1 Dikiri yã ò Musanɛ à pì: 2 Ǹ ma! Ma Uri nɛ́ Bezalɛli, Uru daikore, Yuda buri sɛ̀. 3 Ma tò ma Nini kúa, akũ à ↄ̃ndↄ̃ kũ gonio kũ dↄ̃naao lè ↄzĩ pínki gũn. 4 À zãble pↄ́nↄa dↄ̃ kũ wuraao kũ andurufuuo kũ mↄ̀gotɛ̃o. 5 À gbɛ̀ bɛ̀ɛrɛde ana dↄ̃ kũ a dana pↄ́ gũnwo kũ lí'anaao kũ ↄzĩ sĩnda pínkio. 6 Abire gbɛra ma Aisamaki nɛ́ Ɔↄliabu, Dã buri dìtɛ a kpanyĩri ũ. Ma ↄzĩkɛrinↄ gbà ↄ̃ndↄ̃ ń pínki, de ò le ò pↄ́ kũ ma dìtɛnnɛnↄ kɛ pínki: 7 Dakarɛki kuta kũ doka àkpatiio kũ a nɛ́kparɛo kũ kpɛ́ pì pↄ́ ketenↄ pínki, 8 teburu kũ a pↄ́ ketenↄ, wura atɛ̃nɛ fitiladibↄ kũ a pↄ́ ketenↄ pínki, turaretitikpataki, 9 sa'opↄ kũ òdi ká tɛ́n à tɛ́ kũ oki kũ a pↄ́ ketenↄ pínki, dàga kũ a dibↄↄo, 10 pↄ́kasa kũ ò tã̀nↄ, sa'ori Haruna pↄ́kasa kũ ani naomainↄ kũ a nɛ́nↄ sa'opↄkasanↄ pínki, 11 pↄ́ sakɛnísi kũ bizakuta turaretiti gbĩ nnannao. Ò pↄ́ pìnↄ kɛ lákũ ma dìtɛnnɛ nà pínki.

12 Dikiri yã ò Musanɛ à pì: 13 Ǹ o Isarailanↄnɛ ò kámmabogↄrↄ kũ ma dìtɛ yã da, zaakũ à de sèeda ũ makũ kũ ákↄ̃nↄ dagura ari á buria, de à le à dↄ̃ makũ Dikiri ma á sɛ́ ma gbɛ̃nↄ ũ. 14 Àgↄ̃ kámmabogↄrↄ pì yã da, zaakũ gↄrↄ pì kúárɛ adonamɛ. Gbɛ̃ kũ à gↄrↄ pìi tɛ̃̀ɛ kɛ̀, ade gàmɛ. Gbɛ̃ kũ à zĩ kɛ̀ gↄrↄ pìia, ò ade bo a gbɛ̃nↄ tɛ́ ò a dɛ. 15 Àgↄ̃ zĩ kɛ gↄrↄ suddo, a gↄrↄ suppladen áni kámma bo, zaakũ makũ Dikiri ma pↄ́mɛ. Gbɛ̃ kũ à zĩ kɛ̀ kámmabogↄrↄaa gàmɛ. 16 Isarailanↄ gↄ̃ kámmabogↄrↄ pì yã kũna ò ditɛ gↄrↄ zↄ̃kↄ̃ ũ ari ń buria ma bàka kunna kũńwo yã ũ. 17 Anigↄ̃ de sèeda ũ makũ kũ Isarailanↄ dagura gↄrↄ sĩnda pínki, zaakũ makũ Dikiri ma musu kũ anduniao kɛ̀ gↄrↄ suddomɛ, akũ ma làka ma kámma bò a gↄrↄ supplade zĩ. 18 Kũ Dikiri yã ò Musanɛ Sinai kpi musu à làka, akũ à dokayã kɛ̃̀ gbɛ̀ anlonↄa mɛ̀n pla kũ a zĩda ↄnɛo à kpàa.