à a lá: Bↄ́ yã mɛ́ à sùu? Bↄ́ yã mɛ́ à tò àtɛn kɛ lɛɛ? 6 Ataka bò kínabɛ gãnulɛa à Mↄdekai lè. 7 Mↄdekai yã kũ à a le bàbanɛ pínki, akũ à andurufu kũ Amana pì ani ká kína aruzɛkɛkatɛkin Yudanↄ dɛdɛna yãi lɛ́ ònɛ papana. 8 À yã kũ ò dìtɛ Yudanↄ dɛdɛna yã musu kũ ò a kpàkpaa kɛ̀ Susa takada kpàa dↄ de à mↄ Ɛsitanɛ à a bↄkↄtɛnɛ. À pì à o Ɛsitanɛ à gɛ́ kína kĩnaa à kútɛ kɛnɛ à wɛ́ kɛa a gbɛ̃nↄ yã musu. 9 Ataka tà à yã kũ Mↄdekai ò bàba Ɛsitanɛ.

10 Akũ Ɛsita pìnɛ à gɛ́ à yã dí o Mↄdekainɛ: 11 Kía ìbanↄ kũ a bùsu gbɛ̃nↄ dↄ̃ ń pínki kũ tó gↄ̃gbɛ̃ ke nↄgbɛ̃ nà kínai a kpɛ́ gũn, tó adi a sísiro, doka kun mɛ̀n domɛ. Òdi ade dɛmɛ, tó adi kɛ kína a wura gòo dↄ̀ adea de à le àgↄ̃ kun baasiro. Makũ sↄ̃, à kà gↄrↄ baraakuri kũ odi ma sísi mà gɛ́ kína kĩnaaro. 12 Kũ à gɛ̀ɛ à Ɛsita yã pì bàba Mↄdekainɛ, 13 akũ Mↄdekai ɛ̀ra à lɛ́gbãzã kɛ̀nɛ à pì: Ǹsungↄ̃ da mↄkↄ̃n mɛ́ ĩni bo ndo Yudanↄ tɛ́ n kunna kínabɛa yãiro. 14 Tó ń yĩtɛna gↄrↄ díkĩna taka gũn, kpányĩ ni bo gukea à Yudanↄ mì sí à ń bo. Mↄkↄ̃n kũ n de bedenↄ sↄ̃ áni gaga. Tó gↄrↄ díkĩna taka yãimɛ n gↄ̃ kína nanↄ ũ, dí mɛ́ à dↄ̃ↄ? 15 Akũ Ɛsita lɛ́gbãzã kɛ̀ Mↄdekainɛ à pì: 16 Ǹ gɛ́ ǹ Yuda kũ ò kú Susanↄ kakara ń pínki, à lɛ́ yĩ ma yã musu. Àsun pↄ́ blero àsun í miro gↄrↄ aakↄ̃ fãnantɛ̃ kũ gwãanio. Makũ kũ ma ìbanↄ óni lɛ́ yĩ lɛ se. Abire gbɛra mani gɛ́ kína kĩnaa, bee tó má gɛna zɛ́ vĩro. Tó sↄ̃ ma ga, ma gan gwe. 17 Akũ Mↄdekai tà à yã kũ Ɛsita ònɛɛ kɛ̀ pínki.

ƐSITA
<
4
>