1 Ma la dà kũ ma wɛ́ nigↄ̃ kú nↄkparearo.

2 Bↄ́ mɛ́ ani gↄ̃ bisãsiri baka ũ Luda kĩnaa zaa musuu?

Bↄ́ túbin ani le Gbãnasĩndapinkide kĩnaa zaa ludambɛɛ?

3 Gbɛ̃ vãninↄn kisira dì ń leroo?

Vãnikɛrinↄn kakatɛnaa dì gɛ̃ńyĩroo?

4 À de Luda tɛni ma yãkɛnanↄ e

à ma gɛ̀sɛsɛna lɛ́ dↄ̃roo?

5 Madìgↄ̃ táa o kũ manafikion yá?

Madì wã mà gbɛ̃ sãtɛn yá?

6 Luda ma yↄ̃ a zɛ́a à gwa,

ani dↄ̃ kũ má taari vĩro.

7 Tó ma pã zɛ́nɛ,

akũsↄ̃ pↄ́ kũ ma wɛ́ ènↄ mɛ́ àtɛni ma swɛ̃̀ ble,

ke tó ma ↄ kú yã vãni ke gũn,

8 tó lɛmɛ, mà pↄ́ tↄ̃ gbɛ̃ pãndenↄ ble,

ò pↄ́ kũ ma bànↄ wowo.

9 Tó gbɛ̃ke nↄ ni gɛ̃̀ ma swɛ̃̀n,

tó ma nagui ma gbɛ̃dake nↄ yãi,

10 tó lɛmɛ, gbɛ̃ pãnde gbá di ma nanↄa,

àgↄ̃ kĩni kɛ dakenↄnɛ.

11 Zaakũ tó ma yã pìi kɛ̀, dà vãnimɛ,

durunna kũ à kà ò a yã gↄ̃gↄ̃mɛ.

12 Yã pì bi tɛ́ pↄ́kakatɛriimɛ,

kũ à de à dↄ ma burapↄnↄa à tɛ́ kũ kororo.

13 Tó ma gↄ̃gbɛ̃ ke nↄgbɛ̃ zĩkɛri yã vĩ kũmao,

tó mádi gↄ̃gↄ̃ a zɛ́aro,

14 mani kɛ deramɛ, tó Luda fùtɛmaii?

Tó à sùmai, mani pinɛ deramɛɛ?

15 Luda kũ à ma í kàsa nɛ́'isↄn mɛ́ à ade í kàsa seroo?

Luda mɛ̀n do pì mɛ́ à ó baadi kɛ̀ a da gbɛrɛnloo?

16 Tó ma takaside tɛ̃̀ pↄ́ kũ àtɛni a ni dɛ,

tó ma gi gyaanↄ wɛ̃nda gwai,

17 tó ma pↄ́ blè,

ma tonɛ kũ à gwàri vĩro tɛ̃̀ sↄ̃, tↄ̀!

18 Lɛnlo! Zaa ma kɛfɛnnakɛgↄrↄa

tonɛnↄ demɛ ma ũ.

Zaa lákũ ma bo ma da nɛ́'isↄn nà

gyaanↄnↄ kpànyĩriimɛ ma ũ.

19 Tó ma gbɛ̃ke è kũ ĩa tɛni a dɛ,

ke tó ma takaside è kũ à biza vĩ à kúalaro,

20 tó adi ma sáabu kpá

kũ ma a sãkã biza kùala a mɛ̀ɛ kɛ̀ lↄ́gↄlↄgↄro,

21 tó ma gbãna mↄ̀ tonɛnɛ,

kũ má dↄ̃ kũ oni zɛ kũmao yãkpatɛkɛnan yãi,

22 ma gã̀ bokũn,

ma gã̀sã wó a pɛ́kia.

23 Má Luda wɛ́tãmmanaa vĩna vĩ,

a zↄ̃kↄ̃kɛ yãi mani fↄ̃ mà yã dí taka kɛro.

24 Tó wuraan ma gbãna lèa,

tó ma pì wura atɛ̃nɛ má náanikɛna,

25 tó ma aruzɛkɛ zↄ̃kↄ̃ↄn ma pↄ dↄa,

ↄgↄda kũ à gɛ̃̀ ma ↄĩ pìi,

26 tó ifãntɛ̃ tɛ́kɛnaan má tɛ́i,

ke mↄvura táa'ona kũ a manakɛo,

27 akũ ń yã tɛni ma swɛ̃̀ ble busɛbusɛ,

ari ma lɛ́ pɛ̀ ma ↄa ma fↄ kpàoḿma,

28 abirekũ bi durunna kũ à kà ò a yã gↄ̃gↄ̃mɛ,

manafikikɛna Luda Musudenɛn gwe.

29 Mádi pↄnna kɛ ma zãnguri kũ kisira a lè yã musuro,

mádi a yáa dↄ kũ yã a lè yãiro.

30 Mádi we ma durunna kɛ̀ ma a kàro.

31 Dí mɛ́ à kìpama kũ adi pↄ́ ble à kã̀roo?

Ma bedenↄmɛ ma sèedadenↄ ũ.

32 Ma bɛ zɛ́ dìgↄ̃ wɛ̃na nibↄnↄnɛ,

madì we nibↄ gɛ̃̀zɛla ì batunlo.

33 Ma a taarinↄ ùtɛ gbɛ̃nↄnɛ yá?

Ma lá kù ma durunnanↄan yá?

34 Pari vĩna ma kũ ari ma fua mà yã o yá?

Kũ oni ma gya bo yãin ma gi bo kpɛ́nyĩ yá?

35 O'o! Dí mɛ́ ani ma yã díkĩna mamaa?

Ma zɛo. Gbãnasĩndapinkide wema sà.

Luda kũ à yã vĩ kũmao pì kɛ̃ takadan.

36 Mani takada pì sɛ́ mà da ma gã̀n,

mani kú fùra ũ,

37 mani gɛ́ mà yã kũ ma kɛ̀nↄ babanɛ pínki,

mani nai lán kínɛ bà.

38 Tó ma bura tɛn gímai,

akũsↄ̃ a dↄ̀rↄnↄn tɛn wiki lɛ́ma,

39 tó ma burapↄ blè akũsↄ̃ mádi zĩtɛ pìi fĩna boro,

ke tó ma gbɛ̃ kũ ò vĩ yãnↄ dɛ̀dɛ,

40 tó lɛmɛ, lɛ̀kara butɛ gbado gɛ̃nɛ ũ,

pampara sↄ̃ à butɛ ése gbɛ̀n.