Luda yã takada kũ Bisã yão NAANAA 28

Yakubu tana Labã kĩnaa

1 Akũ Isaaku Yakubu sìsi à sa'olɛ kɛ̀nɛ à yã dànɛ à pì: Ǹsun nↄ sɛ́ Kanaa nↄgbɛ̃nↄ tɛ́ro. 2 Ǹ futɛ ǹ gɛ́ Mɛsↄpↄtamia bùsun n da de Bɛtuɛli bɛa, ǹ nↄ sɛ́ gwe n disɛ̃ Labã nɛ́nↄ tɛ́. 3 Luda Gbãnasĩndapinkide arubarika dangu à tó ǹ nɛ́ i manamana, ògↄ̃ kara de ǹ gↄ̃ burinↄ dizi ũ. 4 Luda arubarika kũ à dà Ibrahĩn dangu kũ n burinↄ, de bùsu kũ ntɛn nibↄ blen gↄ̃nnɛ, bùsu kũ à kpà Ibrahĩaa. 5 Akũ Isaaku Yakubu gbàrɛ à gɛ́ Labã kĩnaa Mɛsↄpↄtamia bùsun. Labã bi Siria bùsu gbɛ̃ Bɛtuɛli nɛ́mɛ, Yakubu kũ Isauo disɛ̃mɛ.

6 Isau mà Isaaku sa'olɛ kɛ̀ Yakubunɛ à a gbàrɛ Mɛsↄpↄtamia de à nↄ sɛ́ gwe. Kũ à sa'olɛ pìi kɛ̀nɛ, à pì àsun nↄ sɛ́ Kanaa nↄgbɛ̃nↄ tɛ́ro. 7 À tàasii kà kũ Yakubu a de kũ a dao yã mà à dà Mɛsↄpↄtamia zɛ́n. 8 Akũ à dↄ̃̀ sà kũ a de pↄ nna kũ Kanaanↄ bùsu nↄgbɛ̃nↄro. 9 Akũ à gɛ̀ɛ Ibrahĩ nɛ́ Sumaila kĩnaa à a nɛ́ Maala sɛ̀ à nà a nↄ káakunↄa. Maala bi Nɛbayo dãremɛ.

Yakubu nana'ona Bɛtɛli

10 Yakubu bò Bɛsɛba à dà Arana zɛ́n. 11 Kũ à kà gukea, à ye à i gwe kũ ifãntɛ̃ gɛ̃̀ kpɛ́n yãi. Akũ à gbɛ̀ɛ sɛ̀ gu pìn a mìdibↄ ũ à wùtɛ gwe. 12 Akũ à nana ò à gára è pɛtɛna zĩtɛ ari à gɛ̀ɛ à zↄ̃̀ ludambɛa, Luda malaikanↄ tɛn didia òtɛn kipa. 13 À Dikiri è zɛnaala à pì: Makũmɛ Dikiri n dizi Ibrahĩ kũ n de Isaakuoo Luda ũ. Mani bùsu kũ ń wútɛa díkĩna kpámma, mↄkↄ̃n kũ n burinↄ. 14 N burinↄ nigↄ̃ dasi lán bùsutiti bà, oni dagula ifãboki kpa kũ ifãlɛtɛo kũ gugbãnduru kũ gɛ̀nↄmidↄkio. Andunia buri sĩnda pínki ni arubarika le mↄkↄ̃n kũ n burio gãi. 15 Manigↄ̃ kú kũnwo, manigↄ̃ n dãkpã gu kũ ntɛn gɛ́n pínki, mani ɛra mà su kũnwo bùsu díkĩnan, zaakũ mani n tónlo mani yã kũ ma ònnɛ kɛ.

16 Kũ Yakubu vù kũ io à pì: Dikiri kú gu dí, akũ mádi dↄ̃ro! 17 Vĩna a kũ̀ à pì: Gu dí ma kã fùtɛ. Luda bɛmɛ, ludambɛ zɛ́mɛ.

18 Yakubu fùtɛ kↄnkↄ à gbɛ̀ kũ à kɛ̀ mìdibↄ ũ pìi sɛ̀ à pɛ̀tɛ dↄngupↄ ũ, akũ à nísi kùa. 19 Akũ à tↄ́ kpà gu pìinɛ Bɛtɛli, ama wɛ̃tɛ kũ ò kàtɛ gwe tↄ́ káakun Luzu. 20 Yakubu lɛ́ kɛ̀ Dikiria à pì: Tó ń kú kũmao, tó ĩni ma dãkpã ma wɛ̃tɛ díkĩna gɛnaa gũn, tó ĩni ma gba pↄ́ble kũ pↄ́kasanↄ 21 ari ma gɛ ma su ma de bɛa aafia, ĩnigↄ̃ de ma Luda ũ, 22 gbɛ̀ kũ ma pɛ̀tɛ dↄngupↄ ũ pì ni gↄ̃ n gbagbaki ũ, pↄ́ kũ n ma gba pínki mani a kuride kpámma.