Luda yã takada kũ Bisã yão NAANAA 27

Isaaku sa'olɛkɛna Yakubunɛ

1 Isaaku zĩ kũ̀ a wɛ́ gbãna doro, àtɛn gu e manaro. Akũ à a dauduu sìsi à pì: Nɛ́! Akũ à wèa à pì: Makũ dí. 2 Isaaku pì: Ma zĩ kũ̀ má a gagↄrↄ dↄ̃ro. 3 Ǹ n sá sɛ́ kũ n gbàtaao ǹ gɛ́ ǹ nↄ̀bↄsɛ̃ntɛ wɛtɛmɛnɛ. 4 Ǹ ma pↄyeina dòo kuku ǹ mↄ́omɛnɛ mà ble, mani sa'olɛ kɛnnɛ de mà kpɛ́ mà ga.

5 Rɛbɛka yã kũ Isaaku ò Isaunɛ pìi mà. Kũ Isau fùtɛ à gɛ̀ɛ tofe ká, 6 akũ à gɛ̀ɛ à ò Yakubunɛ à pì: Ma mà n de yã ò n vĩ̀ninɛ à pì 7 à gɛ́ à nↄ̀bↄ dɛarɛ à a pↄyeina dòo kukuoarɛ à ble, áni sa'olɛ kɛnɛ kũ Dikiri tↄ́o de á kpɛ́ à ga. 8 Akũ Rɛbɛka ɛ̀ra à pìnɛ: Ǹ ma yã ma ǹ yã kũ ma dànnɛ kɛ. 9 Ǹ gɛ́ blè kpàsaa gũn ǹ blènɛ mana kũ mɛ̀n pla ǹ suo. Mani n de pↄyeina dòo kukunɛ, 10 ń gɛ́onɛ à ble, ani sa'olɛ kɛnnɛ de à kpɛ́ à ga. 11 Akũ Yakubu pì a danɛ: Ma vĩ̀ni mɛ̀kã vĩ, akũ ma mɛ̀ pↄ́rↄpↄrↄ. 12 Tó ma de ↄ kɛ̀ma, tó à ma dↄ̃, ani pi matɛni a kɛ pãpãmɛ, ani lɛ́ kɛmɛnɛ sa'olɛ gɛ̃nɛ ũ. 13 Akũ a da pìnɛ: Luda tó lɛ́kɛnnɛnaa pì gↄ̃mɛnɛ. Ǹ ma yã ma dé! Ǹ gɛ́ ǹ dɛ ǹ suomɛnɛ.

14 Akũ Yakubu gɛ̀ɛ à blèe pìnↄ dɛ̀ à sùo a danɛ, akũ à a de pↄyeina dòo kùkunɛ. 15 Akũ à a daudu pↄ́kasa mana kũ à kú a kpɛ́ gũnnↄ sɛ̀ à dà a nɛ́ sabidenɛ. 16 À blènɛ bára pìnↄ fĩ̀fĩ a ↄnↄa kũ a waka pↄ́rↄpↄrↄo. 17 Akũ à dò kũ burodi kũ à kɛ̀ɛoo kpàa.

18 Yakubu gɛ̀ɛ a de kĩnaa à pì: Baa! Akũ a de pì: Makũ di! Ma nɛ́ kpatemɛɛ? 19 Yakubu wèa à pì: Makũmɛ Isau n dauduu. Lákũ n òmɛnɛ nà, ma kɛ̀ lɛ. Ǹ futɛ ǹ vutɛ ǹ ma ↄ'i ble de ǹ sa'olɛ kɛmɛnɛ. 20 Akũ Isaaku pì a nɛ́nɛ: O'o! N lè kↄ̀ yá? À wèa à pì: Dikiri n Luda mɛ́ à ma tá kɛ̀ nna. 21 Akũ Isaaku pìnɛ: Ǹ namai mà ↄ kɛmma de mà dↄ̃ tó ma nɛ́ Isaumɛ yãpura. 22 Yakubu nà a dei, akũ à ↄ kɛ̀a à pì: Kòto díkĩna bi Yakubu kòtoomɛ, ↄ díkĩna sↄ̃ Isau ↄmɛ. 23 Akũ adi a dↄ̃ro, kũ a ↄnↄ kã vĩ lán Isau pↄ́ bà yãi. À ye à sa'olɛ kɛnɛ, 24 akũ à a la gĩa: Ma nɛ́ Isaumɛ n ũ yãpura yá? À wèa à pì: Makũmɛ! 25 Akũ à pì: Ǹ pↄ́ kpáma mà n ↄ'i ble, mani sa'olɛ kɛnnɛ. Kũ à dìtɛnɛ, akũ à blè. À sùnɛ kũ wɛ̃o, à mì dↄ. 26 Akũ a de pìi pìnɛ: Ǹ namai ǹ lɛ́ pɛ́ma. 27 Akũ à nài à lɛ́ pɛ̀a. Kũ Isaaku a pↄ́kasanↄ gbĩ mà, akũ à sa'olɛ kɛ̀nɛ à pì:

Ma nɛ́ gbĩ de

lán bura kũ Dikiri arubarikaa dàn bà.

28 Luda n gba mↄtↄ bona musu,

à n gba zĩtɛ mana.

Pↄ́blewɛ kũ sèwɛ̃o nigↄ̃ dinyĩ.

29 Gbɛ̃nↄ ni zↄ̀ blennɛ,

burinↄ ni kútɛ n arɛ,

ĩnigↄ̃ de n gbɛ̃nↄ dikiri ũ,

n da nɛ́nↄ ni kútɛnnɛ.

Luda ni lɛ́ kɛ gbɛ̃ kũ ò lɛ́ kɛ̀nnɛnↄnɛ,

ani arubarika da gbɛ̃ kũ ò sa mana ònnɛnↄgu.

30 Kũ Isaaku sa'olɛ kɛ̀ Yakubunɛ à làka, akũ Yakubu gò a kĩnaa. Kũ a vĩ̀ni sù kũ tofekao gↄ̃̀nↄ, 31 akũ à pↄ́ble kɛ̀ a denɛ dↄ à gɛ̀ɛonɛ, akũ à pìnɛ: Baa! Ǹ futɛ ǹ ma ↄ'i ble ǹ sa'olɛ kɛmɛnɛ. 32 Akũ a de a la à pì: Mↄkↄ̃mmɛ dí ũu? À wèa à pì: Makũmɛ n daudu Isau. 33 Yã pì Isaaku swɛ̃̀ɛ zↄ̃̀ àtɛn lukaluka à pì: Dí mɛ́ à nↄ̀bↄↄ dɛ̀ à sùomɛnɛ yã ari ǹgↄ̃ gɛ́ su ma sòo? Ma sa'olɛ kɛ̀nɛ kↄ̀, àkũ mɛ́ ani arubarika le. 34 Kũ Isau a de yã pìi mà, à pũ̀tã à ↄ́ gbãna dↄ̀ à kɛ̀ wɛ̃nda, akũ à pì: Baa! Ǹ sa'olɛ kɛmɛnɛ dↄ. 35 Akũ à pì: N dakũna sù kũ ↄ̃ndↄ̃o à n sa'olɛ sì kↄ̀. 36 Akũ Isau pì: A tↄ́n Yakuburoo? À ma kɛkɛ à kɛ̀ gɛ̃̀n plan gwe sà. À ma daudukɛzɛ sìma yã, akũ à ma sa'olɛ sìma tera dↄ. Mani sa'olɛ e doro yá? 37 Isaaku wèa à pì: Ma a dìtɛ n dikiri ũ, ma a danɛnↄ kɛ̀ a zĩkɛrinↄ ũ ń pínki, ma pↄ́blewɛ kũ sèwɛ̃o kpàa. Bↄ́n mani le mà kɛnnɛ dↄↄ? 38 Isau pì a denɛ: Baa, sa'olɛ biren ń vĩ ado yá? Ǹ sa'olɛ pãnde kɛmɛnɛ dↄ Baa. Akũ Isau wiki gbãna lɛ̀. 39 Akũ a de wèa à pì:

Zĩtɛ kũ ĩnigↄ̃ kun nigↄ̃ manaro,

mↄtↄ ni bonnɛ zaa musuro.

40 Ĩnigↄ̃ fɛ̃nɛda kũna,

ĩni zↄ̀ ble n dakũnanɛ.

Lɛmɛ dↄ n laakari ni gↄ̃ kpatɛnaro,

ĩni a gbãngo gonla.

41 Isau ibɛrɛɛ sɛ̀ kũ Yakubuo sa'olɛ kũ a de kɛ̀nɛ yãi, akũ à pì a nɛ̀sɛɛ gũn: Ma de ga zã̀ro, gbasa mani ma dakũna dɛ. 42 Ò yã kũ Isau ò kↄrↄmↄtↄↄ kɛ̀ Rɛbɛkanɛ, akũ à Yakubu sìsi à pì: Isau ye à fĩna bomma à n dɛ. 43 Ǹ ma yã ma sà. Ǹ futɛ ǹ bàa lɛ́ ǹ gɛ́ ma dãgↄ̃ Labã bɛa zaa Arana 44 ǹgↄ̃ kú kãao gwe gĩa ari n vĩ̀ni pì pↄfɛ̃ kpátɛ. 45 Tó a nɛ̀sɛɛ kpàtɛ, tó yã kũ n kɛ̀nɛɛ sã̀agu, mani gbɛ̃ zĩ ò n gbɛsɛ. Má ye mà kura á gbɛ̃nↄn planↄi pínki gↄrↄ doro.

46 Akũ Rɛbɛka pì Isaakunɛ: Iti nↄgbɛ̃nↄ ni bòmagu. Tó Yakubu Iti nↄ sɛ̀ bùsu díkĩnan lán Isau nↄgbɛ̃ birenↄ bà, ma kunna nigↄ̃ nnamɛnɛ doro.