Luda yã takada kũ Bisã yão ƐSITA 9

Yudanↄ zĩ̀blena ń ibɛrɛnↄa

1 Mↄ kuri awɛɛplade Ada gↄrↄ kuri awɛɛ'aakↄ̃de zĩn yã kũ kína dìtɛ kɛgↄrↄ ũ. Zĩ kũ̀a Yudanↄ ibɛrɛnↄ wɛ́ dↄi yã kũ ò gbãna mↄ Yudanↄnɛ, ama yã pìi lìtɛ kpɛdangara, akũ Yudanↄ gbãna mↄ̀ ń ibɛrɛnↄnɛ. 2 Kína Asueru bùsunↄ gũn pínki Yudanↄ kↄ̃ kàkara fárandi kũ ò kun de ò lɛ́tɛ gbɛ̃ kũ ò yã vãni kpàkũsũńyĩnↄa. Gbɛ̃ke dí fↄ̃ à ń furo, zaakũ buri pãndenↄ tɛn vĩna kɛńnɛ ń pínki. 3 Bùsu gbãnadenↄ, kína ìbanↄ kũ kínɛnↄ kũ a zĩkɛrinↄ ń pínki zɛ̀ Yudanↄ kpɛ, kũ òtɛn vĩna kɛ Mↄdekainɛ yãi. 4 Mↄdekai bɛ̀ɛrɛ vĩ kínabɛa, akũ a tↄ́ dà bùsu sĩnda pínkila, zaakũ a gbãna tɛn karamɛ.

5 Yudanↄ ń ibɛrɛnↄ dɛ̀dɛ kũ fɛ̃nɛdao ò láka kũńwo ń pínki ò ń pↄyeinaa kɛ̀ ń zãngurii pìnↄa. 6 Ò gↄ̃gbɛ̃nↄ dɛ̀dɛ Susa wɛ́ran gbɛ̃nↄn wàa pla kpɛ́ basↄↄro. 7 Ò Pasandata kũ Dalafↄ̃o kũ Asapatao 8 kũ Poratao kũ Adaliao kũ Aridatao 9 kũ Pamasatao kũ Arisaio kũ Aridaio kũ Vaizatao dɛ̀dɛ dↄ. 10 Gbɛ̃ pìnↄ bi Amɛdata nɛ́ Amana, Yudanↄ zãnguri nɛ́gↄ̃gbɛ̃ gbɛ̃nↄn kurinↄmɛ. Bee kũ abireo odi ↄ kɛ ń pↄ́kearo.

11 Zĩ dokↄ̃nↄ pìian ò gbɛ̃ kũ ò ń dɛdɛ Susanↄ dasi lɛ́ gbã̀ kínanɛ. 12 Akũ à pì a nanↄ Ɛsitanɛ: Yudanↄ gↄ̃gbɛ̃nↄ dɛ̀dɛ Susa la gbɛ̃nↄn wàa pla kpɛ́ basↄↄro kũ Amana nɛ́gↄ̃gbɛ̃ gbɛ̃nↄn kurinↄ. Bↄ́n ò kɛ̀ ma bùsu kparanↄ gũn sɛ́ɛ! Yã kpaten ntɛn wɛ́ kɛma dↄↄ? Mani kɛnnɛ. Bↄ́ yãn ntɛn gbɛkamaa? Mani kpámma. 13 Ɛsita wèa à pì: Kína, tó à kɛ̀nnɛ mana, ǹ Yuda kũ ò kú Susa lanↄ gba zɛ́ ò yã kũ n dìtɛ ò kɛ gbãra kɛ zia dↄ, ò Amana nɛ́gↄ̃gbɛ̃ gbɛ̃nↄn kurii pìnↄ loko lía. 14 Kína pì, ò kɛ lɛ. Ò a kpàkpaa kɛ̀ Susa, akũ ò Amana nɛ́ pìnↄ gɛ̀ɛ lòkoloko. 15 Yuda kũ ò kú Susanↄ kↄ̃ kàkara Ada gↄrↄ gɛ̃ro donsaride zĩ, akũ ò gↄ̃gbɛ̃nↄ dɛ̀dɛ dↄ gbɛ̃nↄn wàa do kpɛ́ basↄↄro. Bee kũ abireo odi ↄ kɛ ń pↄ́kearo.

16 Yuda kpara kũ ò kú kína búsunↄ gũnnↄ ń pínki kↄ̃ kàkara de ò gí kũ ń zĩdao ò bo ń ibɛrɛnↄ yãn, akũ ò ń zãngurii pìnↄ dɛ̀dɛ gbɛ̃nↄn dúbu basiikↄ̃ sↄↄro sari. Bee kũ abireo odi ↄ kɛ ń pↄ́kearo. 17 Ò yã pìi kɛ̀ Ada gↄrↄ kuri awɛɛ'aakↄ̃de zĩmɛ, a gↄrↄ gɛ̃ro donsaride zĩn ò kámma bò. Ò gↄrↄ pìi dìtɛ dikpɛ ũ de ò dikpɛ pↄ́ble kɛ ò pↄnna kɛ gↄrↄ pìia.

18 Yuda kũ ò kú Susanↄ kↄ̃ kàkara a gↄrↄ kuri awɛɛ'aakↄ̃de zĩ kũ a gↄrↄ gɛ̃ro donsaride zĩo, akũ ò kámma bò a gↄrↄ gɛ̃rode zĩ. Ò gↄrↄ pìi dìtɛ dikpɛ ũ de ò dikpɛ pↄ́ble kɛ ò pↄnna kɛ gↄrↄ pìiĩ. 19 Abire yãin Yuda búbari kũ ò kú lakutu gũnnↄ dì dikpɛ pì kɛ Ada gↄrↄ gɛ̃ro donsaride zĩ ò dikpɛ pↄ́ble kɛ ò pↄnna kɛ òdi pↄ́ble dakↄ̃nɛ.

Purimu dikpɛ ditɛnaa

20 Mↄdekai yã pìnↄ kɛ̃̀ takada gũn, akũ à kpã̀zã Yuda kũ ò kú kína Asueru bùsuu gũnnↄnɛ ń pínki, gbɛ̃ kũ ò kú kãninↄ kũ gbɛ̃ kũ ò kú zã̀nↄ ń pínki. 21 À dìtɛńnɛ kũ ògↄ̃ dikpɛ pì kɛ wɛ̃̀ kũ wɛ̃̀ɛo Ada gↄrↄ gɛ̃ro donsaride zĩ kũ a gↄrↄ gɛ̃rode zĩo. 22 Gↄrↄ pìnↄmɛ Yudanↄ bona ń ibɛrɛnↄ ↄĩ dikpɛ ũ. Mↄ pìi gũn ń pↄsira lìtɛ pↄnna ũ, ń wɛ̃ndakɛnaa lìtɛ dikpɛkɛna ũ. Ògↄ̃ dikpɛ pì kɛ gↄrↄ pìnↄ zĩ, ògↄ̃ dikpɛ pↄ́ble kɛ ògↄ̃ pↄnna kɛ, ògↄ̃ pↄ́ble dakↄ̃nɛ, ògↄ̃ gba da takasidenↄnɛ. 23 Yudanↄ zɛ̀ kũ yã kũ Mↄdekai kɛ̃̀ńnɛo, akũ dikpɛ kũ ò kɛ̀ pìi gↄ̃̀ńnɛ futɛokarayã ũ.

24 Amɛdata nɛ́ Amana, Agaga buri Yudanↄ pínki zãnguri yã vãni kpàkũsũńyĩ kũ à ń dɛdɛ, akũ à gbɛ̀ kũ òdi pi purimu zù à a gu gwà de à le à ń fu à ń dɛdɛ. 25 Ama kũ kína yã pìi mà kpãni, à yã dìtɛ takada gũn, de yã vãni kũ à a lɛ́ kpàkũsũ Yudanↄii pì ɛra a musu. Akũ ò a lòko lía kũ a nɛ́gↄ̃gbɛ̃nↄ lɛɛlɛ. 26 A yã mɛ́ à tò òdi gↄrↄ pìnↄ sísi Purimu, zaakũ gbɛ̀ kũ à zù à a gu gwà tↄ́n gwe. Yã kũ Mↄdekai kɛ̃̀ takada pìi gũn kũ yã kũ à ń lénↄ yãin 27 ò sì kũ ò dikpɛ kɛ gↄrↄ pla pìnↄ gũn wɛ̃̀ kũ wɛ̃̀ɛo. Ò pì mↄ́kↄ̃nↄ kũ ń nɛ́nↄ kũ gbɛ̃ kũ ò nàḿmanↄ ni gí dikpɛ pì kɛiro, ògↄ̃ kɛ a gↄrↄa lákũ ò kɛ̃̀ takadan nà. 28 Wɛ̃̀ kũ wɛ̃̀ɛo gↄrↄ pìnↄ yã gↄ̃ dↄńgu, ògↄ̃ a dikpɛ kɛ ↄn kũ ↄnnwo wɛ̃tɛ kũ wɛ̃tɛo bùsu kũ bùsuuo, de Purimu dikpɛ pì sún láka Yudanↄ kĩnaaro yãi, a kɛgↄrↄ sún mì dɛ ń burinↄaro.

29 Kína nanↄ Ɛsita, Abihaili nɛ́ takada plade kɛ̃̀ kũ a ikooo pínki Purimu yã musu, à gbãna kpào takada kũ Yuda buri Mↄdekai kɛ̃̀a. 30 Mↄdekai takada pìi kpã̀zã Yuda kũ ò kú kína Asueru bùsu mɛ̀n basuddo awɛɛsuppla gũnnↄnɛ. À kunna aafia kũ laakarikpatɛnaao yã òńnɛ, 31 akũ à Purimu dikpɛ pìi dìtɛ a gↄrↄa, lákũ àpii kũ kína nanↄ Ɛsitao dìtɛńnɛ nà, lákũ mↄ́kↄ̃nↄ sↄ̃ ò sì ò kɛ nà kũ ń burinↄ ń kpɛ kũ lɛ́yĩnaao kũ ↄ́ↄdↄo. 32 Yã kũ Ɛsita dìtɛ pì gbãna kpà Purimu doka pìnↄa, akũ ò kɛ̃̀ takadan.

ƐSITA
<
9
>