Luda yã takada kũ Bisã yão BONAA 17

Í bona gbɛ̀n

(Nar 20:2-13)

1 Isarailanↄ fùtɛ Sini gbárannan ń pínki, òtɛn bùra kátɛkatɛ lákũ Dikiri òńnɛ nà, akũ ò gɛ̀ɛ ò bùraa kàtɛ Rɛfidimu. Odi í le ò mì gwero, 2 akũ ò zuka kà Musai ò pì: Ǹ ó gba í ò mi. À pìńnɛ: Bↄ́yãi átɛn lɛ́kpakↄ̃ana kɛ kũmaoo? A kɛ̀ dera átɛn Dikiri lɛ́ à gwaa? 3 Kũ ími tɛni ń dɛ, akũ ò zuka kà Musai ò pì: Bↄ́yãi n bo kũoo Misilai? Ń ye ími ó dɛ kũ ó nɛ́nↄ kũ ó pↄ́kãdenↄon yá? 4 Akũ Musa wiki lɛ̀ Dikiria à pì: Deran mani kɛ kũ gbɛ̃ pìnↄ nàa? À gↄ̃̀ fíti kũ oni ma pápa kũ gbɛ̀ɛo ò ma dɛ. 5 Dikiri pìnɛ: Ǹ Isaraila gbɛ̃ zↄ̃kↄ̃nↄ sɛ́tɛ à do gbɛ̃ pìnↄnɛ arɛ. Ǹ n gò kũ n Nili lɛ̀o sɛ́ dↄ. 6 Mani zɛ n arɛ Orɛbu gbɛ̀si sarɛ gwe. Ǹ gbɛ̀si pì lɛ́, í ni bo de ò mi. Akũ Musa kɛ̀ lɛ Isaraila gbɛ̃ zↄ̃kↄ̃nↄ wára. 7 Akũ ò tↄ́ kpà gu pìinɛ Masa, zaakũ gwen ò Dikiri lɛ̀n ò gwà ò pì: Dikiri kú kũoomɛ gwe yá? Ò tↄ́ kpànɛ Mɛriba dↄ, kũ Isarailanↄ zuka kà gwe yãi.

Zĩ̀kana kũ Amalɛkinↄ

8 Amalɛkinↄ sù zĩ̀ ká kũ Isarailanↄ Rɛfidimu. 9 Akũ Musa pì Yↄsuanɛ: Ǹ gbɛ̃nↄ sɛ́ ó tɛ́ à gɛ́ zĩ̀ ká kũ Amalɛkinↄ. Zia manigↄ̃ zɛna sĩ̀sĩ dí mìsↄ̃ntɛa kũ Luda gòoo kũna. 10 Yↄsua kɛ̀ lákũ Musa ònɛ nà, à gɛ̀ɛ zĩ̀ ká kũ Amalɛkinↄ. Akũ Musa kũ Harunao kũ Uruo dìdi sĩ̀sĩi pìi mìsↄ̃ntɛa. 11 Tó Musa a ↄnↄ sɛ̀, Isarailanↄ dìgↄ̃ zĩ̀ ble Amalɛkinↄamɛ, ama tó à a ↄnↄ dìtɛ sↄ̃, Amalɛkinↄ dìgↄ̃ zĩ̀ ble Isarailanↄa. 12 Kũ Musa ↄnↄ wã̀, ò gbɛ̀ɛ sɛ̀ ò dìtɛ a gbáru à vùtɛa, akũ Haruna kũ Uruo a ↄnↄ kũkũna, gbɛ̃ do ↄplai, gbɛ̃ do ↄzɛi, akũ a ↄnↄ gↄ̃̀ zɛna ari ifãntɛ̃ gɛ̀ɛ à gɛ̃̀o kpɛ́n. 13 Akũ Yↄsua zĩ̀i blè Amalɛkinↄa à ń dɛdɛ kũ fɛ̃nɛdao.

14 Dikiri pì Musanɛ: Ǹ adikĩna kɛ̃ takada gũn de àgↄ̃ de dↄngu pↄ́ ũ ǹ o Yↄsuanɛ, zaakũ mani Amalɛkinↄ buri bo andunia gũn ń pínki. 15 Musa gbagbaki bò, akũ à tↄ́ kpànɛ Dikirimɛ ma tuta ũ 16 à pì: Ma ↄ sɛ̀ Dikiri kpata kpa. Dikiri nigↄ̃ zĩ̀ ká kũ Amalɛkinↄ gↄrↄ sĩnda pínki.

BONAA
<
17
>