Luda yã takada kũ Bisã yão ƐSITA 8

Kína yã pãnde ditɛna Yudanↄ yã musu

1 Zĩ pìian kína Asueru Yudanↄ zãnguri Amana bɛ kpà a nanↄ Ɛsitaa. Ɛsita pì kínanɛ Mↄdekaimɛ a danɛ ũ, akũ Mↄdekai nà kínai. 2 Kína a tãnka kũ à sì Amanaa bò à dà Mↄdekainɛ, akũ Ɛsita Amana bɛ nànɛ a ↄĩ.

3 Ɛsita ɛ̀ra à gɛ̀ɛ yã o kínanɛ dↄ. À wùtɛ a gbá arɛ àtɛn wɛ́tɛ̃ kↄ́tɛ, à kútɛ kɛ̀nɛ de à yã vãni kũ Agaga buri Amana a lɛ́ kpàkũsũ Yudanↄii gboro. 4 Kína wura gò dↄ̀a, akũ à fùtɛ à zɛ̀ a arɛ 5 à pì: Tó ma yã kàngu akũsↄ̃ ma n pↄnna lè, tó yã díkĩna zɛ́ vĩ akũsↄ̃ ma yã kànnɛ, zaakũ Amɛdata nɛ́ Amana, Agaga buri zɛ̀o à Yuda kũ ò kú n bùsu gũnnↄ dɛdɛ ń pínki, ǹ o n takadakɛ̃rinↄnɛ ò takada kɛ̃ ò Amana yã pì litɛ kpɛdangara. 6 Mani kɛ deran mà kisira kũ ani su ma gbɛ̃nↄ le gwaa? Mani kɛ dera mà wɛ́ kɛ pla kũ ma burinↄ dɛdɛnaaoo? 7 Akũ kína Asueru pì a nanↄ Ɛsitanɛ kũ Mↄdekaio: À gwa, ma Amana bɛ kpà Ɛsitaa, akũ ma Amana pìi lòko lía kũ à yã vãni kpàkũsũ Yudanↄi yãi. 8 À takada kɛ̃ Yudanↄ yã musu lákũ à kɛ̀árɛ mana nà. À kɛ̃ kũ ma tↄ́o à ma tãnka sèeda kɛa, zaakũ takada kũ ò kɛ̃̀ kũ ma tↄ́o ò ma tãnka sèedaa kɛ̀a litɛna vĩro. 9 Gwe gↄ̃̀nↄ ò kína takadakɛ̃rinↄ sìsi. Mↄ aakↄ̃de Sivã gↄrↄ baro awɛɛ'aakↄ̃de zĩn ò yã kũ Mↄdekai dìtɛ Yudanↄnɛ kũ kína ìbanↄ kũ kínanↄ kũ bùsu gbãnadenↄo kɛ̃̀ pínki bùsu mɛ̀n basuddo awɛɛsupplanↄnɛ sɛna zaa India bùsun ari à gɛ̀ɛ pɛ́ Etiopia bùsuua. Ò takada kɛ̃̀ bùsu kũ bùsuuo kũ ń takadakɛ̃na burio, buri kũ burio kũ ń yão. Ò takada kɛ̃̀ Yudanↄnɛ kũ ń takadakɛ̃na takao kũ ń buriyão dↄ. 10 Mↄdekai takada kɛ̃̀ kũ kína Asueru tↄ́o à kína tãnka sèedaa kɛ̀a à takada pìnↄ nà zĩ̀rinↄnɛ ń ↄĩ, akũ ò dì sↄ̃ bàalɛri kũ ò bò kína sↄ̃yĩkianↄa ò gɛ̀ɛo.

11 Yã kũ kína dìtɛ pì Yuda kũ ò kú wɛ̃tɛ kũ wɛ̃tɛonↄ gbà zɛ́ ò kↄ̃ kakara ò gí kũ ń zĩdao. Tó buri ke bùsu zĩ̀kari ke lɛ̀tɛḿma kũ ń nɛ́nↄ kũ ń nↄgbɛ̃nↄ, ò ń dɛdɛ ò láka kũńwo ò ń mì dɛ ò ń pↄ́nↄ sɛ́tɛ. 12 À ń gbá zɛ́ ò abire kɛ kína Asueru bùsunↄ gũn pínki mↄ kuri awɛɛplade Ada gↄrↄ kuri awɛɛ'aakↄ̃de zĩn. 13 Ò yã kũ à dìtɛ pì takada kpã̀zã bùsu kũ bùsuuo pínki doka ũ. Ò a kpàkpaa kɛ̀ buri sĩnda pínkinɛ de Yudanↄ gↄ̃ kú soru gũn ò yã yía ń ibɛrɛnↄa zĩ birea. 14 Kína yãditɛna pì yãin zĩ̀rii pìnↄ kɛ̀ likalika dina kína sↄ̃ bàalɛrinↄa ò gɛ̀ɛ. Akũsↄ̃ ò yã pìi kpàkpaa kɛ̀ Susa wɛ́ran. 15 Mↄdekai bò kínabɛa à kíkɛ pↄ́ pura kũ pↄ́ búguo dana, à kífura zↄ̃kↄ̃ kũ ò pì kũ wuraao kuna. À táaru biza arukĩmba tɛ̃ra dana dↄ, akũ Susadenↄ ayuwii kɛ̀ kũ pↄnnao. 16 Gu pù Yudanↄnɛ zĩ birea, òtɛn pↄnna kɛ kũ yáa dↄo, zaakũ ò ń gbá gbãna. 17 Bùsu kũ bùsuuo wɛ̃tɛ kũ wɛ̃tɛo, gu kũ kína yã ditɛnaa pìi kàn pínki Yudanↄ pↄnna kɛ̀ kũ yáa dↄo ò dikpɛ kɛ̀ kũ pↄ́blegbɛ̃naao. Buri pãndenↄ gↄ̃̀ Yudanↄ ũ dasi, kũ vĩna ń kũ Yudanↄ yã musu yãi.

ƐSITA
<
8
>