Luda yã takada kũ Bisã yão AYUBA 38

Dikiri a kíkɛ mↄna Ayubanɛ

1 Akũ Dikiri yã wè Ayubaa zàga'ĩa gũn à pì:

2 Dí mɛ́ àtɛn fayasariyã ká ma ↄ̃ndↄ̃laa?

3 Ǹ futɛ ǹ zɛ lán nɛ́gↄ̃gbɛ̃ bà,

mani n la yãi, ĩni wema.

4 Kũ ma andunia kàtɛ, ń kú mámɛɛ?

Tó ń dↄ̃na vĩ, ǹ omɛnɛ.

5 Dí mɛ́ à a zĩtɛ lɛ́ sèedaa lɛ̀ɛ?

Dí mɛ́ à bàa yↄ̃̀a à gwàa? À de ń dↄ̃ↄ?

6 Bↄ́ mɛ́ à zĩtɛ kũnaa?

Dí mɛ́ à a ɛ̃ pɛ̀tɛ

7 gↄrↄ kũ gudↄna susunɛnↄn tɛn ayuwii kɛ,

malaikanↄ pↄnna wiki dↄ ń pínkii?

8 Kũ ísira gu fↄ̃̀ à bò,

dí mɛ́ à zɛ́ tàtaalɛɛ?

9 Ma ludambɛ luku dànɛ pↄ́kasa ũ,

ma gusira yĩ̀nɛ biza ũ.

10 Ma a lɛ́zɛki dànɛ,

ma zɛ́nↄ tàta ma gùrukpanↄ dàdan.

11 Ma pìnɛ: Ĩnigↄ̃ ká la ǹsun vĩalaro,

n ísↄ̃kɛna gbãnanↄ ni zɛ la.

12 Zaa lákũ ò n i nà n yã dìtɛ kↄnkↄnɛ yá?

N boki mↄ̀ gudↄnaanɛ ziki yá?

13 Gudↄnaa dì andunia kũ a lɛ́a

de à gbãkɛ lán biza bà a yãvãnikɛrinↄ kↄ́tɛ.

14 Àdi andunia litɛ kokũkokũ lán kwã kpɛ bà,

kpinↄ dì bo gupuraa lán uta yĩyĩkↄ̃anaa bà.

15 Àdi gí yãvãnikɛrinↄnɛ ò ń gusira yã kɛ,

àdi ń ↄ sɛna musu ɛ́'ɛ.

16 N gɛ ari zaa ísira ísɛ̃bokinↄa yá?

N táa ò í lòkotoo pìi gãnun ziki yá?

17 Ò ga bĩnilɛ gbànↄ mↄ̀nnɛ yá?

N gyãwãn gãnulɛnↄ è yá?

18 N andunia yàasa lɛ́ tàasii kà yá?

Tó ń yã birenↄ dↄ̃ pínki, ǹ omɛnɛ.

19 Gupura bɛ zɛ́n máa?

Ń gusirakuki dↄ̃ yá?

20 Ĩni fↄ̃ ǹ gɛ́ kũńwo ń bùsun yá?

Ń ń bɛ zɛ́ dↄ̃roo?

21 Ń dↄ̃ sàee! À de ò n i gↄrↄ birea!

À de n wɛ̃̀ lɛ́ vĩroo?

22 N gɛ̃ laasi kũ ma gu yĩda kàtɛn yá?

N ma legũgbɛ dↄ̃̀ↄ è yá?

23 Madì utɛ ari warikɛgↄrↄa,

madì gbarɛ zĩ̀kagↄrↄ zĩ.

24 Gupura dì bo mámɛ à dagulaa?

Ifãboki kpa ĩa dì bo à da zĩtɛla deramɛɛ?

25 Dí mɛ́ àdi zɛ́ bo legũ dasinɛɛ?

Dí mɛ́ àdi gu para surapũtãnaanɛɛ?

26 Àdi mↄtↄ pisi zĩtɛ kũ gbɛ̃ke kunloa,

bee gbáranna kũ bisãsiri kunlo.

27 Àdi bɛzĩ kũ tàragaao yĩda kũ,

àdi tó sɛ̃̀ butɛ gwe.

28 Legũ de vĩ yá?

Dí mɛ́ à plí ìi?

29 Dí nɛ́'isↄn legũgbɛɛ dì bonn?

Dí mɛ́ àdi suka i gbasa à kpáa?

30 Dí mɛ́ àdi tó í li à kɛ gbɛ̀ ũ

à tó ísira musu kɛ kpakparakpaa?

31 Ĩni fↄ̃ ǹ susunɛ mɛ̀n supplanↄ yĩ ǹ kakara yá?

Ĩni fↄ̃ ǹ susunɛ azianↄ fãkↄ̃a yá?

32 Ĩni fↄ̃ ǹ mↄ'azia bo a gↄrↄa yá?

Ĩni fↄ̃ ǹ gu mↄ susunɛ ko nɛ́rande kũ a nɛ́nↄnɛ yá?

33 Ń musu pↄ́nↄ doka dↄ̃ yá?

Ĩni fↄ̃ ǹ ń ká kpatan zĩtɛla yá?

34 Ĩni fↄ̃ ǹ lɛ́ zu legũi

de à sisi à í bo à n yaku yá?

35 Ĩni fↄ̃ ǹ legũpinanↄ gbarɛ ò da zɛ́n yá?

Òdi su ò onnɛ ókↄ̃nↄ dí yá?

36 Dí mɛ́ à ↄ̃ndↄ̃ dà ludambɛ lukunↄnɛ à legũ maa?

Dí mɛ́ à dↄ̃naa kpà sukaa à kpáa?

37 Dí ↄ̃ndↄ̃ mɛ́ à kà à ludambɛ lukunↄ naroo?

Dí mɛ́ ani fↄ̃ à musu orozãnↄ kpákasia kɛɛ?

38 Tó a í bↄ̀tɛ, bùsu kori dì gↄ̃ bↄkↄtↄ ũ,

làkpakↄ̃nↄnↄ dì nanakↄ̃a.

39-40 Mↄkↄ̃mmɛ ndì tofe ká músudanɛ,

tó àtɛn nↄ̀bↄ dãdã dàkoo gũn yá?

Mↄkↄ̃mmɛ ndì pↄ́ble kpá a nɛ́nↄa ò kã

gↄrↄ kũ ò kú ń tòn yá?

41 Tó kãakãanna nɛ́nↄ tɛn likara gui,

òtɛn lɛ́ zu Ludai kũ pↄ́ble kĩ̀aḿma yãi,

dí mɛ́ àdi pↄ́ble kpáḿmaa?

AYUBA
<
38
>