Luda yã takada kũ Bisã yão EBERUNƆ 4

1 Zaakũ gɛ̃na kámmabokin kũ Luda a lɛ́ sɛ̀ kpɛ́ kun, ò laakari kɛ, de ó gbɛ̃ke sún kurairo. 2 Zaakũ o baaru nna mà lán ń bàmɛ, ama yã kũ ò màa pìi àre vĩńnɛro, kũ odi ma kũ ludanaanikɛnaaoro yãi. 3 Ókↄ̃nↄ kũ o yã pìi sìnↄ, odì gɛ̃ kámmaboki pìn. Mↄ́kↄ̃nↄ sↄ̃ Luda pì:

Ma la dà kũ pↄfɛ̃o ma pì,

oni gɛ̃ ma kámmabokinlo,

À yã bire ò bee kũ à a zĩ mìi dɛ̀ zaa anduniakatɛna gↄrↄ, 4 zaakũ ò gↄrↄ supplade yã ò Luda yãn gukea ò pì, gↄrↄ supplade zĩ Luda kámma bò kũ zĩ kũ à kɛ̀ɛo pínki. 5 O mà tera à pì, oni gɛ̃ a kámmabokinlo. 6 Zaakũ gbɛ̃ kũ ò baaru nna pìi mà zaa káakunↄ dí gɛ̃nlo, kũ odi síro yãi, akũ a gɛ̃naa gↄ̃̀ gbɛ̃ pãndenↄnɛ. 7 Akũ Luda ɛ̀ra à gↄrↄ ke dìtɛ dↄ òdi pi Gbãra, abire gbɛra a gìi kɛ̀ akũ à Dauda gbà lɛ́, à ò lákũ ò ò nà tera:

Tó a a kòtoo mà gbãra,

àsun sãgbãna kɛro.

8 Tó Yↄsua gɛ̃̀ kũńwo kámmaboki pìn yã, de Luda dí gↄrↄ pãnde yã o kpɛkpɛro. 9 Àkũ mɛ́ à tò kámmaboki gↄ̃̀ Luda gbɛ̃nↄ pↄ́ ũ. 10 Zaakũ gbɛ̃ kũ à gɛ̃̀ Luda kámmabokin kámma bò kũ a zĩomɛ, lákũ Luda kámma bò kũ a zĩo nà. 11 Tó lɛmɛ, ò wɛ́ tã ò gɛ̃ kámmaboki pìn, de ó gbɛ̃ke sún gí Luda yã mai, à fu lán ń bàro yãi. 12 Luda yã bɛ̃nɛ, akũsↄ̃ à gbãna, a lɛ́ nna de fɛ̃nɛda kpa plaplala. Àdi ń zↄ̃ à gɛ̃ nɛ̀sɛɛ gũn ari ninin, àdi gɛ̃ mɛ̀pɛpɛkɛrɛkin ari wá bↄ́rↄgↄn, àdi laasun kũ nɛ̀sɛ yão gwagwa. 13 Luda pↄ́kɛna ke utɛnanɛro, a ke kpánɛ guiro. Luda kũ óni ó yãnↄ sɛ́tɛ ò onɛ dì pↄ́ sĩnda pínki e ari a bia.

Yesu de sa'orikinↄla

14 Zaakũ ó sa'oriki zↄ̃kↄ̃ kũ ludambɛ wɛ̃̀kↄ̃a ari Luda kĩnaa vĩ Luda Nɛ́ Yesu ũ, ògↄ̃ zɛ́ kũ o sɛ̀ yã kũna gíngin. 15 Zaakũ ó sa'oriki vĩ kũ ani fↄ̃ à ó wɛ̃nda dↄ̃ ó gbãnasarikɛ gũn. Ò a yↄ̃̀ ò gwà lán ó bà yã sĩnda pínki gũn, adi durunna kɛro. 16 Abire yãi ò na Luda Gbɛ̃kɛkɛnnɛri kíblegbaai kũ swɛ̃̀ɛo kpatɛna, de à ó wɛ́ gwa à gbɛ̃kɛ kɛwɛrɛ a gↄrↄa.