Luda yã takada kũ Bisã yão NAANAA 19

Sↄdↄmu kũ Gↄmↄrao kakatɛnaa

1 Kũ malaika gbɛ̃nↄn pla pìnↄ kà Sↄdↄmu ↄkↄsi, Lutu vutɛna Sↄdↄmu bĩni kpɛ́lɛlɛa. Kũ à ń é, à fùtɛ à gɛ̀ɛ à dàńlɛ à kùtɛńnɛ à wùtɛ a nɛ̀sɛlɛ kutɛna 2 à pì: Ma dikirinↄ, á yã nna! À mↄ́ à gɛ́ kipa makũ á zↄ̀bleri bɛa. À zú o à i la, zia kↄnkↄ káakukaaku á da zɛ́n. Ò pì: Oi, óni i gãnulɛamɛ. 3 Lutu nàkaraḿma manamana, akũ ò gɛ̃̀ a kpɛ́n. À ń yàrii kɛ̀ manamana à masaa kɛ̀ńnɛ, akũ ò sò.

4 Ari ògↄ̃ gɛ́ wútɛ, Sↄdↄmudenↄ lìka Lutu kpɛ́i. Wɛ̃tɛ pì gↄ̃gbɛ̃nↄ kàkara gwe mámmam, kɛfɛnnanↄ kũ gbɛ̃ zↄ̃kↄ̃nↄ ń pínki. 5 Ò lɛ́ zù Lutui ò pì: Gↄ̃gbɛ̃ kũ ò kìpa n bɛa ↄkↄsialanↄn kú máa? Ǹ bↄtɛ kũńwowɛrɛ, ò pãpã kɛ kũńwo. 6 Lutu bò à zɛ̀ kpɛ́lɛlɛa ń kĩnaa, à gbàa tàta kũ kpɛo 7 à pì: Á'a ma gbɛ̃nↄ, àsun yã bɛ̃̀nɛ kɛro. 8 Má nɛ́nↄgbɛ̃nↄ vĩ gbɛ̃nↄn pla kũ ò gↄ̃gbɛ̃ dↄ̃ro, mani ń bↄtɛárɛ. Lákũ á yei nà à kɛ kũńwo, ama àsun yãke kɛ gↄ̃gbɛ̃ díkĩnanↄnɛro, zaakũ ò kìpa ma bɛamɛ. 9 Ò pìnɛ: Ǹ gowɛrɛ gwe! Akũ ò pì dↄ: Gbɛ̃ dí bi gbɛ̃ zĩ̀tↄↄmɛ, akũ à ye à kɛ ó yãkpatɛkɛri ũ. Óni yã vãni kɛnnɛ de ń pↄ́la. Akũ ò kùsia kũ gbãnao, òtɛn su kpɛ́ gbàa gboro. 10 Akũ gbɛ̃nↄn pla pìnↄ ↄ bò ò Lutu kũ̀ ò gɛ̃̀ kãao kpɛ́n, akũ ò zɛ́ tàta. 11 Ò tò vĩ̀na gbɛ̃ kũ ò kú kpɛ arɛnↄ kũ̀ ń pínki nɛ́ fíti gbɛ̃ zↄ̃kↄ̃, akũ òtɛn kpɛ́ gbà wɛtɛ ari ò kpàsa. 12 Gbɛ̃nↄn pla pìnↄ pì Lutunɛ: Dí ń vĩ la dↄↄ? Nɛ́gↄ̃gbɛ̃nↄ, nɛ́nↄgbɛ̃nↄ, n nɛ́ anzurenↄ kũ gbɛ̃ kũ ò de n gbɛ̃ ũnↄ wɛ̃tɛ gũn ń pínki. Ǹ bↄtɛ kũńwo, 13 zaakũ o su ò gu dí kakatɛmɛ. Yã vãni kũ òtɛn o wɛ̃tɛpidenↄ musu gɛ̃̀ Dikiri sãn, akũ à ó zĩ ò wɛ̃tɛ pì kakatɛ. 14 Lutu bò à gɛ̀ɛ à ò a nɛ́nↄ anzurenↄnɛ à pì: À futɛ ò bↄtɛ, zaakũ Dikiri ni wɛ̃tɛ dí pì kakatɛ teramɛ. Akũ òtɛn da àtɛn fàai bomɛ.

15 Kũ gu dↄ̀ malaikaa pìnↄ nàkara Lutua ò pì: Ǹ futɛ ǹ n nanↄ kũ n nɛ́nↄgbɛ̃ gbɛ̃nↄn pla dínↄ sɛ́tɛ ǹ bↄtɛ kũńwo la, de ǹsun ga wɛ̃tɛ pì kakatɛnaa gũnlo yãi. 16 Kũ Lutu tɛn sika kɛ, Dikiri a wɛ̃nda bò, akũ gbɛ̃nↄn pla pìnↄ a kũ̀ a ↄa kũ a nanↄo kũ a nɛ́nↄgbɛ̃ gbɛ̃nↄn planↄ, ò bↄ̀tɛ kũńwo wɛ̃tɛ kpɛ. 17 Kũ ò bↄ̀tɛ kũńwo lɛ, akũ malaikaa pìnↄ do pì Lutunɛ: Ǹ bàa lɛ́ ǹ n zĩda mì sí. Ǹsun kpɛ gwaro. Ǹsun zɛ guvutɛ pìi gũnlo. Ǹ bàa lɛ́ ǹ mì pɛ́ kpinↄa de ǹsun garo yãi. 18 Akũ à pìńnɛ: Oi ma dikiri! N yã nna! 19 Makũ n zↄ̀bleri ma n pↄnna lè, n gbɛ̃kɛ kɛ̀mɛnɛ manamana n ma mìi sì. Ama mani fↄ̃ mà bàa lɛ́ mà kpi pìnↄ kĩnaa lero. Ari màgↄ̃ gɛ́ ká gwe, kakatɛnaa pì ni ma le mà ga. 20 Ǹ lakutu ke gwa zã̀ dire. Lákũ à kãni nà, mani fↄ̃ mà bàa lɛ́ mà gɛ́ gwe. Lakutu fítimɛ sↄ̃. Ǹ tó mà bàa sí mà tá gwe, manigↄ̃ aafia. Asa à fítiroo? 21 Akũ à pìnɛ: Ma n gba zɛ́, mani lakutu kũ ntɛn o pì kakatɛro. 22 Ǹ bàa lɛ́ ǹ tá gwe likalika, zaakũ mani yãke kɛ gĩaro ari ǹ gɛ́ káo gwe. A yã mɛ́ à tò, ò tↄ́ kpà lakutu pìinɛ Zoa.

23 Kũ Lutu Zoa lè, ifãntɛ̃ tɛn bo, 24 akũ Dikiri tò tɛ́ kũ ifãntɛ̃gbↄ̃ↄo bò musu à kà Sↄdↄmu kũ Gↄmↄraola. 25 À wɛ̃tɛ pìnↄ kàkatɛ kũ gbɛ̃nↄ kũ guvutɛ pìio kũ línↄ kũ sɛ̃̀nↄ pínki. 26 Kũ Lutu nanↄ a kpɛ gwà, akũ à lì à gↄ̃̀ zɛna wisi gbɛ̀ ũ.

27 Kũ gu dↄ̀, Ibrahĩ fùtɛ kↄnkↄkↄnkↄ, à gɛ̀ɛ gu kũ à kun yã kũ Dikirioo pìn. 28 Kũ à Sↄdↄmu kũ Gↄmↄrao kpa gwà kũ guvutɛ pìio pínki, à è túsukpɛ tɛn futɛ zĩtɛ lán tãmatɛ túsukpɛ bà. 29 Lɛmɛ kũ Luda guvutɛ kũ Lutu kunwa wɛ̃tɛnↄ kàkatɛ lɛ, Ibrahĩ yã dↄ̀n, akũ à Lutu bò wɛ̃tɛ kũ à kàkatɛ pìnↄ gũn.

Lutu burinↄ

30 Kũ Lutu bò Zoa, à gɛ̀ɛ à vùtɛ kpinↄ tɛ́ kũ a nɛ́nↄgbɛ̃ gbɛ̃nↄn planↄ, kũ à kunna Zoa vĩna vĩ yãi. Akũ à gↄ̃̀ kú gbɛ̀wɛɛn kũ a nɛ́nↄgbɛ̃ pìnↄ. 31 Akũ Yↄ̃ↄ pì Bãnanɛ: Ó de zĩ kũ̀, akũ gↄ̃gbɛ̃ ke kú bùsun à wútɛ kũoo lákũ òdi kɛ nàro. 32 Ǹ mↄ́ ò sèwɛ̃ kákanɛ ó wútɛ kãao, de ògↄ̃ ó buri le a gãi. 33 Gwãani birea ò wɛ̃ kàkanɛ, akũ Yↄ̃ↄ gɛ̀ɛ à wùtɛ kãao. Lutu dí dↄ̃ gↄrↄ kũ à wùtɛ kãao ke gↄrↄ kũ à fùtɛro.

34 Kũ gu dↄ̀ Yↄ̃ↄ pì Bãnanɛ: Ma wutɛ kũ ma deo gĩa. Ò wɛ̃ kákanɛ ↄkↄsiala dↄ, ĩni gɛ́ ǹ wútɛ kãao, de ògↄ̃ ó buri le a gãi. 35 Gwãani birea dↄ ò wɛ̃ kàkanɛ, akũ Bãna gɛ̀ɛ à wùtɛ kãao. Lutu dí dↄ̃ gↄrↄ kũ à wùtɛ kãao ke gↄrↄ kũ à fùtɛro. 36 Lɛmɛ Lutu nɛ́nↄgbɛ̃ gbɛ̃nↄn pla pìnↄ kɛ̀ lɛ ò nↄ̀ↄ sì kãao. 37 Yↄ̃ↄ nɛ́ ì gↄ̃gbɛ̃ ũ, akũ à tↄ́ kpànɛ Mↄabu. Àkũmɛ Mↄabu buri kũ ò kun ari gbãranↄ dizi káaku ũ. 38 Bãna nɛ́ ì gↄ̃gbɛ̃ ũ se, akũ à tↄ́ kpànɛ Aminɛ. Àkũmɛ Amↄni buri kũ ò kun ari gbãranↄ dizi káaku ũ.