1 Yinni Gusunɔn mɔru bɑkɑ yɑ seewɑ.

Mɑ yɑ Yerusɑlɛmu wukiri nge guru wii bɑkɑru.

Yen bɛɛrɛ ye yɑ rɑɑ girɑri sere guru winɔ,

u ye kɑrɑ u kɔ̃ temɔ.

Win mɔru yen sɑɑ sɔɔ,

u ǹ yɑɑye mɑ Yerusɑlɛmu yɑ sɑ̃ɑ win nɑɑ sɔnditiɑ.

2 U Isirelibɑn wɑ̃ɑ yenu

kɑ ben wusun gbɑ̃rɑnu kpuro sururɑ kɑ mɔru wɔnwɔndu sɑri.

Ni wee nu wɔrukɑ temɔ.

U ben bɑndu kɑ ten wirugibun dɑm buɑ.

3 U Isirelibɑn dɑm kpuro buɑ win mɔru bɑkɑn sɔ̃.

U tii bɔkuɑ sɑnɑm mɛ yibɛrɛbɑ bɑ bu wɔrim nɑ.

Mɑ u Isireli be dɔ̃ɔ kɑre,

mɑ dɔ̃ɔ wi, u bu di beri berikɑ.

4 U bu win tɛndu gɑwe kɑ win nɔm geu.

Mɑ u bu yĩisi nge yibɛrɛ,

u kpuro go ye yɑ geɑ sɑ̃ɑ ben nɔni sɔɔ.

U derɑ win mɔru yɑburɑ nge dɔ̃ɔ

ben wɑ̃ɑ yenɔ Yerusɑlɛmuɔ.

5 Yinni Gusunɔ u Isirelibɑ wɔri nge yibɛrɛ.

U bu mwɑ nge dɔ̃ɔ u ben dii geenu di.

U ben gbɑ̃rɑnu kɔsukɑ,

mɑ u derɑ wuri yi nɔɔrɑmɔ bɑɑmɑ ben suunu sɔɔ.

6 U win sɑ̃ɑ yeru kɔsukɑ.

U derɑ bɑ ku rɑ mɑɑ sɑ̃ɑrun tɔ̃ɔ bɑkɑnu kɑ tɔ̃ɔ wɛ̃rɑrugiru di.

Win mɔru seewɑ kɑ dɑm.

Mɑ u sinɑ boko kɑ yɑ̃ku kowobu yinɑ.

7 U win sɑ̃ɑ yeru mi bɑ rɑ nùn yɑ̃kuru kue biru kisi.

U yibɛrɛbɑ Yerusɑlɛmun dii geenu nɔmu bɛriɑ.

Mɑ wɔkinu nɔɔrɑ win sɑ̃ɑ yeru mi, nge tɔ̃ɔ bɑkɑnun sɑɑ.

8 Yinni Gusunɔ u gɔ̃ru doke u Yerusɑlɛmun gbɑ̃rɑnu kɔsuku.

Wee u nu kɔsukɑ kpuro mɑm mɑm.

Yɑ kuɑ wɔnwɔndu bɑɑmɑ kpuro.

Gbɑ̃rɑnu yiru ye kpuro yɑ kuɑ bɑnsu.

9 Yen kɔnnɔsu su numɑ temɔ.

Sin dɑ̃ɑ ye bɑ rɑ kɑ su sɛ̃suku yɑ bɔɔkirɑ.

Mɑ bɑ yen sinɑ boko kɑ yen wirugibu gurɑ

bɑ kɑ dɑ tem tukumɔ.

Woodɑ mɑɑ sɑri.

Bɑɑ Gusunɔn sɔmɔbu bɑ ǹ mɑɑ kɑ̃sinu wɑɑmɔ win min di.

10 Wee, yen guro gurobu bɑ sɔ̃ temɔ bɑ nɔsu mɑɑri.

Bɑ tii torom wisi winɔ,

bɑ sɑɑki deewɑ nuku sɑnkirɑnun sɔ̃.

Mɑ yen wɔndiɑbɑ bɑ sɔ̃ bɑ tuke.

11 Nɛn nɔni yɑndɑmɔ wurin sɔ̃.

Nɛn wɑsi gbisimɔ mɑ nɛn tororɑ kɑre.

Domi nɛn tɔmbɑ kɑm kuɑ.

Wee, bii wɛ̃ɛnu kɑ bibu bɑ wɑ̃ɑ Yerusɑlɛmun swɛɛ sɔɔ,

bɑ ǹ mɑɑ dɑm mɔ.

12 Bɑ ben mɛrobu sɔ̃ɔmɔ bɑ mɔ̀,

mɑnɑ sɑ ko dĩɑnu wɑ.

Mɑ bɑ wɔrukumɔ swɛɛ sɔɔ nge be bɑ mɛɛrɑ kuɑ.

Gɑbɑ gbisukumɔ ben mɛron tororu wɔllɔ.

13 Yerusɑlɛmu, mbɑ kon nun sɔ̃.

Mbɑ kon kɑ nun weesinɑ.

Wɑrɑ u mɑɑ nɔni sɔ̃ɔre nge wunɛ,

n kɑ kpĩ n nun nukuru yɛmiɑsiɑ.

Domi wunɛn nɔni swɑ̃ɑrɑ kpɑ̃ nge nim wɔ̃kun nim.

Goo sɑri wi u koo kpĩ u tu kpeesiɑ.

14 Wunɛn sɔmɔbu bɑ nun gɑri weesugii sɔ̃ɔwɑ.

Bɑ ǹ nun wunɛn torɑnu sɔ̃ɔsi

bu kɑ nun gbɑrɑ yorun di.

Gɑri weesugiiyɑ bɑ nun sɔ̃ɔwɑ yi yi nun nɔni wɔ̃kuɑ.

15 Wee, tɛ̃ wi u sɑrɔ u rɑ nun tɑkɑ koosiwɑ u yɛ̃ɛ,

kpɑ u wiɑ ko u nɛɛ,

wuu geniwɑ bɑ rɑ rɑɑ soku wuu burɔ,

gèn sɔ̃ hɑnduniɑn tɔmbu kpuro bɑ rɑ n nuku dobu mɔ̀?

16 Kpɑ yibɛrɛbɑ bɑ n nɔɔ tɛndu bɛri

bɑ n nun yɛ̃ɛmɔ bɑ n mɔ̀,

sɑ nun mwɛ nge dĩɑ dɔkɑ.

Wee, tɔ̃ɔ te sɑ mɑrɑ tɑ tunumɑ,

sɑ tu wɑ.

17 Yinni Gusunɔ u kuɑ ye u gɔ̃ru doke.

U yibiɑ ye u geruɑ sɑɑ yellun di u nɛɛ,

u koo ko.

Wee u wunɛ Yerusɑlɛmu kɑm kuɑ.

U ǹ wunɛn wɔnwɔndu wɑ.

U derɑ yibɛrɛbɑn nukurɑ dorɑ wunɛn sɔ̃,

domi u bu dɑm kɑ̃.

18 Yerusɑlɛmu, ɑ Yinni Gusunɔ nɔɔgiru sueyo,

ɑ de u wunɛn wuri nɔ.

A nɔni yĩresu kokuo nge dɑɑru.

A ku wɛ̃rɑ, ɑ ku wuri mɑri.

19 A seewo ɑ wuri ko wɔ̃kuru,

ɑ wunɛn gɔ̃ru kpuro kusiɑ Yinni Gusunɔn wuswɑɑɔ.

A nɔmɑ yiiyo ɑ nùn kɑnɑ wunɛn bibun sɔ̃

be bɑ gbimɔ swɛɛ sɔɔ gɔ̃ɔrun sɔ̃.

20 Yinni Gusunɔ, ɑ mɛɛrio ɑ wɑ.

Wɑrɑ ɑ kuɑre nge mɛ.

Mbɑn sɔ̃nɑ ɑ derɑ tɔn kurɔbɑ ben bibu temɑ be bɑ kĩ mi.

Mbɑn sɔ̃nɑ ɑ derɑ yibɛrɛbɑ bɑ mɑɑ wunɛn sɔmɔbu kɑ yɑ̃ku kowobu go wunɛn sɑ̃ɑ yerɔ.

21 Wee bukurobu kɑ bibun gonu nu kpĩ swɛɛ sɔɔ.

Bɑ nɛn wɔndiɑbɑ kɑ ɑluwɑɑsibɑ go tɑbu sɔɔ.

A derɑ bɑ bu sɑkirɑ wɔnwɔndu sɑri, wunɛn mɔrun sɑɑ.

22 A nɛn yibɛrɛ be nɑ nɑsie sokusiɑ bɑɑmɑn di

bɑ mɛnnɑ nge tɔ̃ɔ bɑkɑrun sɑɑ.

Yen dɔmɑ te, goo kun kisire.

Goo kun mɑɑ seewe bii be nɑ kĩ nɑ seeyɑ sɔɔ.

A derɑ nɛn yibɛrɛ u bu go kpuro.