37
Gbɛ̃ mananↄ kũ gbɛ̃ vãninↄ ziakpɛ zĩ
Dauda lɛ̀ɛ.
1 Ǹsun tó gbɛ̃ vãninↄ yã n kũ gbãnaro,
ǹsun yãvãnikɛrinↄ gwena ni dɛro,
2 zaakũ ò kori kɛ tera lán sɛ̃̀ɛ bàmɛ,
ń manakɛna ni láka lán sɛ̃̀la ísi bà.
3 Ǹ Dikiri náani kɛ, ǹgↄ̃ yã mana kɛ,
ǹgↄ̃ kú bùsu dín, ǹgↄ̃ nna ma.
4 Ǹ tó n pↄ gↄ̃ nna kũ Dikirio,
ani pↄ́ kũ n nɛ̀sɛ yei kpámma.
5 Ǹ zɛ kũ Dikirio ǹ a náani kɛ,
ani yã dínↄ kɛnnɛ.
6 Ani tó yã bo kũnwo nna lán gudↄnaa bà,
ani tó ǹ bo mana lán fãnantɛ̃ gupurakũnaa bà.
7 Ǹ zɛ kũ mɛnao Dikiri arɛ ǹ a dã,
ǹsun tó aruzɛkɛde yã n kũ gbãna
gↄrↄ kũ à bò kũ a wɛ́zɛ̃ vãnioro.
8 Ǹ pↄfɛ̃ tó ǹ mì kɛ̃ pɛ̃tɛ̃a.
Ǹsun tó yã birenↄ n kũ gbãnaro,
àdi su kũ yãvãnikɛnaaomɛ.
9 Zaakũ gbɛ̃ vãninↄ ni kakatɛ,
gbɛ̃ kũ ń wɛ́ dↄ Dikiriinↄ mɛ́ ògↄ̃ bùsu vĩ.
10 À gↄ̃̀ fíti kũ gbɛ̃ vãninↄ nigↄ̃ kun doro,
bee tó n ń wɛ́tɛ, ĩni ń lero.
11 Zĩdabusarinↄ mɛ́ onigↄ̃ bùsu vĩ,
onigↄ̃ pↄnna kɛ kũ aafia zↄ̃kↄ̃ↄo.
12 Gbɛ̃ vãni dì yã vãni kpákpa gbɛ̃ mananɛ,
àdi sakaa pìtia.
13 Ama Dikiri dìgↄ̃ a yáa dↄ,
zaakũ à dↄ̃ kũ a gↄrↄ ni papa.
14 Gbɛ̃ vãninↄ dì fɛ̃nɛda woto,
òdi ń kà kpá sála,
de ò le ò takasidenↄ kũ wɛ̃ndadenↄ dɛdɛo,
ò gbɛ̃ kũ ń yãkɛna mananↄ kakatɛ.
15 Ń zĩda fɛ̃nɛda ni ń zↄ̃ ń swɛ̃̀n,
oni ń sánↄ ɛ́'ɛńnɛ.
16 Pↄ́ fíti kũ gbɛ̃ mana vĩ
de gbɛ̃ vãni dasinↄ aruzɛkɛla,
17 zaakũ gbɛ̃ vãninↄ gbãna ni mì dɛ,
ama Dikirimɛ gbɛ̃ mananↄ kũna ũ.
18 Dikiri taarisaridenↄ yã dↄ̃,
ń bakaa dìgↄ̃ de ń pↄ́ ũ gↄrↄ sĩnda pínki.
19 Wé'i ni ń kũ yã pãsĩ gↄrↄ zĩro,
bee tó nàa kà, onigↄ̃ kãna.
20 Gbɛ̃ vãninↄ sↄ̃ oni kakatɛ,
Dikiri ibɛrɛnↄ ni láka lán sɛ̃̀la bↄ̀tↄↄ bà,
ò gɛ̃tɛ lán túsukpɛ bà.
21 Gbɛ̃ vãni dì pↄ́ sãkãḿma à a fĩna boro,
gbɛ̃ mana sↄ̃ àdi gba da yↄ̃nkↄyↄ̃nkↄ.
22 Gbɛ̃ kũ Dikiri arubarikaa dàńgunↄ mɛ́ ògↄ̃ bùsu vĩ,
gbɛ̃ kũ à lɛ́ kɛ̀ńnɛnↄ sↄ̃ oni kakatɛ.
23 Dikiri mɛ́ àdi zɛ́milɛ kũ gbɛ̃nɛ,
a pↄ dìgↄ̃ nna a kunnaaa.
24 Bee tó à gɛ̃̀ɛ sì, ani lɛ́tɛ sↄrↄrↄro,
kũ Dikiri a kũna yãi.
25 Kɛfɛnnan ma ũ yã, akũ ma zĩ kũ̀,
mádi e Luda gbɛ̃ mana zùkũna zikiro,
mádi e à nɛ́nↄ tɛn bara kɛro.
26 Àdigↄ̃ gba da gↄrↄ sĩnda pínki
àdigↄ̃ pↄ́ sãkãńnɛ,
a nɛ́nↄ nigↄ̃ de arubarikadenↄ ũ.
27 Ǹ kpɛ li yã vãninɛ ǹgↄ̃ yã mana kɛ,
ĩnigↄ̃ kú bùsu dín gↄrↄ sĩnda pínki.
28 Zaakũ Dikiri ye yãzɛdei,
ani a náanikɛrinↄ zukũnaro.
Onigↄ̃ kun aafia gↄrↄ sĩnda pínki,
gbɛ̃ vãninↄ sↄ̃ oni kakatɛ.
29 Gbɛ̃ mananↄ mɛ́ ògↄ̃ bùsu vĩ,
onigↄ̃ kun gↄrↄ sĩnda pínki.
30 Ɔ̃ndↄ̃yã dì bo gbɛ̃ mana lɛ́n,
a lɛ́ dì yãzɛde o.
31 A Luda doka kú a swɛ̃̀n,
a gbá dì sata pↄ́kearo.
32 Gbɛ̃ vãni dì gbɛ̃ mana kpákpa
de à le à a dɛ,
33 ama Dikiri ni a tó a ↄĩro,
ani we yãkpatɛ a blero.
34 Ǹ Dikiri dã ǹgↄ̃ a yã kũna,
ani n kara de ǹgↄ̃ bùsu vĩ,
ĩni gbɛ̃ vãninↄ mìdɛna e.
35 Ma gbɛ̃ pãsĩ gbãnade ke è yã,
àtɛn ↄ tá lán lí kũ zĩtɛ kɛ̀nɛ nna bà.
36 Kũ tá kà kũmao gwe, à kú gwe doro,
ma a wɛ̀tɛ, mádi a lero.
37 Ǹ taarisaride yã gwa,
ǹ wɛ́ pɛ́ gbɛ̃ mana yãi,
zaakũ nɛ̀sɛyĩdade burinↄ ni gↄ̃ buri ũ.
38 Durunnakɛrinↄ sↄ̃ oni kakatɛ lɛɛlɛlɛɛlɛ,
gbɛ̃ vãninↄ buri ni mì dɛ.
39 Dikiri mɛ́ ani gbɛ̃ mananↄ sura ba,
anigↄ̃ deńnɛ utɛki ũ warikɛgↄrↄa.
40 Dikiri ni kpáńyĩ à ń bo,
ani ń sí gbɛ̃ vãninↄa à ń sura ba
kũ ò nài yãi.