YEREMIN SWĨI
Yeremi u swĩ Yerusɑlɛmu ye bɑ wɔri bɑ kɔsukɑn sɔ̃ kɑ sere Yudɑbɑn torɑnun sɔ̃. U wigibu tubusiɑ yèn sɔ̃ Gusunɔ u derɑ yibɛrɛbɑ bɑ kuɑ mɛ. Adɑmɑ u nɛɛ, Yudɑbɑ bɑ̀ n gɔ̃ru gɔsiɑ, Gusunɔ u koo bu win wɔnwɔndu sɔ̃ɔsi.
Tire ten kpunɑɑ
1. Yerusɑlɛmu yɑ sɑ̃ɑ nge kurɔ gɔmini, wiru 1.
2. Yinni Gusunɔ u Yerusɑlɛmu sɛɛyɑsiɑ, wiru 2.
3. Nɔni swɑ̃ɑru sɔɔ, yĩiyɔbu wɑ̃ɑ, wiru 3.
4. Yerusɑlɛmugibun wɑhɑlɑ tɑbun sɔ̃, wiru 4.
5. Yinni Gusunɔ, ɑ de su wurɑmɑ wunɛn mi, wiru 5.
1
Yerusɑlɛmu yɑ sɑ̃ɑ nge kurɔ gɔmini
1 Yerusɑlɛmu yè sɔɔ tɔmbɑ rɑɑ dɑbi,
wee yɑ wɑ̃ɑ ye tɔnɑ,
yɑ kuɑ nge gɔmini.
Yɑ rɑɑ yĩsiru yɑrɑ bwesenun suunu sɔɔ.
Wee tɛ̃ bɑ ye yoru diisiɑmɔ.
2 Yɑ wuri mɔ̀ wɔ̃ku giriru
mɑ yen nɔni yĩresu kokumɔ.
Be bɑ rɑɑ sɑ̃ɑ yen kĩnɑsibu,
ben goo sɑri wi u ye nukuru yɛmiɑsiɑmɔ.
Be kpuro bɑ kuɑwɑ nɑɑnɛ sɑribɑ,
mɑ bɑ kuɑ yen yibɛrɛbɑ.
3 Bɑ Yudɑbɑ gurɑ bɑ kɑ doonɑ tem tukumɔ.
Mɛyɑ, bɑ bu dɑm dɔremɔ bɑ yoru diisiɑmɔ.
Bɑ ku rɑ n wɛ̃rɑbu mɔ.
Ben yibɛrɛbɑ bɑ bu wɔri subɑru sɔɔ
bɑ deemɑ bɑ wɑ̃ɑ nɔni swɑ̃ɑru gɑru sɔɔ.
4 Yerusɑlɛmu yɑ wɑ̃ɑ nuku sɑnkirɑnu sɔɔ,
domi bɑ ku rɑ mɑɑ yen swɛɛ sĩ bu tɔ̃ɔ bɑkɑru nɑ.
Goo kun mɑɑ wɑ̃ɑ yen gbɑ̃rɑ kɔnnɔwɔ.
Yen yɑ̃ku kowobu bɑ weeweenu mɔ̀.
Yen wɔndiɑbɑn nuki sɑnkirɑ.
Yen tii yɑ wɑ̃ɑ nuku sɑnkirɑ bɑkɑru sɔɔ.
5 Yen yibɛrɛbɑ bɑ ye tɑbu di,
mɑ bɑ wɑ̃ɑ bɔri yɛndu sɔɔ.
Yinni Gusunɔwɑ u ye nuku sɑnkirɑ ni kpɛ̃ɛ
yen torɑ dɑbinun sɔ̃.
Wee yibɛrɛbɑ bɑ yen bibu kpɑrɑ
bɑ kɑ dɑ bɑ yoru diisiɑmɔ.
6 Yerusɑlɛmun bɛɛrɛ yɑ kpɑ.
Mɑ yen wirugibu bɑ kɑ gini weenɛ
yi yi ǹ yɑkɑsu wɑ yi di.
Yi ǹ mɑɑ dɑm mɔ
mɑ yi duki mɔ̀ tɑɑson wuswɑɑn di.
7 Sɑɑ yeni sɔɔ, Yerusɑlɛmu yɑ wɑ̃ɑ yɑ̃ɑru sɔɔ,
yen tɔmbɑ yɑɑyɑɑre mɔ̀.
Yerɑ yɑ yɑɑyɑ gɑ̃ɑ gee ni yɑ rɑɑ mɔ yellu.
Sɑnɑm mɛ yen yibɛrɛbɑ bɑ ye kɑmiɑ,
yɑ goo biɑ u nɑ u ye somi,
mɑ n yibɛrɛ be dore, bɑ ye yɑɑkoru koosimɔ.
8 Yerusɑlɛmu yɑ torɑ too.
Yen sɔ̃nɑ bɑ ye tusɑ.
Be bɑ rɑɑ ye doke,
bɑ̀ n yen bɑnsu wɑ bɑ rɑ ye gɛmwɑ.
Wee, yen tii, yɑ weeweenu mɔ̀,
yɑ wɑ̃ɑ sekuru sɔɔ.
9 Wee, yen durum yĩreru tɑ wɑ̃ɑ yen yɑberɔ.
Adɑmɑ yɑ ǹ dɑɑ yen kpeeru bwisikɑ.
Yɑ wɔrumɑ subɑru sɔɔ
goo kun ye nukuru yɛmiɑsie.
Mɑ yɑ nɔɔgiru suɑ yɑ nɛɛ,
Yinni Gusunɔ, ɑ nɛn nɔni swɑ̃ɑru mɛɛrio.
A mɛɛrio nge mɛ yibɛrɛ u tii sue.
10 Wee, bɑ nɛn gɑ̃ɑ gee ni nɑ mɔ gurɑ.
Wee, bwese tuku ni ɑ yinɑ nu n wɑ̃ɑ kɑ wunɛn tɔmbu sɑnnu,
nu duɑ wunɛn sɑ̃ɑ yerɔ.
11 Wee, Yerusɑlɛmugibu kpuro bɑ wɑsire
bɑ dĩɑnu kɑsu ni bɑ koo di.
Mɑ bɑ kɑ ben gɑ̃ɑ geenu dĩɑ ni kɔsinɑ
bu wɑ bɑ n kɑ wɑ̃ɑ.
Yerusɑlɛmu yɑ nɛɛ,
Yinni Gusunɔ, ɑ mɛɛrio nge mɛ nɑ wɔnwɔndu soore.
12 Bɛɛyɑ nɑ kɑ yɑ̃, bɛɛ be i sɑrɔ mini kpuro.
I mɛɛrio nɔni swɑ̃ɑru gɑru tɑ̀ n mɑɑ nɛgii teni kere,
te Yinni Gusunɔ u mɑn kpɛ̃ɛ win mɔrun sɑɑ sɔɔ.
13 Sɑɑ wɔllun di n sɑ̃ɑre u dɔ̃ɔ suremɑ nɛn wɑsi sɔɔ,
mɑ u mɑn di.
U nɛn nɑɑsu yinɑ bɛriɑ.
Mɑ u mɑn surɑ gbɑru gbɑrɑ
u mɑn kpɛ̃ɛ nuku sɑnkirɑnu sɔɔ sere kɑ bɑɑdommɑɔ.
14 U nɛn torɑnu kpuro mɛnnɑ
nge wɛ̃ɛ yi bɑ tɑrɑ.
Mɑ u nu gbinisi nɛn wĩirɔ.
U nɛn dɑm buɑ.
Mɑ u mɑn yibɛrɛ nɔmu bɛriɑ
mi nɑ ǹ kpɛ̃ n kɑ tii yinɑ.
15 Yinni Gusunɔ u nɛn tɑbu kowobu sururɑ.
U tɑbu durɔbu mɛnnɑ
bu kɑ nɛn ɑluwɑɑsibɑ kɑm koosiɑ.
U nɛ, Yerusɑlɛmu tɑɑkɑ
nge mɛ bɑ rɑ resɛm tɑɑku.
16 Yen sɔ̃nɑ nɑ wurɑ mɔ̀,
nɑ nɔni yĩresu kokumɔ.
Wi u koo mɑn nukuru yɛmiɑsiɑ u mɑn wɑ̃ɑru wesiɑ,
u mɑn deri.
Nɛn bibɑ nuki sɑnkire,
domi yibɛrɛ u mɑn kɑmiɑ.
17 Nɑ nɔmɑ yiiyɑ nɑ kɑnɑru kuɑ.
Adɑmɑ goo kun nɛ u mɑn nukuru yɛmiɑsiɑ.
Yinni Gusunɔ u derɑ be bɑ kɑ nɛn tɔmbu Isirelibɑ sikerenɛ
bɑ kuɑ nɛn yibɛrɛbɑ,
mɑ bɑ mɑn gɑrisi disi.
18 Yinni Gusunɔ u gem mɔ ye u kɑ kuɑ mɛ.
Domi nɑ ǹ win gere mɛm nɔɔwɛ.
Bɛɛ bwesenu kpuro, i swɑɑ dɑkio i nɔ,
kpɑ i nɛn nuku sɑnkirɑnu wɑ.
Nɛn wɔndiɑbɑ kɑ nɛn ɑluwɑɑsibɑ bɑ yoru dɑ tem tukumɔ.
19 Nɑ nɛn kĩnɑsibu somiru kɑnɑ,
ɑdɑmɑ bɑ mɑn bɔrɔ kɔ̃ɔru kuɑ.
Nɛn yɑ̃ku kowobu kɑ wuun guro gurobu bɑ gu nɛn swɛɛ sɔɔ
sɑnɑm mɛ bɑ dĩɑnu kɑsu ni bɑ koo di bɑ n kɑ wɑ̃ɑ.
20 Yinni Gusunɔ, ɑ nɛn nɔni swɑ̃ɑru mɛɛrio,
nɛn bwɛ̃rɑ kun kpĩ.
Nɑ nuki sɑnkire too,
domi nɑ ǹ nun mɛm nɔɔwɛ.
Tɔɔwɔ tɑbu sun dimɔ.
Mɑ wuun sɔɔwɔ gɔɔ wɑ̃ɑ.
21 Bɑ nɛn weeweenu nuɑ.
Adɑmɑ goo kun mɑn nukuru yɛmiɑsie.
Yibɛrɛbɑn nukurɑ dorɑ, yèn sɔ̃ ɑ mɑn kuɑ mɛ.
Ǹ n mɛn nɑ, ɑ de tɔ̃ɔ te, tu nɑ te ɑ geruɑ mi,
kpɑ bu ko nge nɛ.
22 A ben nuku kɔ̃suru mɛɛrio,
kpɑ ɑ bu kuɑ nge mɛ ɑ mɑn kuɑ nɛn durum kpɑ̃ɑrun sɔ̃.
A mɛɛrio nge mɛ nɑ weeweenu mɔ̀, nɛn nuki sɑnkire.