Luda yã takada kũ Bisã yão EBERUNƆ 5

1 Òdi sa'oriki sĩnda pínki sɛ́ gbɛ̃nↄ tɛ́mɛ, òdi a ditɛ ń wɛ́de ũ Luda kĩnaa, àgↄ̃ gba kpáa, àgↄ̃ a gbagbańnɛ ń durunnanↄ yãi. 2 Ani fↄ̃ à kɛ kũ gbɛ̃ kũ ò sã̀tɛ ń dↄ̃nasarikɛ gũnnↄo busɛbusɛ, zaakũ àpii kú kũ gbãnasarikɛomɛ se. 3 Abire yãi séde à sa o a zĩda durunna yã musu, lákũ àdi o gbɛ̃ kparanↄ pↄ́ musu nà dↄ. 4 Gbɛ̃ke dì a zĩda ká kpataa pìi gũnlo. Luda mɛ́ àdi a ká, lákũ à Haruna kàn nà.

5 Lɛn se Kirisi dí a zĩda ká sa'oriki kpataa gũnlo, Luda mɛ́ à a kàn à pì:

Ma Nɛ́mɛ n ũ,

gbãran ma n i.

6 À pì Luda yãn gukea dↄ:

Ĩnigↄ̃ de sa'ori ũ gↄrↄ sĩnda pínki lán Mɛlɛkizɛdɛki bà.

7 Gↄrↄ kũ Yesu kú andunia gũn à adua kɛ̀ kũ wiki gbãnao kũ wɛ́'io, à kútɛ kɛ̀ Luda kũ ani fↄ̃ à a sí gaaanɛ, akũ Luda a yã mà, kũ àdi a yã da yãi. 8 Bee kũ a Ludanɛkɛo, à mìnatɛna Ludanɛ dàda a warikɛnaa gũn. 9-10 Kũ mana pɛ̀kɛrɛa à làka, Luda a kà sa'oriki ũ lán Mɛlɛkizɛdɛki bà, akũ à gↄ̃̀ surabana kũ àdi lákaro boki ũ gbɛ̃ kũ òdi a yã manↄnɛ ń pínki.

Laakarikɛna funaai

11 Yã bire musu ó yã vĩ dasi ò oárɛ, ama a bↄkↄtɛna zĩ'ũmɛ, zaakũ adì yã dↄ̀rↄ dↄ̃ likaro. 12 Ákↄ̃nↄ kũ a gìi kɛ̀n lán dí bà, à mana àgↄ̃ de yãdannɛrinↄ ũmɛ, ama ari tera á kpɛ́ kú ò ɛra ò Luda yã kũ òdi dada gbɛ̃ dufunↄnɛ daárɛ dↄ. Yↄ̃'i mɛ́ à kↄ̃ sì kãáo, adi ká à yũku pↄ́ blero. 13 Zaakũ yↄ̃miri sĩnda pínki bi nɛ́mɛ, adi ká à ↄzɛ dↄ̃kↄ̃nɛ kũ ↄplaoro. 14 Yũku sↄ̃, gbɛ̃ kàsara kũ ò dↄ́nɛ kɛ̀onↄ pↄ́mɛ. Ò a mana dↄ̃na kↄ̃nɛ kũ a vãnioo dàda.