Luda yã takada kũ Bisã yão BONAA 32

Wura zùsanɛ bↄ̀rↄↄ

1 Kũ gbɛ̃nↄ è Musa dí kipa kpia likalikaro, ò kàkara Harunai ò pìnɛ: Ǹ futɛ ǹ tãna kenↄ kɛwɛrɛ ò dowɛrɛ arɛ, zaakũ Musa kũ à ó bↄ́tɛ Misila pìi, ó dↄ̃ yã kũ à a lèro. 2 Akũ Haruna pìńnɛ: À á nↄgbɛ̃nↄ wura pↄ́sãnↄ bↄtɛ kũ á nɛ́gↄ̃gbɛ̃nↄ pↄ́nↄ kũ á nɛ́nↄgbɛ̃nↄ pↄ́nↄ à suomɛnɛ. 3 Akũ ń pínki a wura pↄ́sãnↄ bòbo ò kpà Harunaa. 4 À sì à kàsa lán zùsanɛ bà, akũ à lↄ̀lↄ. Akũ ò pì: Isarailanↄ, á tãnan di! Àkũ mɛ́ à á bↄ́tɛ Misila. 5 Kũ Haruna è lɛ, à sa'oki bò zùu pì arɛ, akũ à kpàkpaa kɛ̀ à pì: Dikiri dikpɛ kun zia. 6 Kũ gu dↄ̀, gbɛ̃nↄ fùtɛ ò sa'opↄ kũ òdi ká tɛ́n à tɛ́ kũ òa kũ kɛnnakũkↄ̃o sa'opↄo. Gbɛ̃nↄ vùtɛ òtɛn pↄ́ ble òtɛn í mi, akũ ò fùtɛ òtɛn pãpã kɛ.

7 Akũ Dikiri pì Musanɛ: Ǹ kipa ǹ gɛ́! N gbɛ̃ kũ n bo kũńwo Misilanↄ yàka. 8 Ò kɛ̃̀ zɛ́ kũ ma mↄ̀ńnɛa likalika, ò wuraa kàsa tãna ũ lán zùsanɛ bà, ò kùtɛnɛ ò sa òa ò pì, Isarailanↄ tãna kũ à ń bↄ́tɛ Misilan gwe. 9 Akũ Dikiri ɛ̀ra à pì Musanɛ: Ma è gbɛ̃ pìnↄ sã gbãnamɛ. 10 Ǹ gomala de mà a pↄfɛ̃ kipaḿma mà ń kakatɛ, ama mani n burinↄ kɛ dasi. 11 Akũ Musa kútɛ kɛ̀ Dikiri a Ludanɛ à pì: Dikiri, bↄ́yãin ntɛn pↄfɛ̃ kipa n gbɛ̃nↄa kũ n ń bↄ́tɛ Misila kũ n gbãna purao kũ n gã̀sã gbãnaoo? 12 Misilanↄ ni pi ń kakatɛna yãin n ń bↄ́tɛ, de ǹ le ǹ ń dɛdɛ kpinↄ musu ǹ ń láka andunia gũn. Ǹ n pↄfɛ̃ kpátɛ ǹ yã kũ ń ye ǹ kipa n gbɛ̃nↄaa pì bo n nɛ̀sɛn. 13 Ǹ dↄ n zↄ̀blerinↄ Ibrahĩ kũ Isaakuo kũ Isarailao yãn, zaakũ n la dàńnɛ kũ n zĩdao n pì, ĩni ń buri kara lán susunɛnↄ bà, ĩni bùsu kũ n a yã òńnɛ kpá ń burinↄa ògↄ̃ vĩ gↄrↄ sĩnda pínki. 14 Akũ Dikiri yã kũ à pì áni kipa a gbɛ̃nↄaa pìi bò a nɛ̀sɛn.

15 Musa ɛ̀ra à kìpa kpia, à doka gbɛ̀ anlo mɛ̀n pla pìnↄ kũna a ↄĩ. Yã kɛ̃na gbɛ̀ɛ pìnↄa kpa plapla pínki. 16 Luda mɛ́ à gbɛ̀ anlo pìnↄ à, àkũ mɛ́ à yã kɛ̃̀ḿma. 17 Yↄsua gbɛ̃nↄ wiki mà, akũ à pì Musanɛ: Ǹ zĩ̀ wiki ma dↄ bùran. 18 Musa pì: Kùwiki mɛ́ à dↄ gwero, wɛ̃nda ↄ́ↄ dↄn gwe sↄ̃ro, gbɛ̃nↄ lɛ̀sinaan matɛn ma. 19 Kũ à kà kãni kũ bùraao, à è òtɛn ũ wã zùsa pì arɛ, akũ à pↄ fɛ̃̀. À gbɛ̀ anlo kũ à kũnaa pìnↄ pã̀tɛ kpigɛrɛɛi gwe, ò wìwi. 20 Akũ à zùsa kũ ò pìi pìi sɛ̀ à dà tɛ́n. À a títi bò, akũ à kà ín à kpà Isarailanↄa, ò mì. 21 Akũ Musa Haruna là à pì: Bↄ́n gbɛ̃ pìnↄ kɛ̀nnɛ, gbasa n tò ò durunna zↄ̃kↄ̃ dí taka kɛ̀ɛ? 22 Akũ à wèa à pì: Ǹsun pↄ fɛ̃ro, mare. Ń gbɛ̃ pìnↄ dↄ̃, kũ ò vãni. 23 Mↄ́kↄ̃nↄ mɛ́ ò pìmɛnɛ mà tãna ke kɛ à dońnɛ arɛ. Ò pì Musa kũ à á bↄ́tɛ Misila pìi, ò dↄ̃ yã kũ à a lèro. 24 Akũ ma pìńnɛ gbɛ̃ kũ ò wura vĩnↄ bↄtɛ ò suo. Kũ ò sùo, akũ ma kà tɛ́n, akũ à bò zùsanɛ́ bↄ̀rↄↄ pì ũ.

25 Musa è Haruna tò gbɛ̃nↄ tɛni ń pↄyeina kɛ, akũ ò gↄ̃̀ lalandi pↄ́ ũ ń ibɛrɛnↄnɛ. 26 Akũ à zɛ̀ bùra zɛ́lɛa à pì: Gbɛ̃ kũ ò kú Dikiri kpanↄ su ma kuru. Akũ Levi burinↄ kàkara a kuru. 27 À pìńnɛ: Dikiri Isarailanↄ Luda pì, á baadi a fɛ̃nɛda loko à dodo bùraai zɛ́lɛ kũ zɛ́lɛo, á baadi a gbɛ̃nↄ kũ a gbɛ̃nnanↄ kũ a gbɛ̃dakenↄ dɛdɛ. 28 Levi burinↄ kɛ̀ lákũ Musa dàńnɛ nà. Gbɛ̃ kũ ò ń dɛdɛ zĩ pìianↄ kà gbɛ̃nↄn dúbu aakↄ̃ taka bà. 29 Akũ Musa pì Levi buri pìnↄnɛ: Lákũ a bo á nɛ́nↄ kũ á gbɛ̃nↄ kpɛ nà, a á zĩda kpà Dikiria gbãra, Dikiri arubarikaa dàágu gbãran gwe.

Musa kutɛkɛna Dikirinɛ Isarailanↄnɛ

30 Kũ gu dↄ̀ Musa pì Isarailanↄnɛ: A durunna zↄ̃kↄ̃ↄ kɛ̀, bee kũ abireo mani ɛra mà didi kpia mà gɛ́ Dikiri kĩnaa dↄ, òdigↄ̃ dↄ̃ro ke mani le mà kútɛ kɛnɛárɛ á durunna yã musu. 31 Akũ à ɛ̀ra à gɛ̀ɛ Dikiri kĩnaa à pì: N yã nna! Gbɛ̃ pìnↄ durunna zↄ̃kↄ̃ↄ kɛ̀, ò tãna ke kɛ̀ ń zĩdanɛ kũ wuraao. 32 Ǹ sùru kɛ! Ǹ ń durunna kɛ̃ḿma. Tó lɛnlo, ǹ ma tↄ́ warawara takada kũ n kɛ̃̀ɛ gũn. 33 Dikiri pìnɛ: Gbɛ̃ kũ à durunna kɛ̀mɛnɛ tↄ́n mani warawara ma takada gũn. 34 Ǹ gɛ́ kũ gbɛ̃nↄ gu kũ ma ònnɛn sà. Ma Malaika ni donnɛ arɛ. Bee kũ abireo tó ma wɛ́tãmmana gↄrↄ kà, mani wɛ́ tãḿma ń durunna yãi. 35 Akũ Dikiri gagagyã kà gbɛ̃nↄgu zùsanɛ kũ ò tò Haruna pìi pì yãi.

BONAA
<
32
>