Luda yã takada kũ Bisã yão NAANAA 18

Nibↄnↄ suna Ibrahĩ kĩnaa

1 Dikiri bò à sù Ibrahĩa Mamare gbiri línↄ sarɛ. Ibrahĩ vutɛna a bizakuta kpɛ́lɛlɛa fãnantɛ̃. 2 Kũ à wɛ́ sɛ̀ musu, à gbɛ̃nↄn aakↄ̃ è zɛna. Kũ à ń é lɛ, akũ à fùtɛ kpɛ́lɛlɛa kũ bàao à gɛ̀ɛ à dàńlɛ à wùtɛ a nɛ̀sɛlɛ kutɛna 3 à pì: Dikiri, tó ma n pↄnna lè, ǹsun gɛ̃ makũ n zↄ̀blerilaro. 4 Mani suárɛ kũ ío à gbá pípi à kámma bo lí gbáru la. 5 Lákũ a bↄtɛ ma bɛ kpa nà, mani suárɛ kũ pↄ́bleo fíti de à gbãna le gbasa à da zɛ́n. Akũ ò pì: Tↄ̀, ǹ kɛ lákũ n ò nà. 6 Akũ à gɛ̀ɛ Sara kĩnaa kutan à pì: Ǹ flawa dã zaka lɛ́ aakↄ̃ ǹ burodi kɛ likalika. 7 Akũ à bàa lɛ̀ à gɛ̃̀ a zùnↄ tɛ́ à zùnɛ bↄ̀rↄ mana kũ̀ à kpà a zĩkɛriia, akũ zĩkɛrii pìi gɛ̀ɛ à kɛ̀kɛ likalika. 8 Akũ Ibrahĩ vĩfãani kũ vĩ'ipuo kũ zù kũ ò kɛ̀kɛɛ pìioo sɛ̀ à gɛ̀ɛ à dìtɛńnɛ. Gↄrↄ kũ òtɛn pↄ́ ble, api zɛ ń sarɛ lí gbáru gwe.

9 Akũ ò a là ò pì: N nanↄ Sara kú mámɛɛ? À pì: À kú kutan gwe. 10 Akũ Dikiri pì: Mani ɛra mà su n kĩnaa ziki mandara'i, n nanↄ Sara ni nɛ́ i gↄ̃gbɛ̃ ũ. Sara kú a kpɛ kuta kpɛ́lɛlɛa àtɛn ma. 11 Ibrahĩ kũ Sarao zĩ kũ̀, Sara dì nↄgbɛ̃nↄ pↄ́ kɛ doro. Akũ Sara yáa dↄ̀ à pì a swɛ̃̀ɛ gũn: 12 Ma zĩ kũ̀, akũ ma dikiri zĩ kũ̀ dↄ. Mani pↄnna yã pì dↄ̃ dↄ yá? 13 Akũ Dikiri Ibrahĩ là à pì: À kɛ̀ dera Sara yáa dↄ̀ↄ? À pì akũ kũ a zĩ kũ̀ áni fↄ̃ à nɛ́ i dↄ yá? 14 Yãke dìgↄ̃ zĩ'ũmɛnɛro. Ziki mandara'i tó a gↄrↄ kà, mani su n kĩnaa, gbasa Sara nɛ́ i gↄ̃gbɛ̃ ũ. 15 Akũ Sara ledi kpà à pì ádi yáa dↄro, zaakũ vĩna a kũ̀. Akũ Dikiri pì: É'e! N yáa dↄ̀.

Ibrahĩ aduakɛna Sↄdↄmunɛ

16 Kũ gbɛ̃ pìnↄ fùtɛ, Ibrahĩ gɛ̀ɛ à zɛńnɛ, akũ ò Sↄdↄmu kpa gwà. 17 Akũ Dikiri pì: Mani yã kũ má ye mà kɛ utɛ Ibrahĩnɛro. 18 A burinↄ nigↄ̃ zↄ̃kↄ̃ onigↄ̃ gbãna vĩ. Andunia buri sĩnda pínki ni arubarika le a gãimɛ. 19 Zaakũ ma a sɛ̀, de à o a nɛ́nↄnɛ kũ a burinↄ a gbɛra ògↄ̃ ma yã kũna ò yã mana zɛ́de kɛ, de mà yã kũ ma a lɛ́ sɛ̀nɛ kɛnɛ. 20 Akũ Dikiri ɛ̀ra à pì: Yã kũ òtɛn o Sↄdↄmu kũ Gↄmↄrao musu dasi, ń durunna gɛ̃̀ ↄla. 21 Mani gɛ́ gwe sà mà gwa, tó yã kũ òtɛn kɛ vãni lákũ ma mà nà. Tó ò de lɛ sↄ̃ro, mani dↄ̃.

22 Kũ ń gbɛ̃nↄn pla pìnↄ dà zɛ́n òtɛn gɛ́ Sↄdↄmu, akũ Dikiri gↄ̃̀ kũ Ibrahĩo gwe. 23 Akũ Ibrahĩ nài à pì: Ĩni gbɛ̃ mananↄ wara lɛɛlɛ kũ gbɛ̃ vãninↄn yá? 24 Tó gbɛ̃ mananↄn kú wɛ̃tɛ pìi gũn ò kà gbɛ̃nↄn bupla akuri, ĩni ń waran yá? Ĩni sùru kɛ kũ wɛ̃tɛ pìio gbɛ̃ mana gbɛ̃nↄn bupla akurii pìnↄ yãiroo? 25 Ǹ sùru kɛ! Ǹsun kɛ lɛro. Ǹsun gbɛ̃ mananↄ dɛdɛ lɛɛlɛ kũ gbɛ̃ vãninↄro, zaakũ ò dokↄ̃nↄro. Ǹ sùru kɛ! Ǹsun kɛ lɛro. Mↄkↄ̃n kũ ń de andunia pínki yãkpatɛkɛri ũ, ĩni yã kɛ a zɛ́aroo? 26 Akũ Dikiri pì: Tó ma gbɛ̃ mananↄ è Sↄdↄmu gbɛ̃nↄn bupla akuri, mani sùru kɛ kũ wɛ̃tɛ pìio ń yãi. 27 Akũ Ibrahĩ ɛ̀ra à pì dↄ: Makũ kũ má de bùsutiti kũ túbuo ũ, ǹ gaafara kɛmɛnɛ mà yã onnɛ, Dikiri. 28 Tó gbɛ̃nↄn sↄↄro kĩ̀a gbɛ̃nↄn bupla akurii pìi gũn, gbɛ̃nↄn sↄↄro pìnↄ yãi ĩni wɛ̃tɛ pì kakatɛ yá? Akũ Dikiri pì: Tó ma gbɛ̃ mananↄ è gbɛ̃nↄn bupla awɛɛsↄↄro, mani wɛ̃tɛ pì kakatɛro. 29 Akũ Ibrahĩ kpɛ́ àtɛn yã onɛ à pì: Tó gbɛ̃ mananↄ kà bupla sↄ̃ bi? Akũ Dikiri pì: Mani yãke kɛro gbɛ̃nↄn bupla pìnↄ yãi. 30 Akũ à pì: Dikiri, n yã nna! Ǹsun pↄ fɛ̃ro, má ye mà yã o dↄ. Tó gbɛ̃ mananↄ kà baraakuri sↄ̃ bi? À wèa à pì: Tó ma gbɛ̃ mananↄ è ò kà gbɛ̃nↄn baraakuri, mani yãke kɛro. 31 Akũ à pì: Ǹ gaafara kɛmɛnɛ dↄ Dikiri, mà yã onnɛ. Tó gbɛ̃ mananↄ kà gbɛ̃nↄn baro sↄ̃ bi? À wèa à pì: Mani wɛ̃tɛ pì kakatɛro gbɛ̃nↄn baro pìnↄ yãi. 32 Akũ à pì: Dikiri, ǹsun pↄ fɛ̃ro, yã díkĩna baasi mani yã o doro. Tó gbɛ̃ mananↄ kà gbɛ̃nↄn kuri sↄ̃ bi? À wèa à pì: Mani wɛ̃tɛ pì kakatɛro gbɛ̃nↄn kurii pìnↄ yãi. 33 Kũ Dikiri yã ò Ibrahĩnɛ à làka, à gɛ̃̀ zɛ́la, akũ Ibrahĩ ɛ̀ra à tà bɛ.