Luda yã takada kũ Bisã yão BONAA 18

Yɛtoro gɛna Musa gwa

1 Musa anzure Yɛtoro, Midiã sa'ori, yã kũ Luda kɛ̀ Musanɛ kũ a gbɛ̃ Isarailanↄ mà, lákũ Dikiri ń bↄ́tɛ Misila nà. 2 À sù à lè Musa gĩnakɛ à a nanↄ Zipora zĩ̀ bɛ 3 kũ a nɛ́gↄ̃gbɛ̃ mɛ̀n planↄ. A do tↄ́n Gɛsↄmu, zaakũ Musa pì gbɛ̃ zĩ̀tↄn a ũ dakenↄ bùsun. 4 A do tↄ́n Ɛliɛza, zaakũ Musa pì a de Luda a faaba kɛ̀ à a bo Firi'auna fɛ̃nɛda lɛ́i. 5 Akũ Yɛtoro fùtɛ àtɛn su Musa kĩnaa kũ a nɛ́nↄ kũ a nanↄo gu kũ à bùraa kàtɛn Luda kpi sarɛ gbárannan. 6 À lɛ́gbãzã kɛ̀ Musanɛ à pì: Matɛn su n kĩnaa kũ n nanↄo kũ n nɛ́ mɛ̀n planↄo. 7 Musa bò à gɛ̀ɛ à dà a anzurelɛ à kùtɛ à lɛ́ pɛ̀a. Ò kↄ̃ aafiaa gbɛ̀ka, akũ ò gɛ̃̀ kpɛ́n. 8 Musa yã kũ Dikiri kɛ̀ Firi'aunanɛ kũ Misilanↄ Isarailanↄ yãi bàbanɛ pínki kũ wari kũ à ń lé zɛ́ gũnnↄ pínki kũ lákũ Dikiri ń bó nào. 9 Yɛtoro pↄ kɛ̀ nna yã mana kũ Dikiri kɛ̀ Isarailanↄnɛɛa pínki kũ lákũ à ń bó Misilanↄ ↄĩ nào. 10 Akũ à pì: Ò Dikiri sáabu kpá lákũ à á bó Firi'auna kũ Misilanↄ ↄĩ nà. 11 Má dↄ̃̀ sà kũ Dikiri zↄ̃kↄ̃ de tãnanↄla ń pínki. Kũ Misilanↄ ĩa dã̀áwa, à yã mↄ̀ńnɛ. 12 Akũ Yɛtoro sa'opↄ kũ òdi ká tɛ́n à tɛ́ kũ ò Ludaa kũ sa'opↄ pãndenↄ dↄ. Akũ Haruna kũ Isaraila gbɛ̃ zↄ̃kↄ̃nↄ ń pínki ò sù ò pↄ́ blè kãao Luda arɛ.

Yãgↄ̃gↄ̃rinↄ ditɛnaa

13 Kũ gu dↄ̀ Musa vùtɛ àtɛn yã gↄ̃gↄ̃ńnɛ, ò katɛnai zaa kↄnkↄ ari ↄkↄsi. 14 Kũ Musa anzure yã kũ àtɛn kɛńnɛ è pínki, akũ à a là à pì: Bↄ́n ntɛn kɛ kũ gbɛ̃ dínↄ lɛɛ? Bↄ́yãi ntɛn yãkpatɛ kɛńnɛ ndo, gbɛ̃ sĩnda pínki katɛnanyĩ zaa kↄnkↄ ari ↄkↄsii? 15 Musa wèa à pì: Gbɛ̃nↄ dì su ma kĩnaa ò Luda pↄyenyĩna yã mamɛ. 16 Tó ò yãkete vĩ, òdi su ma kĩnaa mà yã pì gↄ̃gↄ̃ńnɛ mà Luda doka kũ à dìtɛnↄ ońnɛ.

17 Musa anzure pìnɛ: Yã kũ ntɛn kɛ manaro. 18 Ĩni kpasa, gbɛ̃ kũ ò kú kũnwonↄ ni kpasa dↄ, zaakũ zĩ pì denla, ĩni fↄ̃ ǹ kɛ ndoro. 19 Ǹ ma yã ma sà, mani lɛ́ damma, Luda nigↄ̃ kú kũnwo. Ĩnigↄ̃ deńnɛ yãgↄ̃gↄ̃ri ũ, ĩnigↄ̃ gɛ́ kũ ń yãnↄ Luda kĩnaa, 20 ĩnigↄ̃ doka kũ Luda dìtɛnↄ dańnɛ, ĩnigↄ̃ zɛ́ kũ à de ò sɛ́ mↄńnɛ kũ yã kũ oni kɛnↄ. 21 Ǹ gbɛ̃ laakaride náanide kũ ò Luda vĩna vĩ akũ òdi gusarɛgba síronↄ sɛ́ ń tɛ́, ǹ ń ditɛ gbɛ̃nↄn wàa sↄsↄↄronↄ don'arɛdenↄ ũ kũ gbɛ̃nↄn basↄsↄↄroo kũ gbɛ̃nↄn bupla akurio kũ gbɛ̃nↄn kurikurio, 22 de ògↄ̃ yã gↄ̃gↄ̃ gbɛ̃ pìnↄnɛ gↄrↄ sĩnda pínki. Oni su n kĩnaa kũ yã zĩ'ũnↄ pínki, ama oni yã fítinnanↄ gↄ̃gↄ̃ ń zĩda. Abire mɛ́ ani n aso lagonnɛ. 23 Tó Dikiri wènnɛ, tó n kɛ̀ lɛ, ĩni fuaro, gbɛ̃ pìnↄ ni tá bɛ kũ laakariio kpatɛna.

24 Musa a anzure yã mà à kɛ̀ lákũ à òarɛ nà pínki. 25 À gbɛ̃ laakaridenↄ sɛ̀ Isaraila burinↄ tɛ́ pínki à ń dítɛ gbɛ̃nↄn wàa sↄsↄↄronↄ don'arɛdenↄ ũ kũ gbɛ̃nↄn basↄsↄↄroo kũ gbɛ̃nↄn bupla akurio kũ gbɛ̃nↄn kurikurio. 26 Akũ òdigↄ̃ yã gↄ̃gↄ̃ńnɛ gↄrↄ sĩnda pínki. Yã zĩ'ũn òdi suo Musa kĩnaa, akũ òdi yã fítinnanↄ gↄ̃gↄ̃ ń zĩda. 27 Musa gɛ̀ɛ à zɛ̀ a anzureenɛ, akũ à tà a bùsun.

BONAA
<
18
>